PHOENIX GONZALES
Pumunta ako isang bar para aliwin ang sarili ko. Sa bar sana ni Gino ako pupunta pero naisip ko na baka iparating niya lamang iyon kay Jake kaya sa iba na lamang ako tumungo.
Iyong may karaoke room ang pinuntahan ko. Okupado ko ang isang kwarto at naglalasing mag-isa habang walang tigil din akong kumakanta.
Hindi ko na kasi alam ang gagawin ko. Mag-iisang oras na ako rito at para na akong mababaliw sa pag-iisip kung paano ako makakatakas kay MJ. Mas naging mahirap pa sa akin ang lahat lalo na ngayong pati si Hanna at Kim ay ginagawa niyang pang-blackmail sa akin.
Nalaman niya kasing kay Kim ako nagpapatulong magpahanap ng apartment. At nagbanta siya na kapag itinuloy ko ang balak kong pag-alis at paglipat, pati ang dalawa kong kaibigan ay hindi niya raw sasantuhin.
