CHAPTER 10
Taglay ng maamong mukha na iyon ang napakabuti niyang puso. Ipinangako ko sa aking sarili na hinding-hindi ko siya bibiguin. Kung wala pa mamaya si Jacko, magtatanan kami. Hindi kami magugutom sa aking salapi. Ito na lang ang tanging paraan para maging kami habang buhay. Kung kaya naming magtago habang-buhay kay Jacko gagawin namin ang mahalaga ay kami ang magsasama. Alam kong mapapagod din si Jacko sa paghahanap. Makakatagpo siya ng taong magmamahal muli sa kanya. Sa ngayon, hindi ako ang taong iyon. Hindi ko kaya ang kanyang pagmamalupit at pagsakal sa akin.
Pagdating ko sa bahay ay agad ko nang inipon ang aking mga damit, alahas at salapi. Binuksan ko ang aking mga malalaking bagahe. Mabilis kong inilagay roon ang aking mga kayamanan. Hindi ko na hihintayin pa si Jacko.
