آنا والمُشّوه

٢

آثاريني

اطلعـت وهمان ..

الطيبه الزايده ..

تفشل ...

#انا والمشـّوه

______

شمس، فـزيت مثل كـُل يوم بسَ اليوم ، مرعوبه وحلمت حلم...

بشع ، استغفر الله ، بس مو حلم عبالك داخله بفلم رعـب...

والكل الناس ما اعرفهم دياكلـون وينهشون بجسمي واني اصرخ

واريد اشـرد... بس عاجزه ومَا اكـدر اتحرك من مكاني...

لدرجه الدم صار مثل البحر ويمنعني اروح اركض لأهلي....

استغفرت ربي هوايه وكعدت وحتى وهوأس مَا إليه...

بس طردت هاي الافكار والاحلأم واني اسبح سبحه زينه

وبدلت همين ... لبست اليوم رسمي گوله قاط نيلي و قميص ابيض

نازك وترگت شعري مفتوح كما هـو .... لبست كعبي الأ**د ونزلت ... مجرد حلم لا يأثر ولا يقدم... وخصوصاً على شمس

ما تؤمن بهيج احلام وغيرهّن ... (:

لكيت ماما ، دتگلي بيض ريحته الصبح ياعالم ! حشى نعمه الله

حظنتها وبستها من كل وجههاً ( وخري ولج شجاج من صبح!)

تدفعني وتضحك ( مو زين ابوسج يايمه ! ولو ابويه ما يقصر بس زيادة للخير خيرين!) غمزتلها بمگر ، فتحت عيونها وضربتني على ايـدي بقسوة ( اخ يمه!!)

- وغمه ولچ ام السان ! يمه عشنه وشفنه وما شاء الله عليكم هيچ صارت ! لا مستحى ولا خجل من الأهل هيـج بسرعه نذبه للحجي

وما نفگر بي ابداً !!

كالعادة بدت محاظره امـي، كعدت على طاوله المطبخ واني اباوع عليها تحجي وترجع ليورأ ... واحنا جنه هيج وهيج ! وانتن

هيج واخلاق وين راحت ! وامهاتنا قبل مو مثل هسه!

وانتن جيل الفيس هيج ! هيج لو دجاجه ! بالكوه كتمت ضحگتي

واني اباوع عليها تريد طك بوجهي! وكت تحيشش شمس! ):

( ابوس ايدج يمه ! كافي ياكلمه ارجعي لمكانج ! هسه اتريك لو أروح!)

- انجبي هم عوزها تروح بدون ريـوك وهَي عدها فقر دم ! هاچ اكلي ام السان ، يلا

ضحگت واني اگل ، امي ماكو مثلها بهل دنيا كله ، صديقتي

واختي وكؤلشي اعتبرهاً... كعدت ويايه وتريگت بالكوه لان بصراحه اليوم مالي نفس ما اعرف ليش! اجه ابو الخط ودعتها وطلعت ، دخلت لسياره ما لگيت المغروه طلعت مريضه

خطيه هم اليوم ، ولو اني ما اطيقها بس لأزم من ارجع اكول لأمي ونروح سوه..... لأن امي وامها صديقات ( عمو ممكن تأمر شويه على هذا العنوان....!) حاجيته لأبو الخط ، ( بس اخاف نتأخر على دوامج؟) رد ، هزيت راسي بـلا ( لا عمو اليوم اصلاً ما عندي هوايه محاظرات ، وما نتأخر لا تخاف )

- ماشي بنتي ادللي ، وينه العنوان ؟

انطيته العنوان ، وفـر سياره ، ورجع ما تأخرنه هوايه تقريباً نص ساعه وصلنه للمگان المطلوب ... اباوع من چام منطقه شعبيه بأمتياز ... ( اوكف عمو هنا وصلنه!) وگف سياره واجيت انزل

( اجي وياج بنتي؟) طلب مني ، هزيت راسي مبتسمه

( لا ميحتاج ، خمس دقايق واجـي انتظرني هنا ) هز راسه وشكرته ونزلت ... اباوع على الكل انتبه عليه ... خجلت بصراحه وملابسه حجاب هم فأعبالك وجه جديده عليهم... مشيت للمكُان واني اقرأ

القطعه مالته للمحل ( ابو سلام للغذائيه ) جريت رجليه واني امشي للمحل ... محـد بي غير عمو ابو سلام وديصفط بالاغراض...

- صباح الخير عمو ...

دأر عيونه عليه متفأجه ( صباح الخير بعد عمج! شمس مو؟) هزيت رأسي ( اي شمس ! عبالي متعرفني! بس طلعت اني ما انسي ههههه ) ضحك ورد ( مثلج ما ينسي بعد عمچ وبعدين العنده زهراء وخابصه البيت بيچ شمس هيج وشمس هيج ! تريدينه ننسآج ) ابتسمت بخجل ، عقد حاجبه وگمل ( خير بنتي صاير شي! زهراء بيها شي! و) قاطعته

- لا ... لا مابيها شيء اصلاً انـي هنا اجيت علمودها وهي متعرف بيه حتى اني هنا ...

من شفته عقد حاجبه من كلامي ظاهر ما فهم شي ( عمو اني هنا علمود اكولك شيء ، بس لا تفگر اهينك او تصرف محلو بحقك بالع** ، هذا تصرف من خوفي وحرصي على صديقتي واختي زهراء وانت تعرف كُـلش زين احنا صديقات من ايام الابتدائيه

واني لو اتعرف على البنات العراق كوله تبقى زهراء قطعه من روحي... عمو اني اريد اقدم خدمه صغيره الها بس ياريت ما تعرف هيَ ولا تگولها ولا تزعل مني انت وتشيل بالك عليه) فتحت جنطتي وأني اطلع الفلوس ....

مديتهن الـه ، وعيونه صار عليهن رجع نظره اليه ( مشكوره بنتي ما تقصرين واعرفج شنو انتي زين ، ونعم منج ومن اصلچ الطيب بس اني ما اكدر اعذريني!) قاطعته برفض( عمو تعرف كلش زين الدنيا خطره وهيَ حتى ترگت الخط وخطيه تجي بگيه تخيل كميه المشقه والتعب وحتى التحرش وتعب هم عمو هي بنيه واحنا بالعراق تعرف بالعراق والوضع شنو يعني متخاف عليها!! ياعمو فكر زين!) كلامي يمكن اثر عليه واني اشوفه مدنك ... خليت الفلوس بيده باوع عليه ....

- ذني مو هيچ الفلوس ! ذني دين لحد ما يصير عندك وترجعنهن اليه .. بس حالياً اطلب منك ترجع الخط الها بس هالشهرين تعرف وسنه راح تنتهي ، والفلوس شوكت متحب رجعهن اليه ... ها شكلت لا تفشلني حباب!!

ابتسم وهـز راسه ، ( ماشي راح اخذهن بس دين ارجعهن مو تكولين ما كلت!) ضحكت ( شوكت ما يصير عندك رجعهن وها عمو لا تخليني اوكف بالباب على ديني ! انوب اخبص دنيا تعرفني ما انام على ديـن) اخذهن وهو يضحك ... شويه بقيت يمه وسلمته عليه ورحت وهو يحلف يرجعهن ... اليه خلي يرجع بس اهم شي هسه ... راح يرجع الخط لزهراء خطيه تتعذب بالطريق وبيتهم بعيد على جامعه... صعدت بسياره واعتذرت من ابو الخط على تأخير ... وصلني لجامعه لكيت المحاظره الاول مبلشه بالكوه دخلني الاستاذ من بعد اكلت طن رزاله... كعدت بصفها لزهراء

وعيونها تسال وين جنتي ...! بنص المحاظره ما تحملت وكتبلتي بدفترها ( وين جنتي وليش تأخرتي !؟) كتبت الها ( اخذتني نومه ) انطيته الها .... ورجعت عيوني على الاستاذ ... راح تبدا فقره النعاس ياساده .... ):

خلصت المحاظره واخيراً كعدت بالقاعه واني مالي خلك ...

وهاي زهراء استلمتني دك اسئله ... لحد ما بلش وقت محاظره الثانيه .. واني كلبي يوجعني ما اعرف ليش ! والحلم دينعاد كـدام عيوني ... خلصت المحاظره ورحت كعدت على المصطبه شويه وزهراء جيب إكل وشي دافي.. نشربه شويه واجتي صبا .. كعدت تسولف وتضحك وصدوك ريحتها كلها جكايره على كولت زهراء بس .... مالي دخل هيَ( حـُره) انتبهت لابسه شال على رقبتها بس اكو شي قطعه مثل زرگه؟! ومغطيتها بهل شال ما اهتميت صراحه شويه واجت زهراء كلبت خلقتها بسرعه... شربت الكهوه ( مو تنسون باجر الغده؟! اني بسيارتي نطلع منا لبيتنه) حجت صبا

ردت زهراء ( اني ما اروح ، عندي شغل بالبيت وخطار هم راح يجونه) عضيت شفتي الها ( انجبي ترحين ويايه ! ) درت وجهي لصبا( معليج بيها اني اجيبها ويايه انطيني العنوان ونجي بأتگسي ليش تعبين نفسج انتي!) قاطعتني بسرعه ...

- لا شسالفه انـي وياجن بدوام ومن اخلص محاظراتي نطلع سوه ،

هزيت راسي ( ماشي براحتج عود كلت اغير ملابسي عيب من امج اروح مبهذله ههههه) ضحگت ( انتي كلچ على بعضج تنوگلين شمس شتغيرين يمعوده ، اصلاً امي راح تموت حتى تشوفچ انتي وزهراء) ابتسمت الهاً ... ومدري ليش كلبي انقبض...

شويه وراحت صبا وزهراء خبصت دنيا ما اروح وما اروح.، عطت بيها

- اذاً مترحين ويايه ونبي محمد وهياتني حلفت بعد ما احجي وياج!!

اخذت جنطتي وگمت منها ... لحگتني وجرتني من ايدي( لج بابا انتي هم لترحين اخاف عليج! ) قاطعتها بملل( رحمه ربچ زهراء بطلي خوفج شراح يصير مثلاً نموت بيتهم!؟ لج هي مجرد عزيمه نتغده ونرجع وسلام عليكم بس انتي مكبره سالفه)

- لـچ والله گلبي يلعب منها شفتي رگبتها كلها ازرك منعرف وين جانت واصلا منعرف من وين اهلهه؟! وهَي تخوف بصراحه!

قلبت عيوني بضجر ( اخـر مره اكولج اذا مترحين اروح وحـدي بس انسي ! شمس بعد لان تركتيني وحدي يلا باي). عفتها ومشيت

مكبره سالفه ! هوايه عساس مرايحين اني وياها عزايم من قبل!لو بس صبا تسوي سالفه ! استغفرالله لحگتني وتقنع بيه ما اروح بس طنشتها كلياً وزعلت عليها هم ... لان بسهوله تخلت عليه وكالت ماروح والبنيه كل شويه تجينه وتذكرنه عيب من امها...

٣:٣٠ ظهراً

خلص اليوم ورجعت لأهلي شويه متاخره لان اجتنه محاظره رگع... هم لكيت بابا موجود ديتغده ركضت غيرت ملابسي ... واجيت تغديت ويآ ... سالني على دوأمي ومن هالشغلات ...وخلصنه غسلت المواعين وامي سوت چاي ... صبت لبابا اخذته لغرفته وانطيته اله... بوسته من خده باوعيلي متفأجه ( فلوس ماكو ... ما عندي) ضحكت

- افآ عليك ابوسك يعني اني بس على الفلوس ما اتوقعها منك ابو رضا! زعليت ...

قوست شفايفي مثل الاطفال ضحك ورد ( مو اعرف اسوالفج انـي حفظتنهن ) بوسني من ايـدي ... ( زعلت وما تراضيني هل بوسه )

دلعت عليه ... رد ( عيوني الج كولي شنو يرضيج كم شمس عندي ؟) فگرت وجاوبته ( امممم !... وحـده )

- اي ... كولي شنو تريد شمسي حتى ارضيها؟ اجيب الدنيا لعيونها هاي الصفر ... بس تأشر '

حسيت عصرني گلبي ... كعدت بصفه وحظتنه بقوه...

( سلامتك بابا اريدك سالم ..... وبس ) بادلني الحظن لص*ره ... تنفست عطره الطيب

وانـي احـس بروحي تريد تطلع اكـو شي جواتي ينهش بروحي

مثل ......الودأع ... هزيت راسي طارده هاي الافكار من بالي...

لشويه كمت لغرفتي... تصفحت على النت ورأجعت محاظراتي

وكل دقيقه تتصل زهراء... اخر شي رفضتها وقفلته ونمت ...

ما كعدت الا للعشه ... هم تعشيت بالكوه واني احـس مرارة بكلبي ... خلص اليوم بسرعه واني احظر ملابسي لباجر...

طلعتهن وخليتهم على صفحه... ولفيت راسي ونمت...

صباحاً ....

كعدت الصبح وسبحت لحگت ولبست اليوم اخضر ...

تجهزت ونزلت بسرعه لأن متاخره.... حتى ما اتريكت بس صبحت على ماما وطلعت اركض على ابو الخط .. هم سلمت على المغروه ... خطيه وجهها مبين عليه المرض... وصلنه لجامعه ...

وشفت زهراء ... اجتي عليه ( كبر طمج!! ليش متجاوبين وانوب تفصلين بوجهي الخط!!) صرخت بيه

عفتها ورحت لزمتني من ايدي ( داحجي وياج وجع!! )

تن*دت برود( مالي خلك وخري مني) اجيت امشي... بس صرخت ورايه ( اروح وياج ! الله ياخذج خبله اروووح) ضحكت ورجعت عليها حظنتها وبوستها ( اي هيج ياحلوة صيري حبابه! وهسه وكت المحاظره انوب الريوك على حسابي طبعاً ) جريتها وهي تضحك وتكول ( الله بلاني بخبله )

هالبنيه ذكرت سابقاً اني اعشقها!

خلصت المحاظرات على خيـر وضحك ويه الطلاب اليوم غير

متت ضحك ... وتوتنست هوايه وغيرت جـٌو هم... وحتى تغدينه

بنص الكفتريا وصرنه قسمين والأكل ضل بكل مكان... مو هوايه ... وصبا ما شفتها اليوم ! بس من اجينه نطلع للبيت ... اجتي علينه بسيارتها ... وزهراء تخاف اضحك عليها واخوف بيها هم

وهي تكول كلبي يلعب... جبانه ومراح تتغير): وصلنه على بيتها بس تفاجات واني اشوف شقه! مو مهم يمكن ما عدهم بيت!

نزلت اني وهراء.... ودخلنا الشقه .....!

______

يتُبع غداً

اعتذر عن الاخطاء الاملائيه

وبرأيكم شنو راح يصير بشقه؟!

لا تنسون تصويت وتعليق??