DAMIA CASSANDRA

DAMIA CASSANDRA TUSUN - 6

TUSUN - 6

* * * * * * * *

~DAMIA POV ~

"Grace Joanna David, nama gaga nuan ditu? Ukai nuan agi belajar di menua China din?"

"Owh! Michael, aku udah abis belajar tu. Nya mih nuan, buai batu sepengudah aka lelang midang."

Aku enda bemunyi semina leka mata aja bekinsit kin kia merening ngagai Michael enggau indu ti benama Grace nya ke berandau nyapa pangan diri. Tak empegal Grace nya tadi belanda lalu merap Michael. Taja pan aku bediri sepiak Michael, ulih aku nyium bau insap ngesuh ari mulut iya. Amat tak sendat asai seput laban aku enda kala nyium bau insap.

"Sapa tu?" ku Grace nunjukka jari ngagai aku.

"Grace, tu Damia Cassandra bini aku. Damia, tu Grace err..

"What?! Bini?! Kemaya?!"

Enda apus jaku Michael laban diselepak Grace enggau panjung-panjung tekenyit. Mata iya pan nyau bekuring nyerenih aku ari punjung pala dataika kaki, enda nyalah baka mata indu antu kuklir.

"Hai!"

Aku dulu nyapa Grace sambil ngulurka jari mai betabi, tang mih enda disambut iya. Grace nyau nyelengut lalu bejalai ngelawa sofa baru, ninggalka kami duai Michael ti bebengap merening pangan diri. Nya mih tumbung iya nyau berupai jungkang dibai kekendit bejalai ngena kasut tunjik.

"Ajihka terap nih, nya baru rindu meda labuh meredup baka buah nangka," pia ku aku betelai dalam ati.

"Come," ku Michael nelai aku lalu kami duai pan entudi Grace.

"Sampai ati nuan bebini baru enda madah," ku Grace ngepunka randau pengudah kami tiga sama udah duduk.

"Kati dih, aku mega mesti neruska pejalai pengidup diri empu. Agi pan tiga taun niang Alizabeth udah lelang midang," ku Michael nimbal iya.

Aku laban ke nadai nemu cherita ulu ili, semina mendingka aja mih randau seduai iya. Enda lama udah nya, datai ama ngemai ai oren, biskut enggau buah epal mirah ti udah dipunsi enggau disirap. Jingkau aku sesirap lalu diempa.

"Suba baka nama seduai aka madu pengerindu. Enda aku nyangka ngenyampat nya nuan muai iya lalu bebini baru." Grace bejaku sambil ngirup ai oren.

"Grace, chukup mih aku merampau ngenang niang dalam kandang tiga taun ke udah. Beri mih aku peluang ngasaika pengidup lantang senang."

"Enti baka nya, nuan patut milih aku Michael. Nama pengurang aku di mata nuan? Kada enda seduai dipejal jadi dih? Nuan tau ngelaban Michael. Sarak ke iya, udah nya tua ngepunka pengidup baru. Aku ulih meri nuan lebih ari iya."

Pengudah munyi nya, Grace ngenyit angkat ngelawa Michael lalu duduk atas pah iya. Aku ti enda sanggup meda, angkat lalu belanda niki ke sadau.

"Michael!!!!"

Ari tengan tangga aku ulih ninga sura aki Michael manjung, tang aku nadai pedulika nya. Tama aja dalam pangking, pintu diempaska aku bebalat lalu dikunchi. Telefon binching dijapai lalu lumur aki didail. Enggau sesabak aku minta ambi aki. Engka laban kelalu bendar nyabak, dada aku pedis sereta seput aku nyau sendat. Bekelansat aku deka ngambi ubat ti diengkah atas mija ba kaki katil. Nyau asaika jauh meniga tanjung mija nya disepi aku. Datai aja ba baruh mija nya, aku bepaut ba kaki iya tang mih enda memukai mija nya tumbang lalu ninggang aku. Nadai ulih ngaga apa nama, aku semina ngetatka pemedis aja. Makin lama, majak bepetir utai dipeda ngujungka aku luput nadai nemu utai agi.

* * * * * *

~MICHAEL POV ~

Gila. Grace amat udah gila. Benung aku enda ngadang iya tak duduk atas pah aku. Nadai sempat aku deka nagang Damia ti udah angkat lalu belanda niki ke sadau.

"Michael!!!!"

Tekenyit aku diperak aki ari mua pintu penama rumah. Ada aku kesaika tubuh Grace ti agi mengkang duduk atas pah aku. Sepi asai nyamai. Nyau bedarup aja iya labuh temepak baka buah rian pambu atas lantai.

"Nama nuan ngaga ulah enda menuku baka tu Michael?!"

PANNGGGGG!

Nadai bebah-bah aki mansang lalu nampar kuyu aku. Grace ke ngaga penyalah, aku ke makai buah lepang.

"Nadai aku ngaga ulah enda manah dih aki. Indu tu ke empelah enda nemu malu duduk atas pah aku."

"Iya mali dikesaika kitai?! Nama nuan ngetatka aja tadi?! Udah ga ba mua uchu Mia! Aku enda ngira, diatu nuan mesti nerangka semua pekara ngagai Damia. Nyadi nuan indu ridun, nadai empedu malu, bangat enda laku. Buah kubal ga ensembu, sereta tumbung jungkang tau alai ngaitka penyangkut gari. Diatu aku ngasuh nuan pansut ari rumah tu. Anang berani nuan ngindikka kaki ngagai rumah tu agi nama enggai tama rumah jil..!"

Pengudah munyi nya, aki lalu ngirit tubuh Grace. Sempat mega aki nyingkau kantung sandik Grace ti diengkah atas sofa. Datai ba mua pintu penama rumah, lalu dijuka aki tubuh Grace. Udah nya kantung Grace ga ditempalungka aki, nyau semetuk aja kena kening iya.

"Michael! Berani kita ngaga aku baka tu! Anang nesal ila. Aku sigi datai baru malas dendam!" Grace nyau baka orang gila, rauh-rauh lalu ngeransi pun bungai ke bisi ditanam sebelah tisi rumah.

"Woi! Indu gila!"

Datai tukang kebun kami ngelara iya sambil ngaga diri deka nyembur enggau rachun rumput, baru Grace ngetu gerinsa.

"Ingat! Aku sigi datai baru malas dendam ila. Nuan Michael endang ungkup aku siku. Nama aku enda ngempu nuan, indu bukai pan enda!"

Sepengudah munyi nya, Grace pan kekendit bejalai ngelawa kerita iya ti disangkaika ba tisi pagar rumah. Nadai nganti lama, kerita iya diguritka naka pengelaju pansut ari genturung rumah.

"Kasih! Bangat suntuk lelaki! Pui!" ku aki kekutap ba luar sebedau tama.

"Explain it to me Michael!"

Aki nampung jaku enggau mua mirah nengir aku. Baru aku deka nyaut, tang mih nyau enda nyadi pengudah meda ama ti belanda-landa nurun tangga.

"Master! Tuan Muda!.., Puan Muda, iya.., iiyyaaa.., din.., aku bisi ninga utai bedarup tang enda ulih tama laban pintu enda ulih buka," nyau seput-seput iya bejaku sambil jari nunjukka ngagai sadau.

Meda baka nya, kami duai aki seretai belanda niki tangga ngabas nama enda utai ke ku ama nya tadi. Datai ba mua pintu penama pangking, bendar ga aku deka muka pintu tang enda ulih. Pintu dikunchi Damia ari dalam.

"Aki, pintu tu bekunchi!" ku aku.

"Babak aja!" ku aki.

Ninga aki madah munyi nya, surut dulu aku. Udah nya baru mansang ngelantak pintu. Tiga kali aku nyeging pintu enggau penapat inat, baru pintu tebabak.

"Damia!!!!"

Manjung aku meda Damia ke sigi udah gegaring nadai nemu utai atas lantai. Chukup kesal ati aku meda kening iya balat amat bedarah. Tubuh Damia aku katung lalu dibai pansut ari pangking.

"Anjung ngagai sepital!" ku aki ti entudi ari belakang.

Tinggal dua igi gigi tangga alai abis ditengah, aki pan rerauh ngasuh deriba ngidupka injin kerita. Kami duai Damia duduk ba kemudi, nyadi aki duduk ba luan ngimbai deriba.

"Sepital! Sepital!"

Aki manjung sambil nyengukka pala ari jenila kerita maya kami betembung enggau kerita limousine Aki Damia, enda jauh ari simpang rumah.

Kira ke dua puluh minit pia mih alai kami datai di sepital bayar Batelonoca Di, Milan. (nama tempa aja, anang ngiga.) Damia pan ditabanka orang tama ngagai bilik penusah ngenyit.

"Nama udah nyadi kebatang endar tu hah?! Michael?! Tadi Damia telipun enggau sabak-sabak ngagai aku. Diatu iya luput dibalut darah." Aki Damia nyau besai sura nyawa iya nanya aku. Dada iya pan nyau katas kebaruh dibai seput-seput.

Aku dulu ngusuk buk bebalat sebedau nusui semua pekara ngagai Aki Damia. Aki ti duduk ngimbai sepiak kiba, enda bemunyi semina mendingka aja.

"Hmm.., irau aku ke pengelikun Damia enti munyi nya. Udah tu ila bai aku pulai iya," ku Aki Damia bejaku pengudah aku tembu becherita.

"Aki.., Tulung mih anang nyeraraka aku enggau Damia. Aku beambis ati sayauka iya," ku aku nyau enda berasai tepipi atas lantai sambil ngenggam jari Aki Damia. Ai mata enda ibuh disebut pan, beterenjui aja pansut ngemasahka kuyu.

"Aku enda baka ke nagang nuan ngundang iya Michael, tang siti peminta aku. Putarka dulu penyarut entara nuan enggau indu nya, laban aku nangika pengelikun Damia."

"Terima kasih aki, terima kasih. Meri aku awak alai mutarka semua pekara dulu. Aku danji ngena seput aku empu nyaga pengelikun Damia."

Aki Damia nadai nyaut seleka mukut, nimbal seleka beras. Semina munyi demuh iya sambil nyintak seput aja ti didinga.

Bisi setengah jam pia mih kami nganti ba luar bilik penusah ngenyit, peda bisi siku lutur lelaki pansut. Iya madahka Damia diatu nadai apa nama semina diasuh belelak aja lalu emosyen iya mesti dijaga. Kebuah pia, laban nangika penyakit jantung Damia tepulai baru.

Urung pukul 8.00 malam baru Damia dikemendarka lutur pansut. Iya enda ditan ba sepital laban aki iya madahka meruan bisi lutur peribit empu nyaga Damia ba rumah. Nitihka peminta aki Damia, ari sepital kami terus pulai ngagai rumah sida iya kin.

Kenyau ari sepital nyentukka datai di rumah, Damia enda bejaku nyau baka orang bisu. Dalam kerita pan iya enda ngemuningka aku semina nyandih ba dada aki iya aja.

"Anang nitihka aku! I hate you!"

Teketu singkang kaki aku ti entudi Damia ngelawa pangking iya, pengudah diperak iya ngenyit.

"Damia.., aku minta ampun sayau. Anang ngaga aku baka tu. Dini aku betah enda bejaku sereta jauh ari nuan," pia ku aku bejaku sambil nyabak. Enda aku malu dipeda bala ke bisi dia.

Damia enda nyaut majak bejalai niki tangga sambil megai pala iya ti bebalut. Kening Damia bisi tiga abi jait empa pemalat kena tinggang mija tadi. Enda liat ati aku meda pejalai iya tak tebimbing, tubuh iya pan lalu dikatung.

"Syhhh.. Jenuh kih! Nama nuan enggai tua bebelat labuh ari tangga tu lagi," aku betelai ba pending Damia ti benung engkuda enggai dikatung aku.

Tama aja dalam pangking, tubuh Damia diengkah aku begadai atas katil. Udah nya tubuh iya dibap aku ngena pua sebedau ngalika diri ngimbai iya. Taja pan Damia bekalih melakangka aku, tang aku enda leju ngumbuk iya. Sambil nunga belakang iya, aku pan belabuh belagu munyi tu..

¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬

Everyone has their obsession

Consuming thoughts, consuming time

They hold high their prized possession

That defines the meaning of their lives

You are mine

You are mine

You are mine, all mine

You are mine

You are mine

You are mine

You are mine, all mine

You are mine

There are objects of affection

That can mesmerize the soul

There is always one addiction

That just cannot be controlled

You are mine

You are mine

You are mine, all mine

You are mine

Baru setengah lagu You Are Mine nya, aku nyau ngetu belagu laban Damia ngenyit bekuing lalu merap aku. Sesikuk aja iya nyabak.

"Syhh... Anang nyabak agi sayau, enda manahka pengerai nuan. Aku minta ampun ketegal aku nuan bulih pemedis," ku aku bejaku ngaum Damia. Buk iya ti merundai ngelamun mua, dipurus lalu diselitka aku ba tisi pending iya.

"Tusi. Tusika magang semua cherita nuan ti bedau ditemu aku ngelama tu King. Anang ngelaungka siti pan," Damia enggau mata pejam bejaku munyi nya.

Aku pan nusi ngagai iya pasal kaul kami duai niang Elizabeth suba bepun ari bepangan, betunang, nyentukka niang Elizabeth lelang midang dilantak kerita sehari sebedau kami duai nirika meligai. Semina cherita pasal jantung nya aja aku enda nusi, laban nangika Damia ngumbai aku jadi enggau iya ketegal jantung niang Elizabeth ti bisi dalam tubuh iya.

Damia pan nyau chelap ati pengudah ninga cherita aku tadi. Kaul kami duai pan pulai manah baru. Tang taja pia, Aki Damia enda nyagi iya pulai ngagai rumah aku dulu laban semampai rawan ati pasal pengelikun Damia.

* * * * * *

~ DUA BULAN UDAH NYA, DAMIA POV ~

Enda berasai pejam enchelak, udah manggai tiga bulan kami duai Michael jadi melaki bini. Sepengudah pekara ti nyadi suba, kami duai Michael diau ba rumah kami ditu nyentukka sehari tu nitihka peminta aki. Kaul kami duai pan nadai apa nama pengudah ke charut mimit suba, laban Michael udah nusi ngagai aku pasal kisah lama iya enggau niang Elizabeth. Enda aku ninding laban ngira niang ke udah nadai. Semina siti pekara ti agi nyeruga runding aku iya nya, Grace madi niang Elizabeth. Aku semampai takut ninga Michael madah Grace nyimpan dendam dalam ati.

Meowww.. Meowww..

Munyi Alice ti engkiau ngebuka lansa kenang aku. Aku ngasuh Michael ngambi Alice lalu dibai kitu ngambika bisi besulu aku maya seduai iya aki gawa.

"Nama nuan engkiau Alice? Lapar?" ku aku nanya Alice baka ke nanya mensia nya mih.

Meowww.. Meowww..

Alice baka ke nemu jaku lalu engkiau nimbal aku sambil ngansar kediri ba betis aku. Meda baka nya, aku nanggung iya lalu dibai ngagai dapur. Datai ba dapur, aku ngulihka pemakai mayau empu dalam tin lalu dituangka aku ngagai pinggai Alice.

"Nyamai Alice?" ku aku nanya meda iya nyau negam-senegam.

Enda nemu nama kebuah aku meda pemakai Alice nya tak baka ke nyamai amat. Nyau beteritik aja ai liur aku labuh atas mija, enda ulih ditagang agi. Ambi aku tin iya ke bedau dipungkal lalu dibuka. Chulit aku mimit ngena ujung tunjuk jari laban deka nyepi asai iya.

"Yummy, nyamaiiii.., patut Alice masuk amat makai iya. Minta mimit au?" ku aku bejaku kediri nunga Alice ti majak makai enda ibuhka aku.

Ari nyeput mimit, enda berasai nyau setengah tin pemakai mayau diempa aku diteruju enggau ai amat nyilu kuku. Udah nya, aku pan gali telentang belunjur kaki atas lantai dapur ngimbai Alice ti agi makai, nadai ngira lantai nya beresi tauka enda. Tak enda kala-kala aku ngaga ulah nyelai baka nya. Kepemuas ti ngemataka Alice, aku pan lelap enda berasai.

~BETAMPUNG ~

~~~~~~~~~~~~~~~~~~~~~~~~~