“S-SANDRICK?” gulat na anas ni Princess nang tuluyang naging malinaw ang kaniyang mga mata. Medyo nasilaw pa kasi siya sa ilaw ng banyo.
Bahagya siyang napapikit nang pumatak sa mukha niya ang butil ng mga tubig mula sa buhok ng binata. Kasabay din niyon ang pag-alalay sa kaniya ng binata patayo. Pagharap niya rito ay may suot na itong roba na dinampot nito sa may towel rack saka siya nilagpasan.
“S-Sandrick? I-ikaw ba talaga ‘yan?” habol niya rito na nagpahinto sa kaniya.
Pagharap nito sa kaniya ay hindi nga siya niloloko ng kaniyang mga paningin. Ang lalaking nasa harapan niya ay ang lalaking nagpakilalang Mac at ang siyang taong pinakasalan niya ay walang iba kundi si Sandrick Ramal.
Ang taong kaytagal na niyang hindi nakikita. Ang taong palagi na lang dumadalaw sa kaniyang isipan.
