DAMIA CASSANDRA

DAMIA CASSANDRA TUSUN KEPENUDI

TUSUN - 7(KEPENUDI)

* * * * * * * * * * * * * * * * *

"Damia uchu, nuan lapa?"

Aki nyau kesal meda aku enda ngetu kekuak mutah ari tadi. Enda nemu berapa lama aku lelap ba dapur, aku tedani laban nyepi perut aku enda nyamai asai.

"Enda nemu aki. Kada enda ketegal aku makai pemakai mayau tadi," mit aja sura aku nyaut aki laban takut kena anu.

"You what?!"

Nya.. Enda bula aku, sigi nganu aki.

"Aku nyepi umpan Alice, meda tak nyamai endar gaya iya. Anang nganu aku please.."

"Damia, Damia. Mayuh pemakai tau diempa kitai mensia. Nama ga makai umpan mayau? Padah aja, udar aja nama pemakai ti deka diempa nuan. Aki sigi ngiga. Aki.."

Bluerkkk.. Bluueerrkkk..

Aki enda sempat ngabiska jaku iya laban aku mutah baru. Sambil nguntus belakang aku, aki nail telefon ngagai lutur peribit kami empu ngasuh datai ke rumah.

°° SETENGAH JAM UDAH NYA..

"Meri pengaga ati ngagai kita sebilik Tuan Presiden," ku lutur pengudah meresa aku. Mua iya berupai tambak nyau sereta tuchum panjai.

"Nama dih lutur? Nama sangkut paut uchu aku ke mutah enggau berita gaga?" ku aki nanya enggau kening bekedut seribu.

"Princess Damia diatu udah betubuh bisi. Enda lama agi Tuan Presiden bulih ichit," ku lutur nya madah sambil ngaduka perengka ti dikena iya meresa aku tadi.

Bisi sepuluh sikin kini kami duai aki bebengap beperening pangan diri, nya baru kami duai meretika pekara ti dipadahka lutur nya tadi.

"Amat lutur?" ku aki nandu baru ngambika nyemetak agi.

"Amat Tuan Presiden, enti ulih anang laun ngaga peresa ngagai klinik tambah agi kitai pan nemu Princess Damia jantung iya baka ni."

"Nadai ngawa iya nya lutur?" ku aki.

"Anang irau Tuan Presiden, enggau naka ulih mih kitai bejaga sama. Besampi ngarapka indai enggau baby nadai apa nama."

Pengudah tembu meresa enggau nulis segala bansa ubat ti patut diempa aku, lutur nya pan mupuk mutarka diri. Nyadi ubat aku nya lagi, meruan bisi orang diasuh aki ngambi ngagai klinik kin.

"Damia uchu, udah tu jaga pengerai nuan. Anang makai utai mayuh macham. Anang irau, aki ngiga indu misi ngibun nuan udah tu." ku aki bejaku sambil murus pala aku.

"Terima kasih aki," ku aku lalu nyandih ba dada aki.

"Kemaya nuan deka madah ngagai uchu Michael dih?" ku aki nanya aku.

"Hmmm.. Lusa hari pengada Michael, kati enti aku madahka ngagai iya lusa dih aki?"

"Ni ku nuan mih uchu. Diatu nuan belelak dulu, anang nurun ari katil. Lagi aku ngasuh ama nganjung kue enggau ai tusu," ku aki. Udah nya tubuh aku digalika iya lalu dibungkur ngena pua. Sempat aki nyium kening aku sebedau pansut ari pangking.

Nyepi mata nyau enggai tinduk agi, urung pukul 5.00 lemai aku pan pansut ari pangking lalu nurun ke baruh. Aku duduk ba ayun serayaka nganti Michael pulai gawa.

"Sabar au baby, lusa aku madahka pasal nuan ngagai daddy. Hmm.. Enda sabar deka meda baka ni reaksyen daddy nerima berita penatai nuan," ku aku bejaku kediri sambil murus perut.

Enda lama udah nya, peda aku kerita ferrari Michael datai lalu sangkai di pelaman. Amat tak enda berasai aku beketup sima meda penyigat laki diri empu maya iya pansut ari kerita. Gap iya sehari tu bekenaka baju panjai lengan bechura kelabu tai itit ditipak ngena tanchut slack bechura chelum. Enda ditinggalka mega tali kalar iya bechura biru tuai bisi belang-belang mimit. Mua iya lis laban baru dichukur ragum kemari, sereta buk iya pisin belah tisi bisi merundai mimit ba kening. Maya aku meda mulut iya ti mirah chechirak laban ke enda nginsap, bisi meniga kali aku nelan ai liur.

"My King, my darling and my handsome man, i miss you.." ku aku dulu nyapa iya.

"My Princess Damia and my lovely wife," ku Michael nyaut sambil ngijapka mata. Jari sepiak kiba iya megai kantung gawa, lalu jari sepiak kanan iya megai coklat Ferrero Rocher ti diengkah dalam serangan betukuh love, dirias ngena ribin bechura mirah. Owh! Lela. Ati aku lela baka batu kudi ti lela dipuputka ngena kipas, pengudah meda Michael baka nya.

Enda ingatka diri ti udah betubuh bisi, aku engkechit nurun ari ayun lalu belanda ngelawa Michael.

"Muahh, muahhh, muahhh, why so sexy today?" ku aku bejaku sambil nyium kening, kuyu enggau baruh dagu Michael. Tali kalar iya dibuka lalu ditempalungka aku ngagai perabung kerita. Udah nya kanchin baju iya ga aku buka tiga iti ari atas bepun ari rekung sampai ngagai kanchin ba dada. Ku jaku deka ngansarka kuyu ba dada iya, sekali nyau tejangal laban tepedaka dada iya ti bebulu.

"Buai bulu nya! Heh! Nadai ati agi aku deka begauk enggau nuan. Ukai nuan enda nemu aku paling enda rinduka lelaki bebulu, mayas."

Pengudah munyi nya, aku pan bejalai kekendit tama ke dalam rumah ninggalka Michael ti tebelenga. Dalam ati majak mut-mut ngutuk bulu dada Michael. Aku pan enda nemu, ati aku sehari dua tu jampat bebali ringat, udu tengik sereta kih. Engka nya pemai indu ngandung pelaba aku. Nya baka tadi, ketegal bulu dada aja ulih ngasuh aku ringat.

Aku enda terus pulai ngagai pangking, tang ngelawa pegung ikan. Udah tembu meri ikan makai, baru aku nuju pangking. Lebuh aku nambit pintu pangking, maya nya ga Michael pansut ari bilik mandi semina bedandung naka punggung aja. Bendar aku ngetatka diri ari tuchum, pengudah meda dada iya beresi nadai selambar bulu agi.

"You like it now my Queen?"

Michael bejalai begadai ngelawa aku, nanya sambil ngangkatka bulu kening nunda penyanyi Ziana Zain. Nyeregu bulu pegu aku meda, laban sigi udah ngadang pengawa nama pengujung iya lagi.

* * * * *

Dipandakka jalai cherita, pejam enchelak hari beganti hari pia mega bulan betukar ganti. Diatu kandung aku udah manggai sembilan bulan, nganti hari deka beranak aja. Enti nitihka perambu, tulat mih hari aku beranak. Perut enda ibuh disebut, nyau reridi aja. Aki enggau Michael chukup kur ngibun aku, nyentukka gawa pan ari rumah aja seduai iya. Semadi bisi aum ti enda ulih diseliahka, baru seduai iya nurun ke opis. Kami duai Michael pan udah pindah ngagai pangking temuai di baruh aja laban enggai ngasuh aku nurun niki tangga ke sadau. Lutur peribit sigi ninting hari meresa aku, nyentukka diasuh aki diau enggau kami ditu sampai aku beranak. Kelimpah ari nya, aki mega ngupah indu misi tiga iku matau aku ari sukut pemakai enggau pengerai.

Nyau ngenang baka ni reaksyen Michael, maya aku madahka diri udah betubuh bisi lebuh ngintu hari pengada iya suba. Michael chukup gaga enggau sesabak merap aku. Iya madah, baby nya mih tepa hari pengada ti pemadu berega dalam idup iya. Baka ni chara aku madah? Aku nepu perengka pemeresa ai kemi indu ribat dalam kutak mit lalu disangkingka ba marik Alice (mayau). Udah nya, Alice diasuh aku ngelawa Michael ti baru deka belabuh nyepu dian ba kek iya. Keterubah meda nya, Michael bedau meretika pekara ti deka dipadahka aku. Semadi udah meda video ti udah dirikud aku baru iya nemu. Sera nyawa? Aku nadai mayuh leman pemakai empa aja. Aku mega nadai mabuk baka sesetengah indu ribat. Semina siti aja iya nya pemakai mayau, nyentukka sehari tu diempa aku tang belalai. Aku makai nya dalam bilik agu laban nangika dipeda orang.

"My Queen udah ready?"

Tekenyit aku ti benung tegenung ba berinda luar disapa lalu diberap Michael ari belakang. Sehari tu aku deka tama wad sepital nitihka atur lutur. Tumu aku diasuh tama sepital ngambika nyamai agi alai sida iya ngemataka aku din. Lutur madah aku enda ulih beranak 'normal' laban ke bisi pemedis jantung. Ka pan enda, ngena chara beputung mih aku.

"Udah. Enda sabar deka nyambut penatai orang baru," ku aku nyaut sambil nyandih ba tubuh Michael.

Kami duai Michael pan bepegai jari pansut ari pangking. Nyadi semua barang udah disimpan bala ama dalam kerita magang tadi. Aki, aku enggau Michael nepan limousine kami ngulihka lantang agi. Datai aja ba sepital bayar ti udah ditempah aki, kami pan dibai ngelawa bilik wad aku.

Meda aku likun nadai apa nama, urung pukul 8.00 malam aki enggau Michael pansut makai enda lama. Baru aku deka ngelelapka mata, dinga aku nyau setuk-setuk munyi tapa kasut datai ari luar. Enda lama udahnya, pintu wad pan didinga semiak ditukangka ari luar.

"Tabi malam lutur," ku aku dulu nyapa.

"Tk.. Tk.. Tk.. Damia, Damia.."

"Gggrraaaccceee.., nnaaammaa ggaagga nuuaann ddiituuu..," nyau kekatat jaku aku laban takut meda iya. Kumbai aku lutur nya tadi, tangih nya Grace ke nyau diri ngena baju lutur.

"Hahahaha... Hahaha.. Anang takut,"

ku Grace majak mansang semak ngagai aku.

"Nuan perampas Damia. Michael nya ungkup aku. Enti aku enda ngempu iya, nadai indu bukai ulih ngempu iya. Indahka aka aku empu dibunuh aku, anang agi nuan tu ti nadai kaul apa nama enggau aku. Oh! Enda ingat. Bisi. Tua bisi kaul. Jantung dalam tubuh nuan nya jantung niang aka aku Elizabeth. Nuan ingat, Michael nya beamai deka ke nuan pia? Ukai. Iya jadi enggau nuan ketegal enda ulih muai pengerindu enggau niang aka aku. Hahaha.. Jantung nya mih pengingat seduai iya."

"Nnuuaann bbbuullaa Ggrraaccee..,"

"Hahaha.. Nuan deka nemu baka ni aku munuh niang aka? Aku mih orang ke ngelantak iya. Pummmm! Munyi nya mih kerita aku ngelantak niang aka suba. Puas ati aku meda tubuh iya ngelambung ke langit sebedau labuh terempas atas jalai alun."

"Gilaa! Nuan tu gila Grace, aka nuan empu nya nemu! Kempang ati nuan munuh iya!"

"Ya! Aku gila! Aku gilaka Michael! Aku ti patut ngempu iya, ukai niang aka, ukai nuan, ukai mega indu bukai."

Pengudah munyi nya, Grace ngeruk kambut baju lutur ti dikena iya lalu mantaika lungga. Aku ti meda majak takut lalu bekinsit deka ngenyakka segenil ba atas pala katil. Tang mih enda nemu dini penyilap aku, enda memukai aku labuh ari katil.

DUUUPPPP!

Tak naka pemedis asai iya disepi aku. Kanda enggau belakang aku asaika nadai betampung enggau tubuh agi. Punggung aku terentak atas lantai. Enda lama udah nya, peda aku pansut darah nelusur sebelah pah.

"Tttuulluunnggg.. Sstttttt.."

Pia ke minta tulung, mua aku nyau ensinat ngetatka pemedis sambil megai perut.

"Hahaha.. Hahaha.. Sepi asai nuan. Selamat tinggal Damia," pengudah munyi nya Grace pan mupuk pansut ninggalka aku.

"Aaakkii.., bbaabbyy.., Kinggg..," mit aja sura nyawa aku. Nyau bepetir sereta majak rapa utai dipeda ngujungka lalu petang tegayam.

* * * * * *

~MICHAEL POV~

Kami duai Aki Damia nyau betekalat baka uduk deka beranak ba luar bilik beputung Damia. Dalam ati din chukup kesal sereta nangika pengelikun Damia. Asaika deka luput aku maya indu misi ti benung meresi wad Damia tadi madahka iya udah ditabanka ngagai bilik beputung. Sida madah, Damia ditemu sigi udah luput gegaring atas lantai dibalut darah.

Bisi tiga jam mih pengelama kami duai Aki Damia nganti ba luar bilik beputung, nya baru bisi siku lutur indu pansut.

"Meri pengaga ati ngagai nuan Tuan Presiden, Princess Damia udah mujur beranak ngena chara beputung. Baby nadai apa nama, lalu diatu benung diperesi bala misi." pia ku indu lutur nya madah.

"Penempa anak iya lutur? Princess dih? Nadai apa nama?" ku Aki Damia dulu agi nanya lutur ari aku.

"Indu. Nyadi diatu kami agi matau pengerai Princess Damia, kelebih agi jantung iya. Enda ulih ke enda kami mesti meri iya ubat bius ti kuat laban deka ngemansutka baby tekala nya tadi ketegal Damia balat amat begetah. Ngarapka Princess kuat napi penguji sekali tu." Kami duai Aki Damia mendingka aja pejurai ari lutur.

TAKAH SEMINGGU UDAH NYA..

Sehari tu Damia enggau baby dikemendarka lutur pulai ke rumah. Nasit seduai iya nadai apa nama. Tang mih dalam kandang seminggu tu tadi, aku meda Damia tak nyelai pendiau. Iya mayuh tegenung sereta enda bagak baka selama. Iya mega dipeda baka ke takut, sampaika baby pan enda meleka ari diberap enggau dipangku iya. Tekadang maya tinduk, Damia selalu ngigau baka ti bisi utai ngemba. Maya aku nanya, nadai apa nama ga ku iya.

"Aram pulai ke rumah kitai," ku aku bejaku sambil ngatung Damia ngagai bangku asur. Udah nya, baby Diana ga ditanggung ari katil lalu disuaka ngagai Damia.

'DIANA CATHERINE MICHAEL'

Nya mih nama kumang ati kami duai Damia.

"Aku ngasurka iya," ku Aki Damia.

Aku nadai mantah. Damia enggau baby Diana diasurka aki iya, nyadi aku nyandik kantung enggau minching sekeda perengka ti bedau abis diangkut ngagai kerita tadi. Maya kami baru pansut ari lif, aku ti nyingkang dulu ari mua nyau tekenyit ninga Damia enggau aki iya nyerauh. Malik aku ke belakang, meda Damia udah teduduk atas lantai ditinggang kerusi asur iya.

"Baby Diana! Nyin gagai indu ti naban ke iya!!!"

"Alai Michael!!! Gagai indu nyin!"

Enda nyadi aku deka mansang napatka Damia pengudah ninga seduai iya meaki madah munyi nya.Malik aku ngagai tangga jalai penusah ngenyit, peda aku belakang indu nya benung belanda. Nadai nganti lama, dilekaka aku atas lantai semua barang ti dipegai lalu belanda ngagai indu nya.

Tegar amat ga indu nya belanda niki tangga. Datai ba perabung, indu nya muka sengkabung mua iya lalu bejalai surut ke belakang. Nemu nya tak Grace.

"Grace!! Lekaka anak aku! Anang ngemediska iya. Dendam tu entara tua, nadai sangkut paut enggau baby!"

Begadai aku mansang ngelawa Grace ti majak nyingkang surut. Baby Diana pan nyau ngekal nyabak diberap iya.

"Michael! Enti nuan deka baby tu selamat, sain surat sarak seduai Damia tu! Nuan ungkup aku Michael! Ukai sapa-sapa."

"Gila nuan Grace! Aku sayauka Damia! Enda mansa lalu dalam untak aku deka nyarakka iya!"

"Enti baka nya, buai aku ke baruh baby nuan tu!"

Pengudah munyi nya, Grace ngangkatka baby Diana lalu ngaga aksyen deka nikau ke baruh.

"Grace!!! Anang! Au mih! Suaka ngagai aku dulu surat nya. Aku nyain iya!"

Panjai tuchum Grace ninga aku nyebut munyi nya. Nya mih nyau nyerenggat bulu pala aku merening ke baruh lebuh datai ba tisi perabung empa pengerawan ati.

"Bai kitu dulu baby nya Grace.., 'bahaya' amat nuan bediri ba ujung baka nya!"

Aku agi ngumbuk Grace. Maya Grace nyuaka surat ti diasuh iya sain aku, dia dih aku ngambi peluang nya ngerebut baby Diana ari pegai iya. Kami duai nyau bebatak asur berebutka baby Diana. Maya nya sigi udah begau bala mayuh meda kami duai. Damia enggau aki iya pan bisi.

Nyau kepemuas iya engka laban Grace tulah, teperusut kain bedung baby Diana. Aku ulih ngerebut baby Diana, tang enda sempat nyapai jari Grace ti enchepai sebedau iya labuh ke baruh. Amat tak baka daun layu labuh ari puchuk kayu, tubuh Grace ensayar labuh ke baruh. Mijinka kita perabung sepital nya ba tingkat 50. Redak kerubung pala Grace, perut iya teberunsai sereta kaki enggau jari iya nadai betampung enggau tubuh agi. Bisi ga mansa pending aku tusi bala mayuh ti bisi meda, leka mata Grace nyau bebendar sida polis enggau raban pemantu penusah ngenyit ngiga laban ti nyau bebelat ke bukai. RIP ngagai niang Grace.

* * * * *

°°° TAKAH TIGA TAUN UDAH NYA, DAMIA POV...

"Aku meri terima kasih besai ngagai nuan niang Elizabeth. Ketegal pemanah budi nuan ti udah nyain surat nyanggup nyali perengka dalam tubuh nyema lelang midang. Tu jantung nuan ti dikembuan aku, ngujungka aku agi ulih enseput ba dunya injau nyentukka sehari tu. Aku danji nyaga jantung tu enggau manah. Aku mega danji ngarika nuan nanggam pengerindu pengabis ati enggau Michael. Iya King tua, ukai semina King aku aja. Belelak mih nuan ba Dunya Sepiak din enggau ati lantang."

Aku bejaku kediri nunga pendam niang Elizabeth, sambil ngengkah ke segupung bungai rose burak atas semin pendam iya. Dikena ngelai sehari tu, hari maya jantung niang Elizabeth tama dalam tubuh aku, aku datai ngundang pendam iya. Kediri aku aja, laban Michael bisi pengawa ngagai menua bukai.

"Nyadi nuan niang Grace, aku minta ampun ngagai nuan ngarika Michael. Badu mih nyimpan dendam. Belajar mih nerima atur Petara iya ukai ungkup nuan."

Aku bekalih ari nunga lubang pendam niang Elizabeth ngagai lubang pendam niang Grace. Berimbai lubang pendam seduai iya diri menyadi nitihka peminta ari apai enggau indai seduai iya.

Udah tembu ngabas pendam niang Elizabeth enggau niang Grace, aku pan pulai ke rumah. Baka selama, nyentukka sehari tu aku sigi enda dikemendarka aki pansut kediri. Tadi tu pan aku diiring lima buah kerita, enggau sepuluh buah motosikal bala 'bodyguard'.

"Mummy!!"

Sangkai aja di pelaman rumah, aku lalu disapa Diana ti benung bemain enggau anak Alice(mayau). Mayuh anak Alice diatu bisi sepuluh iku. Aku ngasuh Michael ngiga kaling ke Alice suba laban sigi ngasuh iya beranak betelesak. Mayau lelaki bansa 'bengal' dibeli Michael nyadika tawing Alice.

"Diana.., don't!!"

Nyau manjung aku ngelara Diana ti nyeput pemakai anak Alice, lalu deka diempa iya. Bebilut gamal Diana pengudah dilara aku. Udah nya iya pan lalu belanda tama ke dalam rumah.

"Aki!!! Eeeeiii.. Mummy nganu Diana." Diana didinga aku nyabak lalu bedawa ngagai aki ti benung macha bup ba ruai temuai.

"Mummy ukai nganu. Tang nagang Diana makai umpan mayau," ku aku nusi pekara ti nyadi ngagai aki.

"Baka nuan maya ribat ke iya suba mih, makai pemakai mayau. Agi ingat nuan?" ku aki.

Sama ketawa kami duai aki ngenang nya. Diana ti nadai nemu utai ulu ili pan ketawa nunda kami duai aki. Enda lama udah nya, dinga bisi sangkai kerita ba pelaman rumah. Diana lalu belanda nyenguk ari mua pintu penama bedau sempat aku nagang.

"Daddy!!!"

Peda aku Dania lalu empakap minta berap Michael ti baru pulai New Zealand. Tiga hari iya din laban bisi aum deka muka siti agi Kompeni din.

"Aki," ku Michael dulu nyapa sereta nabi aki meri basa. Nyadi Dania udah jenuh duduk bayam patung barbie ti baru dibeli Michael. Chukup rindu nembiak nya bayam anak patung barbie. Tiap kali aki enggau Michael bejalai mesti iya mesan ngasuh meli. Aki Michael pan baka nya, mesti meli ke iya nama datai nemuai kitu.

"My Queen.., i miss you." Michael duduk ngimbai aku pengudah meri tabi basa ngagai aki tadi. Tang mih baru iya semak deka nyium kening aku, takala nya aku engkual enggai nyium bau minyak wangi iya.

"Bluuueeerrrkkk... Mandi alai! Bau amat nuan nya, nyau bau kesing kesindap!"

Sempat aku ngasuh Michael mandi pia ke mampul idung. Nadai aku tan ensium utai ngemau nya.

"Damia sayau, minyak wangi tu belama ga dikena aku ngelama tu. Nadai kala nukar iya." Michael bejaku sambil nyium tubuh diri empu.

"Mandi alai! Anang semak aku nama nuan bedau mandi. Badu ngena minyak wangi nya agi nuan, engka udah sepait. Buai magang nya lagi," ku aku nyau sengau munyi sura nyawa bejaku laban ke mampul idung.

"Hmmm.. Ukai minyak wangi nya sepait pelaba aki," pia ku aki kepuas ti ninga kami duai Michael.

"Nama kebuah bukai dih aki?" Aku nanya enggau kening bekedut seribu.

"Anang guai, nganti aki telipun lutur dulu. Tang enti enda salah perambu aki, bisi berita manah deka datai."

Aku enda nanya aki, semina mendingka aja randau nengah arus telefon iya enggau lutur.

"Mandi!" ku aku nempik pah Michael majak ngasuh iya mandi. Enda ga iya ngelaban, lalu angkat tudah tuai niki ke sadau ngelawa pangking.

"Meri pengaga ati ngagai kita sebilik Tuan Presiden," ku lutur sambil iya meresa kedap aku. Setengah jam pia mih alai iya datai ke rumah pengudah aki telipun tadi.

"Nyaa.. Betul ambu aku," pia ku aki sambil tuchum panjai.

"Nama nya aki?" seretai kami duai Michael nanya.

"Damia udah betubuh bisi baru. Enda lama agi ichit aku betambah."

"Hah?!"

Kami duai Michael seretai baru ga manjung laban tekenyit. Naka tu aja mih kisah aku ti benama Damia Cassandra. Sembilan bulan udah nya, aku pan ngadaka siku anak lelaki ti diberi nama Harry Brinston Michael. Chukup mih sepasang nya anak kami duai Michael. Aku enda disagi lutur beranak mayuh laban nangika pengerai jantung aku.

~ABIS ~

~~~~~~~~~~~~~~~~~~~~~~~~~