Sapatos
Hindi ko maialis ang tingin ko sa kanya. Nakakahalina siyang pagmasdan. Parang isang prinsipe na handang makipaglaban maipagtanggol lamang ang minamahal.
Nabasa kaya niya ang aking isipan? Alam kaya niyang papalabas na ako ng hotel na ito?
Hindi na ako nakapagsalita pa dahil hinila na ako ni Jery. Hawak niya ang palapulsuhan ko at isinakay sa elevator. Sumagi sa isip ko noong nasa opisina kami at hinila rin niya ako para makabalik ng ospital. Walang pinag-iba maliban sa oras at lugar.
Nilingon ko siya at naamoy ang pabangong panlalaki na nais kong langhaping lahat. Kinilabutan akong bigla. Nasa mukha niya ang pagkairita. Hindi siya tumitingin sa akin ngunit mahigpit pa rin ang hawak niya. Gusto kong magtanong ngunit pinigilan ko ang aking sarili.
Nang makalabas kami ng elevat
