Napa-rami kasi talaga kami ng kain nung tanghalian kaya iyong dala naming cake at mga prutas ni Haden ay hindi na naihain pa. Ang buong akala ko ay binawasan na ni Tatay Rene at Inang iyong cake kasi nung tanghali ko pa naman napapansin na para bang takam na takam silang dalawa roon sa blackforest cake na binili ni Haden.
Ganoon na lang ang naging pagtataka naming dalawa dahil nang inilabas ni Inang mula sa box iyong cake para sa dessert ngayong dinner ay hindi pa iyon nababawasan. Buong-buo pa ito, maski iyong mga cherry sa ibabaw ay naroon pa rin lahat.
"Matitikman ko na rin ito sa wakas. Ang tagal ko nang pangarap na matikman ito. Kaya lang lampas limang daan ang presyo nito hindi ba? Masiyadong mahal. Ilang kilong bigas na ang katapat kaya tuwing nadaraan ako sa bakeshop ay sinisil
