DAMIA CASSANDRA

DAMIA CASSANDRA TUSUN - 5

TUSUN - 5

* * * * * * * *

~DAMIA POV ~

Sepi aku majak utai nya niki ngerayap katas-sekatas. Udah ga tak chelap asai iya. Nyepi majak lain asai, begadai aku enchelakka mata lalu ngebakka pua. Laban lampu tinduk tisi mija katil sigi enda ditutup, ulih aku meda nama utai nya. Pala iya enchekuk sereta mata pepeli merening aku. Bisi ngelima sikin kami duai sama enda engkebut semina merening pangan diri enda engkesap baru aku ngeleda lalu nyerauh.

"Baya!!! King bisi baya, dani! Bayaa!"

Aku nyerauh sambil nempik senentang kanda Michael. Nadai aku ngira ba dini, asal mih iya dani.

"Baya makai manuk ibu bilik sepiak! Eh! Ni baya?! Aku baya pantai bujang sigat berega ngasuh sida ke dara enda engkesap mata! Eh!"

Engka laban tekenyit Michael nyau ensugau angkat lalu latah muka kuntau atas katil. Abis tekebu sida panggal enggau pua gasak iya. Nasit katil enda patah. Laban ti ati meda Michael latah, aku pan nyau nadai ingat ke utai ti disebut aku baya tadi. Semadi meda utai nya tak empakap manah ba tanchut Michael baru aku manjung baru.

"King! Peda nuan ba tanchut nya bisi baya!!" ku aku madah sambil engkechit nurun ari katil.

"Tu baya ku nuan pia?! Tu ukai baya, tu tichak. Hahhahahaha.."

Gelesi bulu pegu aku meda Michael megai tichak nya sambil ketawaka aku. Nyau kekayun aja tichak nya dipegai iya ba iku. Udah puas iya ketawa, tichak nya pan dibuai iya ke luar berinda.

"Damia, Damia. Hahaha.. Hahaha.. Tichak dikumbai nuan baya. Empai kala-kala aku. Hahaha.."

Michael agi nampung ketawaka aku.

Nyau begulin-gulin iya atas 'karpet' tisi katil empa pemendar ketawa.

"Ketawa mih nuan, ketawa. Anang tinduk enggau aku atas katil ditu nuan. Dia nuan tinduk dibaruh," ku aku bejaku enggau mulut munchung panjai sedepa lalu nikauka panggal ngagai Michael.

"Owh! Anang ringat mih sulu ku Damia, aku betundi aja ga nya. Berani nuan tinduk kediri? Lagi tichak datai baru," Michael angkat lalu begadai niki katil.

"Anang semak aku, enggai begulai enggau nuan.Tadi nuan bendar amat ngeleseka aku."

Pengudah munyi nya, aku pan bekuing melakangka iya lalu bebungkur apus tubuh.

"Mia sulu, anang ringat mih. Aku minta ampun okay, anang udu ngeris.Tu malam keterubah tua tinduk begulai melaki bini, patut iya tua begaukka pangan diri maya tu." Michael ngumbuk sambil begadai naritka pua ti mungkur tubuh aku. Udah nya tubuh aku dikuingka nunga iya, lalu pala aku dipanggaika atas lengan. Jari iya sepiak murus buk enggau kuyu aku.

"Timang aku. Nya ukum nuan laban ketawaka aku tadi," pia ku aku nyau kepemuas ti enda bemunyi laban rindang dikayam iya.

"Okay, malam tu aku nimang nuan ngena lagu 'special'."

Pengudah munyi nya, Michael lalu madamka lampu tisi mija katil kami duai. Pengawa betimang pan belabuh beumba enggau telian leka ujan tutuh pauh ari luar bilik. Lemambang Michael sigi landik. Pengudah tungkat didegika lalu dientak, iya ukai semina betimang jalung, tang mih lalu lanjur enggau berenung sereta bemukun sekali. Chukup teperindang aku ditimang iya ngena leka tiun ayun lundai berentak didinga nyau enda berasai tawas hari siti.

* * * * * * * * * * *

Dipandakka jalai cherita, enda berasai pejam enchelak udah seminggu kami duai Michael ngintu bulan madu pengerindu di menua Hawai tu. Nama udah disebutka bulan madu pengerindu, sigi manis magang mih kenang iya. Enda ibuh aku nyebut mayuh, chukup mih semina madahka Michael chukup kur ngibun aku naka ke udah baik ke nya ari sukut pemakai enggau gari ti dikena aku. Makai aku disapi, mandi aku diberi pia mega tinduk malam aku ditimang. Ngarapka semua tu enda berubah mih dataika jemah ila.

Mayuh mega pekara ti baru dipeda sereta dipelajarka aku ba dunya luar dalam kandang seminggu tu tadi. Laban ke enda kala pansut ari genturung rumah ngelama tu, aku nyau baka orang sakai lebuh meda semua nya.

Kitai lengka ke dulu mih cherita bulan madu pengerindu, laban sehari tu kami duai Michael pulai ngagai Italy baru. Michael enda mantah peminta aku ti ngemai iya pulai ngagai rumah kami dulu laban aku nyau lelengauka aki.

"Mia sulu, anang belanda!"

Nadai aku ibuhka Michael ti rerauh nagang aku belanda pansut ari kerita pengudah sangkai ba pelaman rumah.

"Dini aki?" ku aku nanya ama pemeresi rumah ti benung ngelap pasu ba ruai temuai.

"Mr. President ba pegung ikan din Princess," ku ama nya madahka ngagai aku.

Baru aku deka nyingkang belanda, sepi aku tubuh tak diberap orang ari belakang.

"Anang belanda ku aku Mia sayau," nemu nya Michael ti merap sambil betelai ba pending aku.

"Alaa.., aku lelengauka aki."

"Nemu aku nuan lelengauka aki, tang anang mih belanda. Kati enti nuan abis terap?"

"Nuan bisi nyambut aku."

"Nya mih kena ngalahka kitai. Bisi aja jaku timbal. Nuan tu amat tak!"

Pengudah munyi nya, punggung aku dikelichik Michael sebedau nyium ngelansa mulut aku. Nya mih bala ama ke bisi meda nyau tuchum magang.

"Ehemmm! Princess.., kemaya datai?"

"Aki!"

"Anang belanda Mia!"

Seretai kami tiga aku, aki enggau Michael bejaku nyau nadai mendingka enggi pangan diri.

"Princess uchu, baka ni bulan madu pengerindu seduai? Okay?" pia ku aki nanya, sambil kami duai bepegai jari enggau pangan diri ngelawa sofa ba ruai temuai. Nyadi Michael entudi kami duai ari belakang.

"Okay aki, semina aku enda betah nuan aja. Taja pan ninting hari ngaga kangau video, enda mih asaika betemu batang tubuh. Aki gerai?" ku aku lalu melempai ba dada aki.

"Aki gerai uchu, dinga nuan aki deka ngajar dulu. Diatu nuan udah belaki sereta bisi ruang bilik kediri empu, kurangka mimit meraya ba aki. Nuan mesti belajar chara ngintu ruang bilik ngambika semampai bediri tegut. Bebasaka laki nuan. Pia mega anang jampat ngaga pemutus maya ati benung gerinsa. Berandau manah enggau pangan diri. Anang nyalam nama bisi pekara ti enda engkeman dalam ati diri. Nyadi ngagai nuan Michael, aki minta tulung nuan nyaga Damia enggau manah. Nama bisi pekara salah digaga iya enda manding dalam ati nuan, ajar sereta padah mih enggau manah. Anang sesekali datai jari ba iya, laban aki pan enda kala nganu iya. Aki mega ngarapka nuan enda bemain kayu tiga di belakang Damia. Enti nyema nuan nyau tabar ati begulai enggau iya jemah ila, anjung mih iya pulai enggau manah. Anang merinsa sereta nempayaka iya." Panjai licha aki ngagai kami duai Michael.

Tembu merarau tengah hari, kami sebela mulaika diri ngagai pangking deka belelak dulu. Ku jaku pengudah bebela tadi kami duai Michael pulai, tang nyau ngalahka diri ga tudah ninga aku ke rerengai bedau deka pulai ngagai rumah iya kin. Pagila baru kami duai pulai kin.

"Hmm.. Lelengauka pangking aku tu," pia ku aku bejaku sambil ngalika diri atas katil.

"Anang irau Mia sayau, sebarang maya tua tau nemuai kitu ila. Ukai nya bangat jauh. Munyi ku jaku sema kitai, enti digenggamka kentut agi mih bau alai datai ditu," Michael sigi landik ngumbuk aku.

"Danji au? Anang enggai nuan dibai aku ngundang aki kitu. Aku ukai nama, kasihka aki tinggal kediri. Ari mit aku tu diau baruh kechiak aki, nya mih aku bangat enda betah iya."

"Danji."

Pengudah munyi nya, tubuh aku pan dipaut semak ngagai iya. Munyi ku jaku sema orang tuai, buah rampu enggau buah rian endang nadai tau besendi. Lama laun sigi besengki. Ditambah agi utai enggi diri empu. Nadai mayuh jaku, pengawa melaki bini sigi mujur nadai ngira maya enggau menalan.

** * * * *

Enggau berat ati, sehari tu mupuk mih kami duai Michael mulaika diri ngagai rumah iya. Dalam kerita sepemanjai rantau jalai, aku enda engkeretik laban sinu ngenang aki. Agi bemua aku ke aki ti meliar ai mata nganjung aku tama ngagai kerita tadi.

"Mia sayau anang tusah ati au, enti nadai penanggul seminggu sekali tua ngusung aki."

Sangkai di pelaman rumah iya, Michael bejaku lalu nyapai jari aku. Udah nya kening enggau kuyu aku disium sebedau tali belulang pengelikun aku dibuka iya.

"Nganti ditu dulu," ku Michael lalu pansut ari kerita. Udah nya pintu kerita sepiak aku ditukangka iya, lalu ngatung tubuh aku dibai tama. Datai ba mua pintu penama rumah, Michael pan nyuaka kunchi kerita ngagai ama ngasuh ngambi barang kami duai.

"Aku lelengauka Alice(mayau)," ku aku bejaku meda Michael deka ngemai aku niki ke sadau ngelawa pangking. Ninga aku madah munyi nya, begadai tubuh aku diengkahka iya atas lantai, lalu kami duai bepegai jari bejalai ke dapur ngiga Alice.

"Aliceee..," ku aku ngangauka Alice ti benung makai. Nyau majak nyadi isi Alice diatu peda aku.

Meowww.. Meowww..

Alice baka ke nemu jaku, ngetu makai lalu belanda napatka aku.

"Owh! Majak pait Alice tu ditanggung," ku aku madahka ngagai Michael. Gusuk aku jamah amat Alice laban ati kelalu gidan meda iya nya cumil amai.

Tembu meri Alice mandi, baru kami duai Michael niki ke sadau ngagai pangking iya. Urung pukul 8.00 malam baru kami duai nurun ke baruh, lalu kami tiga aki iya pan neku ke lengan.

"Pagila nurun ke opis enda lama aku Mia sayau. Lama amat udah enda ngabas opis din," ku Michael. Maya tu kami duai baru aja tama dalam pangking. Pengudah tembu bebela sereta betunga enda lama enggau aki iya tadi, kami duai pan minta diri pulai ke sadau.

"Aku ka enggau ulih?" ku aku nimbal iya sambil nyugu buk ba mua cheremin mija anta.

"Hmm.., enti nitihka ati sigi dibai aku bejalai kini-kini mih nuan asi. Tang aku nangika pengelikun sereta pengerai nuan, nya aku berat ati. Enda ibuh enggau aku pan pagila, diau ditu belelak dulu."

"Ka enggau. Ka enggau. Enda aku lelak dih," ku aku nyau ngingkak baka nembiak mit minta dibelika gila batu.

"Anang temil please sulu, aku gawa din nadai endur aku ngemataka nuan. Nuan tinggal di rumah ditu besulu Alice. Enda aku lama dih. Tengah hari aku pulai, udah nya lemai tua bejalai ngagai kebun bungai sambil makai sekelin."

"Danji," ku aku ngulurka tunjuk jari.

"Danji." Michael nyaut lalu nyengkilungka tunjuk jari kami duai.

Nadai pengawa manchal malam tu, kami duai sama tinduk jenak sepengudah iya belagu nimang aku tadi.

* * * * *

Pagi tu urung pukul 7.00 Michael enggau aki iya sama udah nurun ke opis. Tinggal mih aku kediri, semina bisi bala ama aja ti dipeda reregap gawa. Lembau ga aku deka ngachau sida ke benung gawa. Abas aku Alice, peda aku iya agi jenak amai ga tinduk dalam sangkar.

Meda baka nya, aku pan ngaga pemutus deka bejalai sebelah luar rumah laban peda aku bisi jelatung ba tebing ai di baruh din. Rindang aku bejalai nurun tangga semin sambil beratika rampa menua genturung rumah, ngujungka aku enda berasai rembus ba jelatung. Pengudah duduk ba jelatung, ambi aku telefon lalu begambar. Udah nya, gambar tadi dianjung aku ngagai telefon Michael.

PEDA NUAN DINI AKU DIATU. MANAH AMAI RAMPA MENUA DIPEDA ARI TU. _ AKU

JIMATKA BEJALAI DIA SULU, ANANG LAMA. NAMA MATA PANAS UDAH NIKI BA PUNJUNG PALA, PULAI LAGI. NGIRUP AI AMAT MAYUH-MAYUH PENGUDAH PULAI KE RUMAH. UBAT EMPA. MANDI. UDAH NYA TINDUK, NGANTI PEMULAI AKU TENGAH HARI LAGI. ANANG REGAP-REGAP. _ MICHAEL

OKAY, BYE.. I LOVE YOU MY KING. _ AKU

BYE.. I LOVE YOU TOO MY QUEEN. _ MICHAEL

Panjai tuchum aku pengudah bebalas mesej enggau Michael. Enda aku nyangka, lelaki ti digela aku mayas suba nya diatu udah nyadi laki aku. Enda aku nyalamka diri udah labuh pengerindu enggau iya. Terima kasih ngagai aki ti udah ngatur semua pekara.

Udah tepantup asai ati meda rampa menua sambil duduk ba jelatung, aku pan mupuk mulaika diri. Datai di rumah aku lalu ngelawa dapur deka ngirup ai nyepi nyawa nyau ikak.

"Mem, tadi Tuan Muda bisi telefon ngasuh kami nyendiaka perengka dikena meri Mem mandi enggau berurut sekali. Aram," ku siku ama bejaku sambil engkunduk meri basa ngagai aku.

Aku enda mantah, nitihka aja ama nya ti ngembing aku ngagai siti bilik. Ba mua pintu, bisi tiga iku ama indu ti enda dikelala aku ngipa dia ngelaluka penatai aku. Tama aja dalam bilik nya, gegining aku beratika pemanah iya, udah ga nyau meali-ali bebau rengut. Nadai ke nadai perengka dalam nya. Aku pan diasuh sida nukar gari semina bedandung kain mandi aja. Udah nya aku diasuh sida gali ba bangku panjai. Nyinuk amat aku ngetatka tubuh diurut sida, dipudu ngena minyak 'aromatherapy' lavender, kukut jari enggau kaki aku diperesi lalu dichuk. Kepenudi sekali baru buk aku dituchi sida. Nyamai amat wai, aku diandai enda nyalah baka kumang sehari belama. Tembu semua nya, aku diasuh sida mandi berendam dalam bisin mandi ti udah diengkah sabun enggau kelupak bungai rose bechura mirah.

Rindang. Aku rindang amat ngujungka aku belayar ngiga kenyap enda berasai. Enda nemu berapa lama aku lelap, tang maya aku aku dani meda diri sigi udah gali bebungkur pua atas katil ngerimbai Michael. Begadai aku nilik tubuh diri dalam pua. Amat tak lalu tekala nya bebali mansau mua aku baka undang tunu sepengudah meda diri ke nyau telanjai.

"Ka kini nuan?"

Teketu aku ari bekinsit deka angkat ari katil pengudah disapa Michael. Enda nemu aku iya ngaga diri tinduk tauka enda tadi.

"Ka angkat begari, udah nya ngiga pemakai. Lapar..," ku aku nyaut sambil murus perut belakun ngaga diri lapar.

"Aku lapar mih," ku Michael.

"Bah! Angkat tua aram nama nuan lapar, ukai nuan madahka deka pulai tengah hari? Diatu pukul berapa? Ni aki dih, udah pulai?"

"Aku lapar deka makai nuan. Nya aku pulai tumu. Anang mayuh utai tanya," ku Michael lalu maut aku. Jari iya pan belabuh gawa. Tang mih benung datai ba tengah jalai, pengawa kami duai teketu laban ninga orang ngetuk pintu ari luar.

"Tuan Muda, bisi temuai ba baruh din deka betemu enggau Tuan Muda!"

Kami duai Michael dulu beperening pangan diri ninga ama iya ti ngangau nya. Panjai kesuh seput iya laban bedau bulih pengingin ati.

"Lagi tua nampung baru," pia ku Michael betelai ba pending aku.

"Asuh nganti dulu iya, lagi aku nurun!" ku Michael madahka ama iya pengudah ti betelai tadi.

Enggaika temuai nganti lama, udah nya kami duai pan sama begari. Tembu begari, kami duai bepegai jari pansut ari pangking lalu bejalai nurun tangga ngelawa ruai temuai. Ari ujung gigi tangga aku ulih meda belakang siku indu benung duduk atas sofa sambil dedegus nyirutka insap iya. Nyau besebun baka asap kapal, asap insap indu nya. Engka ninga derap tapa kaki kami duai Michael, indu nya bediri lalu nguingka mua ngagai kami duai.

"Hai! Michael Ricky Johnson, agi ingatka aku nuan?" ku indu nya bejaku sebedau nuchuhka papung insap iya ba nalan engkah abu insap.

Umbas iya diri ga pemajik indu nya dipeda aku, bekenaka gaun sendat sereba chelum pemanjai naka betis lalu kain iya bisi belah ba tisi pah. Indu nya mega ngena ketapu bechura kuning buah lansat, lalu bekarung jari bechura biru tuai. Buk iya pirang baka bulu kijang lalu mulut iya diunsut enselup bechura mirah nyau chechirak baka buah kundung.

"Grace Joanna David," ku Michael nyebut seleka-seleka nama indu nya. Mua Michael pan berupai bebali enda tampak pengudah meda penatai indu ti benama Grace Joanna David nya.

~BETAMPUNG ~

~~~~~~~~~~~~~~~~~~~~~~~~~