Prologue
"Mom..Dad.."
Nakayuko akong pumasok sa opisina nina Mom at Dad at naratnan ko silang pareho na abala sa kanilang mga ginagawa. Huminga ako nang malalim nang sabay silang napalingon sa akin. Hindi ko maipaliwanag ang kabang idinulot no'n sa akin.
Kaya ko 'to. Payt, Kieyrstine, payt!
Kagat-labi at nakayuko akong nagtungo papalapit sa table nila. Tinanggal ni Mom ang glasses na suot niya at nakangiting nilingon ako samantalang si Dad ay sinulyapan lang ako sandali at ipinagpatuloy muli ang ginagawa.
Hayss…
"What do you need baby? Is there anything wrong?" kunot-noong tanong ni Mom sa akin at umiling naman agad ako. Inakay ako ni Mom paupo sa tabi niya at hinawakan ako sa magkabilang kamay. Sinulyapan ko muli si Dad pero abala talaga siya sa ginagawa niya.
Hindi ba siya pwedeng makinig sa akin kahit sandali lang? Napanguso ako sa naisip.
"Anak?" tawag pansin sa akin ni Mom nang mapansing hindi ako sumasagot sa kaniya. Kitang-kita sa mga mata niya ang pagtataka dahil siguro sa seryosong mukha na ipinapakita ko sa kanila.
"Mom, A-alam ko na po kung ano ang kursong kukunin ko sa pasukan." Sabi ko at agad na napansin ang paglingon ni Dad sa gawi namin. Muli na naman akong kinabahan kaya nilunok ko na lahat ng laway na mayroon ang bibig ko.
"Really?" Tuwang-tuwa na sabi ni Mom sa akin. Kita sa mata niya ang tuwa at excitement dahil paulit-ulit na niya akong tinatanong tungkol dito pero hindi ako sumasagot. "What course would you like to take up? Education? Business? Medicine?" Sunod-sunod niyang tanong sa akin at napanguso naman ako nang marinig na wala sa pinagpipilian niya ang gusto ko.
"N-no Mom.. G-Gusto ko pong maging police detective kagaya ninyo ni Dad.."
©MswRIGHTer2020