من العالم الأخر

الجزء الثاني

شوفت خيالات او اطياف لاشخاص او ح*****ت بصراحة مش قادر احدد بس كل اللى كنت واثق منه ان اللى شايفه ده كان مش طبيعى ومش بشر طبيعين زينا ولا حتى حيوانا حقيقية

كانت اطياف حسيت بوجودهم قدام عينى برعب خ*ف قلبى من مكانه مش فاهم ايه اللى بيحصل

لكن كل اللى حاولت اعمله

انى اضغط تانى بكل قوتى على دواسة البنزين وامسك دري**يون العربية وانا من جوايا بدعى ان العربية تطير مش بس تمشى

علشان كل ما صوت البنزين يعلى كانت الاطياف بتوضح قدامى عنيا اكتر والخوف والرعب بيزيد اكتر واكتر

وفى لحظة حسيت ان فيه قنبلة انفجرت من تحت العربية كانت سبب فى ان العربية تطير من مكانها لكن من كرم ربنا ان العربيه بعد ما طلعت لفوق بقوة الاندفاع بتاع الانفجار اللى مش عارف مص*ره وقعت على جنبها حسيت ب الاطياف السوداء اللى زاد وضوحها قدام عينى قبل ما تتقفل لوقت مش عارف احدد هو كان اد ايه

كانت بتقرب عليا وكل ما بتقرب وبتظهر واضحكة اكتر كانت عنيا بتتقفل من شدة وقوة السقوط والارتطام اللى حصلى

غبت عن الوعى ومحستش بالمده

لكن لما فتحت عينى كانت كل حاجه هادية حتى انا نفسى كنت هادى جدا وكأن مفيش حاجة حصلت كنت بحاول اخرج من العربية ومعرفش ايه الليونة اللى كانت فى جسمى دى كأنى بقيت مطاط فجأة شبه الثعابين كده بخرج بمنتهى السهولة حتى راسى اللى اتخبطت خبطة قولت انها هتنسينى الذاكرة ولا حتى هتعملى اعاقة من قوتها اتفجئت انى مش حاسس فيها ب اي الم

الاطياف اللى كانت قدامى اختفيت

الطريق اللى اتشديت ليه وانواره كانت بتظهر وتختفى ظهر قدامى بوضوح وهدوء وكأن مكانش فيه اى حاجة غريبة بتحصل فى المكان ده

فوقت من اللى حصل وجمعت نفسى وقعدت سندت ضهرى على العربية بعد ما طلعت من شباكها بسهولة لكن كنت حاسس بسلام داخلى مش متخيل حتى ايه سببه برغم اللى فات عليا فى الشوية اللى فاتو كان اصعب من انه يمر مرور الكرام كده

لكن بعد اللى حصل ده من قلق وهدوء انا بقيت شخص تانى خالص بقيت الشخص اللى قولتلكم عليه فى الاول الشخص اللى ذاكرته وعنيه ونظرته لاى حاجة بقيت اقوى اضعاف اضعاف اى انسان طبيعى

مكنتش اعرف ان اللى حصل ليا ده هو بداية دخولى لعالم الجن من اوسع ابوابه مش مجرد دخول وبس

انا انغمست فى العالم ده وكأن اللى حصل كان ده الهدف منه

انى اكون جزء من عالم خفى مش اى حد بيعرف يكون موجود فيه

واحدة واحدة كانت بتختفى من قدام عنيا الخطوات اللى مريت عليا من بداية ما مشيت فى الطريق ده لحد اللحظة اللى قعدت سندت فيها على العربية

وكأن ده بيحصل بفعل فاعل انه يسحب من عقلي ومن قدام عينى كل حاجة شوفتها وحصلتلى الوقت ده

مش فاكر ركبت عربيتى ازاى ورجعت لاصحابى ازاى ورحلتى كمان خلصت على ايه

مش فاكر اذا كنت حكيت لحد تفاصيل اللى حصل ولا حكيت لهم بس انى عملت حادثة مجرد حادثة وكانت الحكاية لتفسير اللى حصل فى العربية اللى كان لازم ارجعها زى ما كانت لكن صاحبى بصراحة رفض وكان كلامه انه المهم انى رجعت بخير وياريت كنت سمعت الكلام ومطلعتش للمكان اللى انت كنت م**م تروحله من البداية ده

كل الكلام اللى فات ده يمكن مالهوش لزوم غير بس علشان تعرفوا ايه سبب اللى انا وصلت له

خلينا نسيبنا منه ونرجع تانى لكوباية القهوة بتاعتى ماهو انا خلاص مبقيتش بعمل اي حاجة فى حياتى غير انى بشرب القهوة وبس خاصة بعد ما بقى النوم ضيف غير مرغوب فيه بالنسبالي

ايوة دى حقيقة انا من بعد الحادثة دى النوم بقى صعب جدا مش عارف ليه

حياتى كلها حصلها تحديد اقامة

وكأنى توهت فيها جوة الكتب والمقالات اللى بتتكلم عن الجن والعفاريت والماورائيات واى حاجة مالهاش دعوة غير بالخوارق وما وراء الطبيعة

كانت الكتب دى هى طريقى الوحيد علشان اقدر الاقى فيها الكلام اللى يصبرنى على الحالات اللى لغبطت حياتى وكل التغيير اللى حصل

والحالات الغريبة اللى بقيت بتحصل ليا

انا بقيت بتنبأ بحاجات قبل ما تحصل

بقيت بحلم ب اشخاص بمجرد ما بشوفهم بعرف انهم فى عداد الاموات

ولأن اللى بيحصلى كان مش طبيعى كان لازم ادور على الحاجات والاسباب اللى بتبعد عن الطبيعى والمنطق والعقل

وعلشان احلامى بقيت مخيفة بالنسبالى وبحس انى بيها بظلم الشخص اللى بشوفه فى الحلم وببقى عارف ان دى علامة على موته برغم انى ماليش يد ف اللى بيحصل بس بقيت بخاف انام بسبب الاحلام دى وعلشان كده اوقات كنت بوصل لليومين والثلاثة من غير نوم نهائيا وكانت الحاجة الوحيدة اللى بتخلينى اقدر اواصل ده هى كوباية القهوة الساده اللى بقيت جزء من ايدي طول اليوم

كل اللى يقابلنى لازم يلاقى فى ايدي كوباية القهوة

وكأنها علامة مسجلة

وبرغم ان اللى مريت بيه فيه حاجات خارقة للطبيعة الا انى لحد دلوقتى مكنتش قادر اتأقلم عليه حتى مع الهبات اللى اكتبسبتها كنت حاسس انى مش مرتاح وانى مش عارف اعيش بالمميزات دى

ما علينا

للاسف عندى مقابلة النهاردة بليل من المقابلات التقيلة على قلبى يمكن مش عايز الوقت يمر علشان متجيش الساعه 9 واضطر اروح المقابلة دى

ولأن الوقت لسة بدرى جدا على المقابلة واحنا فى عز الشمس والزحمة والحر

جو قاتل بصراحة لكن للاسف مضطر افضل فى الشارع من دلوقتى لحد بليل

طبعا بالنسبالكم حاجة غريبة ليه مضطر اقعد في الشارع اليوم كله ومرجعش بيتى ارتاح من كل الحاجات اللى انا مضايق منها دى

هقولكم ليه ..لأن البيت بتاعى بقى مش من حقى انى اتواجد فيه فى الفترة بتاعت من بعد الظهر

وده امر اتفرض عليا لحد ما اخلص المقابلة اللى للاسف كمان اتفرضت عليا وكان لازم اخلصها زى م اتطلب مني انى اخلصها

مش عارف بقى اقولكم اللى فرضها عليا

عفريت ولا مارد ولا مسخ ولا حتى قاتل بيتنقل بين العوالم البشرية والخفيه

للاسف انا معنديش شاى معلومة عن صاحب المقابلة المفروضة ولا اعرف طبيعة الكائن اللى دعانى للمقابلة دى

كل اللى اعرفه انى مش مطلوب مني اتواجد فى بيتى لحد م اخلص المقا**ه بتاعتى معاه

كل اللى اعرفه انى صحيت من نومى لقيت ظرف اسود جواه جواب بنفس لون الظرف ومكتوب عليه بالدم او لون الدم مش قادر احدد

مكتوب فيه ميعاد المقابلة والمكان

ومكتوب انى مش مسموح ليا اتواجد في البيت بمجرد طلوع الشمس والا اعتبر كل سكان البيت اموات من لحظة دخوله له فى الوقت المحظور

وكان فى نهاية الرسالة

رسمة غريبة مش فاهم الطلاسم اللى مكتوبة جواها لكن انا عارف ان الرسمة دى كانت موجودة فى كتاب من الكتب اللى قريتها عن الجن والماورائيات

وبكده اتأكدت ان صاحب الرسالة وراه حاجه مش طبيعية

يلا هستعجل ليه انا كده كده مضطر افضل فى الشارع اليوم كله

اروح بقى ادور على مكان تانى يكون قريب من مكان المقابلة ويكون بيعمل القهوة حلو

انا عارف فيه فى المنطقة دى مكان كويس بس انا ناسي اسمه الف شوية اكيد لما اقرا اسامى الكافيهات هفتكره