روايه الصافي الجزء الاول

ﻗﻮﻣﻲ ﻳﺎ ﺇﻳﻤﺎﻥ ﺧﻠﻴﻨﺎ ﻧﻠﺤﻖ ﺍﻟﺒﺺ .. ﺍﻟﻮﻛﺖ ﺍﺗﺎﺧﺮ ﻛﻠﻮ ﻛﻠﻮ .. ﺳﺮﻳﻊ ﺍﺟﻬﺰﻱ ﻟﺒﺴﻲ ﺍﻟﻮﻟﺪ ﺩﻩ .. ﺍﻧﺎ ﻣﻦ ﺻﻼﺓ ﺍﻟﺼﺒﺢ ﻗﺎﻋﺪ ﻣﻨﺘﻈﺮﻛﻢ .. ﺑﺲ ﺍﺑﻴﺖ ﺍﺻﺤﻴﻚ ﺍﺯﻋﺠﻚ .. ﻗﺎﻟﺖ ﻟﻴﻬﻮ ﻳﺎ ﺍﻻﻣﻴﻦ .. ﺍﺯﻋﺎﺝ ﺷﻨﻮ؟ ﻛﺎﻥ ﺗﺼﺤﻴﻨﻲ ﻋﻠﻲ ﺍﻻﻗﻞ ﺍﺻﻠﻲ ﻓﻲ ﺍﻟﻮﻛﺖ .. ﺍﻧﺎ ﻫﺴﻲ ﻋﺎﻳﺰﺓ ﺍﺻﻠﻲ ﻗﺒﻞ ﺍﻋﻤﻞ ﺍﻱ ﺣﺎﺟﺔ .. ﺻﻼﺗﻲ ﻋﻨﺪﻱ ﺍﻫﻢ ﻣﻦ ﺳﻔﺮﻙ .. ﻭﻭﻟﺪﻙ ﻻﻫﺴﻊ ﻧﺎﻳﻢ .. ﺍﻟﺒﺎﺭﺡ ﺳﺎﻫﺮ ﺑﻲ ﺍﺻﻠﻮ ﺍﺑﺎ ﻳﻨﻮﻡ ﺑﺎﻟﻬﻴﻦ .. ﻟﻜﻦ ﻣﺎﻣﺸﻜﻠﺔ ﺍﻧﺎ ﻫﺪﻭﻣﻲ ﻣﺴﺘﻔﺎﻫﻦ ﻓﻲ ﺍﻟﺸﻨﻄﺔ .. ﻭﺧﻼﺱ ﻣﺎ ﺑﻨﺎﺧﺪ ﻭﻛﺖ .. ﻣﺴﻜﺖ ﻃﺮﻑ ﺍﻟﻤﻼﻳﺔ ﺍﻟﻤﺘﻐﻄﻲ ﺑﻴﻬﺎ ﻭﻟﺪﻫﺎ ﻭﻛﺸﻔﺘﻬﺎ .. ﻋﺸﺎﻥ ﺗﺼﺤﻴﻬﻮ .. ﺍﻻﻣﻴﻦ . ﻗﺎﻝ ﻟﻴﻬﺎ ﺑﺮﺍﺣﺔ ﻳﺎ ﺍﻳﻤﺎﻥ .. ﻣﺎﺗﺰﻋﺰﻋﻲ ﺍﻟﻮﻟﺪ ﺗﻄﻴﺮﻱ ﻗﻠﺒﻮ .. ﺍﻟﻮﻃﻪ ﻛﺎﻧﺖ ﺻﺒﺎﺡ . ﻭﻛﺖ ﺍﻻﻣﻴﻦ ﻭﺩ ﺍﺏ ﻛﺮﺍﻉ .. ﻛﺎﻥ ﺑﺘﻜﻠﻢ ﻣﻊ ﺯﻭﺟﺘﻮ ﺍﻳﻤﺎﻥ .. ﻋﺸﺎﻥ ﻫﻢ ﻣﺴﺎﻓﺮﻳﻦ ﻋﻄﺒﺮﺓ .. ﺍﻟﻨﺎﺱ ﺩﻳﻞ ﺍﻫﻠﻬﻢ ﺍﺻﻼ ﻣﻦ ﻣﻨﻄﻘﺔ ﻭﺍﻗﻌﺔ ﺑﻴﻦ ﺷﻨﺪﻱ ﻭﺍﻟﺪﺍﻣﺮ .. ﺑﺎﻟﺨﻂ ﺍﻟﺸﺮﻗﻲ .. ﻭﺍﻻﻣﻴﻦ ﻛﺎﻥ ﺷﻐﺎﻝ ﻓﻲ ﺍﻟﺨﺪﺍﺭ .. ﻋﻨﺪﻭ ﻃﺮﺑﻴﺰﺓ ﺧﺪﺍﺭ ﻓﻲ ﺍﻟﺤﻠﺔ .. ﻟﻜﻦ ﺍﻟﺒﻠﺪ ﺑﻘﺖ ﻻﻓﻴﻬﺎ ﺑﻴﻊ ﻻﻓﻴﻬﺎ ﺷﺮﺍﺀ .. ﻭﺍﻟﻨﺎﺱ ﻛﻠﻬﺎ ﻫﺠﺖ ﺧﻠﺖ ﺍﻟﺒﻠﺪ .. ﺍﻟﻤﺸﻰ ﺍﻟﺨﺮﻃﻮﻡ ﻭﺍﻟﻤﺸﻰ ﺷﻨﺪﻱ ﻭﺍﻟﻤﺸﻰ ﻋﻄﺒﺮﺓ .. ﺍﻟﻨﺎﺱ ﻛﻠﻬﺎ ﻧﺰﺣﺖ ﻟﻠﻤﺪﻥ .. ﻭﺍﻻﺭﺍﺿﻲ ﺍﻟﺰﺭﺍﻋﻴﺔ ﻓﻲ ﺟﺮﻭﻑ ﺍﻟﻨﻴﻞ ﺑﻘﺖ ﺑﻮﺭ .. ﺗﺮﺍﺑﺎ " ﻳﺎﺑﺲ .. ﺑﻌﺪ ﻣﺎﻛﺎﻧﺖ ﺧﻴﺮﺍﺗﻬﺎ ﺗﻤﻼ ﺍﻟﻤﺪﻥ .. ﺑﻘﺖ ﺍﻟﻤﺪﻥ ﺗﺴﺘﻮﺭﺩ ﺍﻟﺨﺪﺍﺭ ﻣﻦ ﺍﻟﺨﺎﺭﺝ .. ﻭﺍﻟﺴﻮﺩﺍﻥ ﺍﺳﻤﻮ ﺳﻠﺔ ﻏﺬﺍﺀ ﺍﻟﻌﺎﻟﻢ .. ﺷﻮﻑ ﺍﻟﻌﺠﺐ .. ﻭﺍﻟﺴﺒﺐ ﻫﻮ ﺍﻟﻤﻀﺎﻳﻘﺔ ﺍﻟﺒﻼﻗﻮﻫﺎ ﺍﻟﻤﺰﺍﺭﻋﻴﻦ .. ﻣﻦ ﺍﻟﻤﺤﻠﻴﺎﺕ ﻭﻣﺤﺼﻮﻻﺗﻬﻢ ﺑﺘﺮﻭﺡ ﻛﺴﻮﺭ ﻭﺑﻮﺍﻗﻲ ﻃﻠﺒﻴﺎﺕ ﻭﺿﺮﺍﻳﺐ ﻭﺯﻛﻮﺍﺕ ﻭﻗﺒﺎﻧﺎﺕ ﻭﺗﺤﺼﻴﻞ ﻭﻭﻭ .. ﻭﻛﺘﻴﺮ ﺑﻌﺪ ﺍﻟﻤﺰﺍﺭﻉ ﺑﻌﺪ ﻳﺤﺼﺪ . ﻗﺪ ﻳﻜﻮﻥ ﻣﻄﺎﻟﺐ .. ﺑﺪﻝ ﺍﻟﺮﺑﺢ .. ﺍﻻﻣﻴﻦ ﻛﺎﻥ ﺷﻐﺎﻝ ﺯﺭﺍﻋﺔ ﻓﻲ ﺍﺭﺑﻌﺔ ﻋﻴﺪﺍﻥ ﺣﻘﺎﺕ ﺍﺑﻮﻫﻮ .. ﻭﻧﻔﺲ ﺍﻟﺸﻲ .. ﻣﺎﻻﻗﻰ ﻏﻴﺮ ﺍﻟﺪﻳﻮﻥ ﻭﺍﻟﻤﻀﺎﻳﻘﺔ .. ﻭﻧﺎﺱ ﺍﻟﺪﻛﺎﻛﻴﻦ ﺳﺎﻛﻨﻮ ﺳﻚ ﻓﻲ ﺍﻟﺪﻳﻮﻥ .. ﻭﻛﻞ ﻣﺎﻳﺴﺪﺩ ﺣﺘﺔ ﺗﺘﻔﺘﺢ ﻃﺎﻗﺔ ﺗﺎﻧﻴﺔ .. ﻭﺍﻟﺤﺎﻟﺔ ﺩﻱ ﻫﻮ ﻋﻨﺪﻭ ﻓﺪ ﻭﻟﺪ .. ﻗﺮﺭ ﺍﻧﻮ ﻳﺴﺎﻓﺮ ﻋﻄﺒﺮﺓ .. ﻭﻳﺴﻮﻗﻮ ﻣﺮﺗﻮ ﻭﻭﻟﺪﻭ ﺍﻟﻮﺣﻴﺪ .. ﺍﻻﺳﻤﻮ ﺍﻟﺼﺎﻓﻲ 7 ﺳﻨﻮﺍﺕ .. ﻳﺴﻮﻗﻬﻢ ﻭﻳﻤﺮﻕ ﻣﻦ ﺍﻟﺤﺎﻟﺔ ﺍﻟﻬﻮ ﻓﻴﻬﺎ ﺩﻱ .. ﺍﻟﻜﻼﻡ ﺩﻩ ﻛﺎﻥ ﻓﻲ ﺑﺪﺍﻳﺎﺕ ﺳﻨﺔ 95 ﺍﻳﺎﻡ ﺍﻟﻌﻴﺪ ﺍﻟﻔﺎﺕ .. ﺍﻻﻣﻴﻦ ﻋﻨﺪﻭ ﻭﺍﺣﺪ ﻣﻦ ﺍﻭﻻﺩ ﺍﻟﺤﻠﺔ .. ﻣﺎ ﺑﻘﺎﻟﻴﻬﻮ ﻟﻜﻦ ﺑﻴﻨﺎﺗﻬﻢ ﺧﻮﺓ ﺳﻨﻴﻦ .. ﺍﺳﻤﻮ ﻋﻄﻴﻪ .. ﺍﻟﺰﻭﻝ ﺩﻩ ﺷﻐﺎﻝ ﻓﻲ ﻋﻄﺒﺮﺓ .. ﻋﻨﺪﻭ ﺩﻛﺎﻥ ﺑﺘﺎﻉ ﺧﺮﺩﻭﺍﺕ ﻓﻲ ﺍﻟﺴﻮﻕ .. ﺍﻫﺎ ﻋﻄﻴﺔ ﺩﻩ ﻛﺎﻥ ﺟﺎﺀ ﺍﻟﺤﻠﺔ ﺍﻳﺎﻡ ﺍﻟﻌﻴﺪ ﻭﻻﻗﻰ ﺍﻻﻣﻴﻦ .. ﻗﺎﻝ ﻟﻴﻬﻮ ﻳﺎ ﺍﻻﻣﻴﻦ ﻳﺎﺧﻲ ﺗﻌﺎﻝ ﻟﻴﻨﺎ ﻓﻲ ﻋﻄﺒﺮﺓ .. ﺍﻟﺸﻐﻞ ﻓﺎﺗﺢ ﻭﺍﻟﺒﻠﺪ ﺑﻲ ﺧﻴﺮﺍ .. ﺍﺳﻤﻬﺎ ﻋﻄﺒﺮﺓ ﺍﻡ ﺩﺍﻻﺕ .. ﺭﺑﺎﻳﺔ ﺍﻟﻴﺘﺎﻣﻰ ﻭﻣﺮﻛﺰ ﺍﻟﺨﻴﺮﺍﺕ .. ﺗﻌﺎﻝ ﻟﻲ ﻫﻨﺎﻙ .. ﺍﻧﺎ ﺳﺎﻛﻦ ﻓﻲ ﺑﻴﺖ ﻛﺒﻴﺮ .. ﻧﺼﻮ ﻓﺎﺿﻲ ﺑﻔﺼﻞ ﻟﻴﻚ ﺟﺰﺀ ﺗﺴﻜﻦ ﻓﻴﻬﻮ ﻻﻣﻦ ﺗﺪﺑﺮ ﺣﺎﻟﻚ .. ﻭﺍﻟﺸﻐﻞ ﻓﺎﺗﺢ ﻣﺤﻞ ﺩﺍﻳﺮ ﺗﺸﺘﻐﻞ ﻓﻲ ﺍﻟﺴﻜﺔ ﺣﺪﻳﺪ .. ﻓﻲ ﻣﺼﻨﻊ ﺍﻻﺳﻤﻨﺖ .. ﻓﻲ ﺍﻟﺴﻮﻕ .. ﻛﺎﻥ ﺩﺍﻳﺮ ﺗﻌﻤﻞ ﻃﺮﺑﻴﺰﺓ ﺧﺪﺍﺭ ﺫﺍﺗﻮ ﻣﻤﻜﻦ .. ﻧﺤﻦ ﻣﻌﺎﺭﻓﻨﺎ ﺭﺍﻗﺪﺓ .. ﻋﻄﻴﻪ ﺍﺻﻐﺮ ﻣﻦ ﺍﻻﻣﻴﻦ ﺑﻲ ﺳﻨﺘﻴﻦ ﺗﻼﺗﺔ .. ﻭﻣﺎ ﻣﺘﺰﻭﺝ ﻟﻜﻦ ﺧﺎﻃﺐ ﻭﺍﺣﺪﻩ ﻣﻦ ﺑﻨﺎﺕ ﺍﻟﺤﻠﺔ .. ﻭﻛﺎﻧﺖ ﺑﻴﻨﻮ ﻭﺑﻴﻦ ﺍﻻﻣﻴﻦ ﻣﻮﺩﺓ ﻣﻦ ﺯﻣﺎﻥ .. ﻭﻋﻄﻴﺔ ﺷﻜﻠﻮ ﺩﺍﻳﺮ ﻳﺨﺪﻡ ﺍﻻﻣﻴﻦ ﻭﻳﺴﺎﻋﺪﻭ ﺑﻲ ﺍﻱ ﻃﺮﻳﻘﺔ .. ﺍﻫﺎ ﺍﻟﻠﻴﻠﺔ ﻳﻮﻡ ﺍﻟﺴﻔﺮ .. ﻭﻃﺒﻌﺎ ﻋﻄﻴﺔ ﻭﺻﻒ ﻟﻼﻣﻴﻦ ﺍﻟﺤﻲ ﺍﻟﺴﺎﻛﻦ ﻓﻴﻬﻮ ﻓﻲ ﻋﻄﺒﺮﺓ .. ﻭﻗﺎﻝ ﻟﻴﻬﻮ ﺗﺴﺄﻝ ﻓﻲ ﺍﻟﺤﻲ ﺍﻟﻔﻼﻧﻲ ﺍﻟﺸﺎﺭﻉ ﺍﻟﻔﻼﻧﻲ .. ﺟﻤﺐ ﺑﻘﺎﻟﺔ ﺍﺳﻤﻬﺎ ﺑﻘﺎﻟﺔ ﻓﻼﻥ .. ﺍﻫﺎ ﻳﺎﺯﻭﻝ ﺍﻳﻤﺎﻥ ﺭﺗﺒﺖ ﻭﻟﺒﺴﺖ ﺍﻟﺘﻮﺏ ﺍﻟﻤﻮﺧﻤﺞ .. ﻭﺍﻟﻜﻌﺐ ﺍﻟﻌﺎﻟﻲ .. ﻭﺩﺭﻋﺖ ﺷﻨﻄﺘﻬﺎ ﻓﻲ ﻛﺘﻔﻬﺎ .. ﻭﺳﺎﻗﺖ ﻭﻟﺪﻫﺎ ﺍﻟﺼﺎﻓﻲ ﻣﻦ ﻳﺪﻭ .. ﻭﺍﻟﺼﺎﻓﻲ ﻳﺴﺄﻝ .. ﺍﺑﻮﻱ ﺻﺢ ﻧﺤﻦ ﻣﺎﺷﻴﻦ ﻋﻄﺒﺮﺓ ؟ ﺍﺑﻮﻱ ﻋﻄﺒﺮﺓ ﻓﻴﻬﺎ ﺑﻴﺒﺴﻲ؟ ﺍﺑﻮﻱ ﻗﺎﻟﻮ ﻓﻴﻬﺎ ﺑﺎﺳﻄﺔ ﺻﺢ؟ .. ﺍﺑﻮﻱ ﺍﻧﺖ ﺍﻟﺒﺎﺳﻄﺔ ﺩﻱ ﺑﻌﻤﻠﻮﻫﺎ ﺑﺸﻨﻮ ؟ ﻭﻛﻞ ﻣﺮﺓ ﻳﻔﻚ ﻳﺪ ﺍﻣﻮ ﻭﻳﻘﻴﻒ ﻳﺼﻠﺢ ﺷﺒﻄﻮ .. ﻭﻳﺠﺮﻱ ﻳﺤﺼﻠﻬﺎ .. ﻭﺗﺎﻧﻲ ﻳﺴﺄﻝ .. ﻭﺍﻻﻣﻴﻦ ﺷﺎﻳﻞ ﺍﻟﺸﻨﻄﺔ ﺍﻟﻜﺒﻴﺮﺓ ﺍﻟﻔﻴﻬﺎ ﺍﻟﻤﻼﺑﺲ ﻭﺍﻟﻤﺴﺘﻠﺰﻣﺎﺕ .. ﻭﻣﺎﺷﻲ ﻣﺎﺷﻐﺎﻝ ﺑﺎﻻﺳﺌﻠﺔ ﺍﻟﺒﻮﺟﻬﺎ ﺍﻟﺼﺎﻓﻲ .. ﻭﻻﺧﺎﺗﻲ ﺑﺎﻟﻮ ﻟﻴﻬﺎ .. ﺍﻳﻤﺎﻥ ﻗﺎﻟﺖ ﻟﻴﻬﻮ ﻳﻌﻨﻲ ﻳﺎ ﺍﻻﻣﻴﻦ ﺍﻟﻮﻟﺪ ﻣﺎﺑﺴﺄﻝ ﻓﻴﻚ . ﺍﻻﻣﻴﻦ ﻗﺎﻝ ﻟﻴﻬﺎ ﺍﻧﺎ ﻣﺎﻗﺎﺩﺭ ﺍﺗﻜﻠﻢ ﻣﻦ ﺍﻟﺸﻨﻄﺔ ﺩﻱ .. ﺟﺎﻭﺑﻴﻬﻮ ﺍﻧﺘﻲ ﺍﺳﺌﻠﺘﻮ ﺍﻟﻜﺘﻴﺮﺓ ﺩﻱ .. ﻗﺎﻟﺖ ﻟﻴﻬﻮ ﺍﻳﻮﺓ ﻳﺎ ﺍﻟﺼﺎﻓﻲ ﻳﺎﻭﻟﺪﻱ .. ﻧﺤﻦ ﻣﺎﺷﻴﻦ ﻋﻄﺒﺮﺓ ﻭﻓﻴﻬﺎ ﺑﻴﺒﺴﻲ ﻭﺑﺎﺳﻄﺔ .. ﻗﺎﻝ ﻟﻴﻬﺎ ﺍﻫﻢ ﺣﺎﺟﺔ ﻋﻨﺪﻫﻢ ﻏﻨﻢ؟ ﻗﺎﻟﺖ ﻟﻴﻬﻮ ﻭﺍﻟﻠﻪ ﻋﺎﺩ ﻳﺎﻭﻟﺪﻱ ﺩﻱ ﻣﺎ ﺍﻇﻨﻬﺎ .. ﻗﺎﻝ ﻟﻴﻬﺎ ﺍﻫﺎ ﻳﺎ ﺍﻣﻲ ﻋﻄﺒﺮﺓ ﺩﻱ ﺣﻘﺔ ﻣﻨﻮ؟ ﻗﺎﻟﺖ ﻟﻴﻬﻮ ﻋﻄﺒﺮﺓ ﺣﻘﺔ ﺍﻟﻠﻪ .. ﻗﺎﻝ ﻟﻴﻬﺎ ﺧﻼﺱ .. ﻭﺳﻜﺖ .. ﻭﺑﻘﻰ ﻣﺎﺷﻲ ﻭﺍﻟﻤﺸﻮﺍﺭ ﻣﻦ ﺍﻟﺒﻴﺖ ﻟﻲ ﺷﺎﺭﻉ ﺍﻟﺒﺼﺎﺕ ﺟﺒﺪﺓ ﺷﻮﻳﺔ .. ﺍﻻﻣﻴﻦ ﺑﺎﻟﻮ ﻣﺸﻐﻮﻝ ﺑﺎﻟﻤﺴﺘﻘﺒﻞ ﺍﻟﻤﺠﻬﻮﻝ ﻓﻲ ﺍﻟﻤﺪﻳﻨﺔ ﺍﻟﻤﺎﺷﻲ ﻋﻠﻴﻬﺎ .. ﻭﻣﺎﻋﺎﺭﻑ ﺣﺘﻲ ﺍﻟﻤﺼﻴﺮ ﺡ ﻳﻜﻮﻥ ﺷﻨﻮ؟ ﻫﻮﻣﻌﺎﻫﻮ ﻗﺮﻭﺵ ﻛﻮﻳﺴﺔ .. ﺑﻠﻢ ﻓﻴﻬﺎ ﻣﻦ ﺍﻟﻌﻴﺪ ﺍﻟﻔﺎﺕ ﻗﺒﻞ ﺗﻼﺗﺔ ﺷــﻬﻮﺭ .. ﻣﻦ ﻳﻮﻡ ﺍﻟﻼﻗﺎ ﻓﻴﻬﻮ ﻋﻄﻴﻪ . ﻋﺸﺎﻥ ﻳﺠﻬﺰ ﺑﻴﻬﺎ ﺑﻴﺖ ﺍﻟﺴﻜﻦ ﻓﻲ ﻋﻄﺒﺮﺓ .. ﺍﻫﺎ ﻭﻫﻢ ﻣﺎﺷﻴﻦ ﻋﻠﻰ ﺍﻟﺸﺎﺭﻉ ﺍﻟﺒﺠﻲ ﻓﻴﻬﻮ ﺍﻟﺒﺺ ﺍﻟﺒﻤﺸﻲ ﻋﻄﺒﺮﺓ .. ﺍﻳﻤﺎﻥ ﻗﺎﻟﺖ ﻟﻴﻬﻮ ﻳﺎ ﺍﻻﻣﻴﻦ؟ ﻗﺎﻝ ﻟﻴﻬﺎ ﻧﻌﻢ ﻳﺎ ﺍﻳﻤﺎﻥ .. ﻗﺎﻟﺖ ﻟﻴﻬﻮ ﺑﺲ ﺍﻫﻢ ﺣﺎﺟﺔ ﺩﺍﻳﺮﺓ ﺍﻭﺻﻴﻚ ﺑﻴﻬﺎ .. ﻣﺴﻜﻨﺘﻚ ﺩﻱ ﻣﺎﺗﺴﻮﻳﻬﺎ ﻓﻲ ﻋﻄﺒﺮﺓ .. ﻋﻄﺒﺮﺓ ﺩﻱ ﻣﺪﻳﻨﺔ .. ﻭﻛﻠﻬﺎ ﺣﺮﺍﻣﻴﺔ ﻭﺍﺟﺮﺍﻡ ﻳﻌﻨﻲ ﻣﺎﺯﻱ ﺍﻟﺤﻠﺔ .. ﻫﻨﺎﻙ ﻗﺎﻟﻮ ﻓﻲ ﺍﻟﻐﺶ ﻭﺍﻟﺴﺮﻗﺔ .. ﻭﻓﻲ ﺣﺎﺟﺎﺕ ﻛﺘﻴﺮﺓ .. ﻧﻂ ﺍﻟﺼﺎﻓﻲ ﻗﺎﻝ ﻟﻴﻬﺎ ﺑﺼﺢ ﻳﺎ ﺍﻣﻲ ؟ .. ﻳﻌﻨﻲ ﻫﺴﻊ ﺍﻧﺎ ﺑﺴﺮﻗﻮﻧﻲ ؟ ﻗﺎﻟﺖ ﻟﻴﻬﻮ ﻻﻻ .. ﻣﺎﺑﺴﺮﻗﻮ ﺍﻟﻨﺎﺱ ﻳﺎﻟﺼﺎﻓﻲ .. ﺑﺴﺮﻗﻮ ﺍﻟﻘﺮﻭﺵ .. ﺍﻻﻣﻴﻦ ﻗﺎﻝ ﻟﻴﻬﺎ .. ﺍﻫﺎ ﻳﺎ ﺍﻳﻤﺎﻥ ﻫﺴﻊ ﻓﻲ ﺩﺍﻋﻲ ﻟﻠﻜﻼﻡ ﺩﻩ ؟؟؟ ﺍﻧﺘﻲ ﻣﺎﺑﺘﺼﺒﺮﻱ ﻭﺗﺪﻳﻨﻲ ﻭﺻﺎﻳﺎﻙ ﺩﻱ ﻻﻣﻦ ﻧﺼﻞ ﻭﻛﺖ ﻧﻜﻮﻥ ﺑﺮﺍﻧﺎ .. ﻫﺴﻊ ﺧﻮﻓﺘﻲ ﺍﻟﻮﻟﺪ .. ﻭﺟﺒﺘﻲ ﻟﻴﻬﻮ ﻫﻠﻮﺳﺔ .. ﻭﺑﻘﻰ ﻳﻨﻘﻨﻖ ﺑﺮﺍﻫﻮ .. ﺑﻲ ﻛﻼﻡ ﻫﻲ ﻣﺎﺳﺎﻣﻌﺎﻫﻮ .. ﻏﺎﻳﺘﻮ ﺍﻟﻮﻻﺩﺓ ﻫﻴﻨﺔ .. ﻟﻜﻦ ﻗﺎﺳﻴﺔ ﺍﻟﺘﺮﺑﻴﺔ .. ﻧﺴﻮﺍﻥ ﻣﺎﻋﻨﺪﻫﻦ ﺍﻱ ﻓﻬﻢ ﻟﻨﻔﺴﻴﺎﺕ ﺍﻻﻃﻔﺎﻝ .. ﺍﻟﻮﺍﺣﺪﺓ ﺑﺲ ﺍﻟﻜﻼﻡ ﺍﻟﻴﺠﻴﻬﺎ ﻓﻲ ﺭﺍﺳﻬﺎ ﻃﻮﺍﻟﻲ ﺗﻘﻮﻟﻮ .. ﺑﺪﻭﻥ ﻣﺎﺗﺮﺍﻋﻲ ﻟﻲ ﻧﻔﺴﻴﺎﺕ ﺍﻟﺸﺎﻓﻊ .. ﺍﻟﺼﺎﻓﻲ ﻗﺎﻝ ﻟﻴﻬﻮ ﻻﻻ ﻳﺎﺑﺎ ﻭﺍﻟﻠﻪ ﺍﻧﺎ ﺍﺻﻠﻮ ﻣﺎﺑﺨﺎﻑ .. ﻭﺍﻟﻠﻪ ﻛﺎﻥ ﺟﺎ ﺯﻭﻝ ﻳﺴﺮﻗﻨﻲ ﺑﻌﻀﻴﻬﻮ .. ﻃﻮﺍﻟﻲ ﺑﻔﻜﻨﻲ .. ﺍﻫﺎ ﻳﺎﺯﻭﻝ ﻭﺻﻠﻮ ﺍﻟﺸﺎﺭﻉ ﻭﺍﻟﺒﺺ ﺟﺎ .. ﻭﺍﻟﻨﺎﺱ ﺩﻱ ﺭﺍﻛﺒﺔ ﻣﻦ ﺍﻟﻤﻨﻄﻖ ﺍﻟﺒﻌﻴﺪﺓ ﻭﺍﻟﻘﺮﻳﺒﺔ .. ﻭﻃﺒﻌﺎ ﺍﻟﺒﺺ ﺑﻴﻐﺸﻰ ﺣﻠﺔ ﺣﻠﺔ .. ﻳﻠﻘﻂ ﺍﻟﻨﺎﺱ . ﻭﺣﺪﻭ ﺍﻟﺪﺍﻣﺮ .. ﻭﻣﻦ ﺍﻟﺪﺍﻣﺮ ﺍﻟﻨﺎﺱ ﺍﻟﻤﺎﺷﻴﻦ ﻋﻄﺒﺮﺓ ﺑﺮﻛﺒﻮ ﻣﻮﺍﺻﻼﺕ ‏( ﻋﻄﺒﺮﺓ ﺍﻟﺪﺍﻣﺮ ‏) .. ﻃﺒﻌﺎ ﻧﺎﺱ ﺍﻟﺒﺺ ﺩﻳﻞ ﻛﻠﻬﻢ ﺑﻘﻮ ﻣﺠﺤﻤﻴﻦ ﻓﻲ ﺍﻳﻤﺎﻥ .. ﻧﺴﻮﺍﻥ ﻋﻠﻰ ﺭﺟﺎﻝ .. ﺍﻟﺰﻭﻟﺔ ﺳﻤﺤﺔ ﻭﻃﻮﻳﻠﺔ ﻛﺪﺍ ﻭﻻﺑﺴﺔ ﺍﻟﺘﻮﺏ ﺍﻟﺒﺮﺗﻘﺎﻟﻲ ﺣﺸﻤﺔ ﺣﺸﻤﺔ ﻭﺭﺍﺑﻄﺔ ﺭﺍﺳﻬﺎ .. ﺑﺲ ﺧﺎﺭﺑﺎﻫﺎ ﺑﺎﻟﻜﻌﺐ ﺍﻟﻌﺎﻟﻲ ﺍﻻﺣﻤﺮ ﺩﻩ .. ﻫﻲ ﺍﺳﺎﺳﺎ ﻃﻮﻳﻠﺔ .. ﻭﻟﻤﻦ ﻟﺒﺴﺘﻮ ﺑﻘﺖ ﺍﻃﻮﻝ ﻣﻦ ﺍﻻﻣﻴﻦ .. ﻭﻣﻼﻣﺢ ﻭﺷﻬﺎ ﻣﺪﻫﺸﺔ .. ﻣﺘﺮﻋﺔ ﺑﺎﻟﺠﻤﺎﻝ .. ﺍﻟﺴﻤﺎﺣﺔ ﺍﻟﻄﺒﻴﻌﻴﺔ .. ﻻﺗﺰﻭﻳﺮ ﻭﻻﺟﻠﺒﻄﺔ ﻛﺮﻳﻤﺎﺕ .. ﺍﻟﻤﻬﻢ .. ﺍﻻﻣﻴﻦ ﻣﺎ ﺧﺘﺎ ﺑﺎﻟﻮ ﻓﻲ ﻧﻈﺮﺍﺕ ﺍﻟﻨﺎﺱ .. ﺍﺻﻼ ﻫﻮ ﺯﻭﻝ ﻣﺴﻜﻴﻦ ﻭﻃﻴﺒﺎﻥ ﻻﻣﻦ ﺑﻴﻐﺎﺩﻱ .. ﻭﻓﻲ ﺣﺎﺟﺎﺕ ﻛﺘﻴﺮﺓ ﻣﺎﺑﻔﻜﺮ ﻟﻴﻬﺎ ﻭﻻﺑﺨﺖ ﻟﻴﻬﺎ ﺑﺎﻟﻮ .. ﻭﻫﻲ ﺫﺍﺗﻬﺎ ﺍﻟﻤﺴﻜﻴﻨﺔ ﻣﺎ ﺟﺎﻳﺒﺔ ﺧﺒﺮ .. ﻫﻤﻬﺎ ﻓﻲ ﻭﻟﺪﻫﺎ .. ﺗﻌﺎﻝ ﻳﺎ ﺍﻟﺼﺎﻓﻲ ﺑﻲ ﺟﺎﻱ .. ﺍﻗﻌﺪ ﻛﻮﻳﺲ .. ﻣﺎﺗﻤﻠﺺ ﺷﺒﻄﻚ . ﻛﺎﻥ ﺑﻄﻨﻚ ﻃﻤﺖ ﻛﻠﻤﻨﻲ .. ﻋﺸﺎﻥ ﺍﺩﻳﻚ ﺍﻟﻜﻴﺲ ﺩﻩ ﺗﻄﺮﺵ ﻓﻴﻬﻮ .. ﻭﺍﻟﺒﺺ ﺩﻩ ﻳﺪﻫﺞ .. ﻣﺮﺍ ﺑﺤﺒﻞ ﺍﻡ ﻋﻠﻰ ﻭﺍﻟﻤﻄﻤﺮ ﻭﺍﻟﻀﻴﻘﺔ ﻭﺳﻘﺎﺩﻱ ﻭﺗﺒﻮﺭﺓ . ﻭﻗﺒﺎﺗﻲ ﻭﺍﻟﻌﺎﻟﻴﺎﺏ . ﻭﺍﻟﺰﻳﺪﺍﺏ ﻭﺍﻟﻤﻜﺎﺑﺮﺍﺏ ﻭﺩﺧﻞ ﺍﻟﺤﺼﺎﻳﺔ ﻻﻣﻦ ﻗﺎﻝ ﺳﻼﻡ ﻳﺎ ﺍﻟﺪﺍﻣﺮ .. ﻭﺑﺎﻟﺴﻼﻣﺔ ﺍﻟﺒﺺ ﻭﺻﻞ ﺍﻟﺪﺍﻣﺮ .. ﻭﺍﻟﻨﺎﺱ ﺑﻘﺖ ﺗﻨﺰﻝ ﻓﻲ ﺣﺎﺟﺎﺗﻬﺎ .. ﺍﻟﻴﻮﻡ ﻛﺎﻥ ﻳﻮﻡ ﺍﺣﺪ .. ﻓﻲ ﻧﺎﺱ ﺟﺎﻳﺒﻴﻦ ﺣﺎﺟﺎﺕ ﻳﺒﻴﻌﻮﻫﺎ ﻓﻲ ﺳﻮﻕ ﺍﻟﺪﺍﻣﺮ .. ﺣﺒﺎﻝ . ﻭﺟﺪﺍﺩ .. ﻭﺑﺮﻭﺵ .. ﻭﻣﻜﺎﻧﺲ ﻭﻫﺒﺎﺑﺎﺕ ﻭﻫﻠﻢ ﺟﺮﺍ .. ﻭﻓﻲ ﻧﺎﺱ ﺟﺎﻳﻴﻦ ﻻﻏﺮﺍﺽ ﻳﺸﻴﻠﻮﻫﺎ .. ﻭﻏﺎﻳﺘﻮ ﺍﻻﻫﺪﺍﻑ ﺗﺨﺘﻠﻒ .. ﺍﻟﻤﻬﻢ . ﺍﻟﻨﺎﺱ ﺗﻜﺎﺑﺲ ﻭﺍﻟﺮﺯﻕ ﻣﻦ ﺍﻟﻠﻪ ﻣﻘﺴﻮﻡ .. ﺍﻻﻣﻴﻦ ﻧﺰﻝ ﺍﻟﺸﻨﻄﺔ .. ﻭﺍﻳﻤﺎﻥ ﺍﺗﻨﺎﻭﻟﺖ ﺍﻟﺼﺎﻓﻲ ﻣﻦ ﺍﺑﺎﻃﺎﺗﻮ ﻧﺰﻟﺘﻮ ﻭﺍﺗﺴﺎﻭﻗﻮ .. ﻣﺎﺷﻴﻦ ﻋﻠﻰ ﻣﻄﻌﻢ ﻳﻔﻄﺮﻭ ﺣﺘﻰ ﻳﻤﺸﻮ ﻋﻠﻰ ﻣﻮﺍﺻﻼﺕ ﻋﻄﺒﺮﺓ .. ﻭﺍﻟﺼﺎﻓﻲ ﻳﺘﻠﻔﺖ ﻳﻤﻴﻦ ﻭﺷﻤﺎﻝ .. ﺍﻭﻝ ﻣﺮﺓ ﻓﻲ ﺣﻴﺎﺗﻮ ﻳﺸﻮﻑ ﻟﻴﻬﻮ ﻣﺪﻳﻨﺔ .. ﻣﻊ ﺍﻧﻮ ﺍﻟﺪﺍﻣﺮ .. ﺷﺎﻳﻠﺔ ﻣﻦ ﺍﻟﻠﻤﺤﺔ ﻧﺺ .. ﻻﻫﻲ ﻣﺪﻳﻨﺔ ﻭﻻﻫﻲ ﻗﺮﻳﺔ .. ﺯﻱ ﻣﺎﻗﺎﻝ ﺍﻟﺸﺎﻋﺮ .. ﻻ ﺍﻧﺖ ﺑﺎﺩﻳﺔ ﺗﺒﺪﻭ ﺑﺪﺍﻭﺗﻬﺎ ﻭﻻ ﺍﻧﺖ ﺑﻨﺪﺭ .. ﺍﻟﺼﺎﻓﻲ ﻳﺘﻠﻔﺖ ﻭﺍﻣﻮ ﻗﺎﺑﻀﺎﻫﻮ ﻣﻦ ﺍﻳﺪﻭ .. ﺍﻟﻤﺮﺓ ﺩﻱ ﻗﺎﺑﻀﺎﻫﻮ ﻗﺒﻀﺔ ﻓﻴﻬﺎ ﻓﺎﻳﺪﺓ ﻗﺪﺭ ﻣﺎﻧﺎﺗﻞ ﺍﺑﺖ ﺗﻔﻜﻮ .. ﻗﺎﻝ ﻟﻴﻬﺎ ﻳﻤﺔ ﻧﺤﻦ ﻫﺴﻊ ﻣﺎﺷﻴﻦ ﻭﻳﻦ ؟ ﻗﺎﻟﺖ ﻟﻴﻬﻮ ﻣﺎﺷﻴﻦ ﻧﻔﻄﺮ .. ﻧﻔﻄﺮ .. ﻣﺎﺟﻮﻋﺖ؟ ﻗﺎﻝ ﻟﻴﻬﺎ ﺑﻲ ﺑﺎﺳﻄﺔ؟ ﻗﺎﻟﺖ ﻟﻴﻬﻮ ﻳﺎﻭﻟﺪ ﺑﺎﺳﻄﺔ ﺷﻨﻮ؟ ﺍﻟﺒﻲ ﺍﻟﺼﺒﺎﺡ؟ .. ﺍﻟﺒﺎﺳﻄﺔ ﺑﻨﺠﻴﺒﻬﺎ ﻟﻴﻚ ﺑﻌﺪﻳﻦ ﺑﺎﻟﻠﻴﻞ .. ﻗﺎﻝ ﻟﻴﻬﻮ ﻳﺎﺑﺎ ﻳﺎﺑﺎ .. ﻋﻠﻴﻚ ﺍﻟﻠﻪ ﺗﺸﺘﺮﻱ ﻟﻲ ﺑﻴﺒﺴﻲ . ﻗﺎﻝ ﻟﻴﻬﻮ ﻛﻮﻳﺲ ﻫﺴﻲ ﻣﻊ ﺍﻟﻔﻄﻮﺭ ﻧﺸﺘﺮﻱ ﻟﻚ .. ﺍﻟﻤﻬﻢ ﻏﺸﻮ ﺍﻗﺮﺏ ﻣﻄﻌﻢ .. ﻭﻓﻄﺮﻭ ﻭﺷﺮﺑﻮ ﺍﻟﺒﺎﺭﺩ .. ﻭﺟﺎﺑﻮ ﻟﻠﺼﺎﻓﻲ ﺍﻟﺒﻴﺒﺴﻲ ﺍﻟﺪﺍﻳﺮﻭ .. ﻭﻣﺸﻮ ﻋﻠﻰ ﺍﻟﻤﻮﺍﺻﻼﺕ .. ﺍﻟﺒﺘﻮﺩﻳﻬﻢ ﻋﻠﻰ ﻋﻄﺒﺮﺓ .. ﻋﻄﺒﺮﺓ ﻗﺮﻳﺒﺔ ﻣﻦ ﺍﻟﺪﺍﻣﺮ ﺟﺪﺍ .. ﻓﻘﻂ ﻳﻔﺼﻞ ﺑﻴﻨﻦ ﻧﻬﺮ ﻋﻄﺒﺮﺓ .. ﻭﻓﻲ ﺍﻟﻮﻛﺖ ﺩﺍﻙ ﻛﺎﻥ ﻓﻲ ﻛﻮﺑﺮﻱ ﺣﺪﻳﺪ ﻣﺘﻬﺎﻟﻚ ﻣﻦ ﺯﻣﻦ ﺍﻻﻧﺠﻠﻴﺰ .. ﻭﺿﻴﻖ ﻭﺩﻣﻮ ﻓﺎﻳﺮ .. ﻭﻗﺒﻞ ﻣﺎﺗﺪﺧﻞ ﻋﻠﻰ ﺍﻟﻜﻮﺑﺮﻱ ﻭﺍﻧﺖ ﻃﺎﻟﻊ ﻣﻦ ﺍﻟﺪﺍﻣﺮ .. ﺑﻼﻗﻴﻚ ﻣﺼﻨﻊ ﺍﻻﺳﻤﻨﺖ .. ﻭﺍﻟﺠﺮﺍﺩﻝ ﺍﻟﻤﻌﻠﻘﺔ ﻋﻠﻰ ﺍﻻﺳﻼﻙ ﺍﻟﺒﺘﺠﻴﺐ ﺍﻟﺤﺠﺮ ﺍﻟﺠﻴﺮﻱ ﻣﻦ ﺍﻟﻐﺮﺏ .. ﻭﺍﻟﺼﺎﻓﻲ ﻳﺘﻠﻔﺖ ﻭﻳﺘﺎﻭﻕ ﻭﻳﺴﺄﻝ .. ﻭﺑﻲ ﻃﻮﻝ ﺣﺴﻮ ﻓﻲ ﺍﻟﻤﻮﺍﺻﻼﺕ .. ﻳﺎﺑﺎ ﻋﺎﻥ ﺩﻳﻚ .. ﻳﻤﺔ ﻋﺎﻥ ﺩﺍﻙ .. ﻳﺎﺑﺎ ﺩﻩ ﺷﻨﻮ؟ ﻳﻤﺔ ﺩﻩ ﺷﻨﻮ؟؟ . ﻭﺍﻟﻨﺎﺱ ﺭﺍﻛﺒﻴﻦ ﺳﺎﻛﺘﻴﻦ ﺳﺎﺍﺍﺍﻱ .. ﻭﻛﻞ ﻣﺮﺓ ﺍﻟﺼﺎﻓﻲ ﺍﻣﻮ ﺗﻘﺮﺻﻮ ﻓﻲ ﻳﺪﻭ .. ﺍﺳﻜﺖ ﻳﺎﻭﻟﺪ .. ﺍﺗﻜﻠﻢ ﺑﺮﺍﺣﺔ . ﻭﻫﻮ ﻳﻤﺴﻚ ﺍﻳﺪﻭ ﺍﺣﺤﺢ .. ﻭﻳﻨﻔﺦ ﻓﻴﻬﺎ .. ﻭﻳﺘﻮﺳﻮﺱ .. ﻳﻤﺔ ﺍﻟﺤﺎﺟﺎﺕ ﺍﻟﻤﻌﻠﻘﺎﺕ ﺩﻳﻞ ﺷﻨﻮ؟؟ ﻭﺍﺣﺪﺍﺕ ﻣﺎﺷﺎﺕ ﻭﺍﺣﺪﺍﺕ ﺟﺎﻳﺎﺕ .. ﺩﻱ ﻳﺎﻫﻮ ﺍﻟﻤﻨﺘﺰﻫﺔ ؟؟ ﻗﺎﻟﺖ ﻟﻴﻬﻮ ﻻﻻ .. ﺩﻱ ﺣﻘﺔ ﺍﻟﻤﺼﻨﻊ ﺑﺘﺎﻉ ﺍﻻﺳﻤﻨﺖ .. ﻭﺩﻧﻘﺮﺕ ﻋﻠﻲ ﺗﻜﻠﻤﻮ ﻓﻲ ﺍﺿﺎﻧﻮ ﻛﺪﺍ .. ﻗﺎﻟﺖ ﻟﻴﻬﻮ ﻭﻛﺖ ﻳﻜﻮﻧﻮ ﻓﻲ ﻧﺎﺱ ﻛﺒﺎﺭ ﻗﺎﻋﺪﻳﻦ .. ﻣﺎﺗﺮﻓﻊ ﺻﻮﺗﻚ ﺑﺎﻟﻜﻼﻡ ﻛﺪﺍ ﻋﻴﺐ .. ﺧﻠﻴﻚ ﻣﺆﺩﺏ ﻭﺍﺗﻜﻠﻢ ﺑﺮﺍﺣﺔ .. ﻣﺎﺗﻨﺴﻰ ﺍﻟﻨﺎﺱ ﺍﻟﻘﺎﻋﺪﻳﻦ ﻣﻌﺎﻙ .. ﻗﺎﻝ ﻟﻴﻬﺎ ﻛﻮﻳﺲ ﻳﺎ ﺍﻣﻲ ﺍﺳﻒ .. ﻗﺎﻟﺖ ﻟﻴﻬﻮ ﻣﺎﻓﻲ ﻣﺸﻜﻠﺔ ﺣﺒﻴﺒﻲ .. ﺍﻧﺖ ﺍﺳﺄﻝ ﺑﺲ ﺑﺮﺍﺣﺔ .. ﻭﺍﻧﺎ ﺑﻘﻮﻝ ﻟﻴﻚ ﺑﺮﺍﺣﺔ ﺑﺪﻭﻥ ﺍﻟﻨﺎﺱ ﻳﺴﻤﻌﻮ .. ﻃﺒﻌﺎ ﻛﻞ ﺍﻟﺮﻛﺎﺏ ﻓﻲ ﺍﻟﻤﻮﺍﺻﻼﺕ ﻋﺮﻓﻮ ﺍﻧﻮ ﺍﻟﻨﺎﺱ ﺩﻳﻞ ﺟﺎﻳﻴﻦ ﻣﻦ ﻛﺪﻱ .. ﻭﺍﻟﻮﻟﺪ ﺩﻩ ﺍﻭﻝ ﻣﺮﺓ ﻳﺸﻮﻑ ﺍﻟﺒﻠﺪ ﺩﻱ .. ﻭﺍﻻﻣﻴﻦ ﺭﺍﻛﺐ ﺑﺎﻟﺠﻨﺒﺔ ﺍﻟﺒﻴﻐﺎﺩﻱ .. ﻭﻛﻞ ﻣﺮﺓ ﻳﺼﻠﺢ ﻃﺎﻗﻴﺘﻮ .. ﻭﻣﺎﺷﻐﺎﻝ ﺑﺎﻱ ﺣﺎﺟﺔ .. ﻭﻧﻈﺮﻭ ﺑﺮﺓ ﺍﻟﻌﺮﺑﻴﺔ . ﺍﻟﻮﻟﺪ ﻳﺘﻜﻠﻢ ﻭﻻ ﻳﺴﻜﺖ ﺍﺑﻮﻫﻮ ﻣﺎ ﻗﺎﻋﺪ ﻳﻨﻬﺮﻭ ﻧﻬﺎﺋﻲ .. ﺍﻫﺎ ﻳﺎﺯﻭﻝ ﺍﻭﻝ ﻣﺎﻭﺻﻠﻮ ﻋﻄﺒﺮﺓ .. ﺍﻟﻮﻟﺪ ﺯﺍﺩ ﺍﻧﺪﻫﺎﺷﻮ .. ﻻﻧﻮ ﻋﻄﺒﺮﺓ ﻃﺒﻌﺎ ﻋﺎﻣﺮﺓ ﺷﺪﻳﺪ .. ﻭﻣﺰﺩﺣﻤﺔ ﺑﺎﻟﺴﻴﺎﺭﺍﺕ ﻭﺍﻟﻌﺠﻼﺕ .. ﻭﺍﻟﺼﺎﻓﻲ ﺑﺲ ﻳﻌﺎﻳﻦ ﻭﻳﺘﻠﻔﺖ .. ﻣﺎﺧﻼ ﺣﺘﺔ ﻣﺎﺗﻠﻔﺰﺍ .. ﻳﺎﺑﺎ ﺍﻧﺖ ﺍﻟﻌﺠﻼﺕ ﺩﻳﻞ ﺍﻟﻜﺘﺎﺭ ﺩﻳﻞ ﺑﺠﻴﺒﻮﻫﻦ ﻣﻦ ﻭﻳﻦ؟؟ .. ﻭﺍﺑﻮﻫﻮ ﻣﻄﻨﺶ ﻃﻨﺎﺵ ﻋﺠﻴﺐ .. ﻭﻃﺎﻟﻊ ﻣﻨﻬﺎ ﻛﻠﻮ ﻛﻠﻮ .. ﻃﺒﻌﺎ ﻋﻄﺒﺮﺓ ﺍﻣﻜﻦ ﻣﻦ ﺍﻛﺒﺮ ﺍﻟﻤﺪﻥ ﻓﻲ ﺍﻓﺮﻳﻘﻴﺎ ﻣﻦ ﻧﺎﺣﻴﺔ ﻛﺜﺮﺓ ﺍﻟﺪﺭﺟﺎﺕ ﺍﻟﻬﻮﺍﺋﻴﺔ ‏( ﺍﻟﻌﺠﻼﺕ ‏) .. ﻣﺪﻳﻨﺔ ﻋﺮﻳﻘﺔ .. ﻓﻴﻬﺎ ﺍﻟﻔﺔ ﻭﺍﻣﺎﻥ ﻣﺒﺎﻟﻎ ﻓﻴﻬﻮ .. ﻭﺍﻏﻠﺒﻴﺔ ﺍﻟﻨﺎﺱ ﺑﺘﺘﻌﺎﺭﻑ .. ﺑﺨﻼﻑ ﺑﺎﻗﻲ ﺍﻟﻤﺪﻥ ﺍﻟﻔﻲ ﺍﻟﺪﻧﻴﺎ .. ﻭﻓﻴﻬﺎ ﺍﺳﺮ ﻣﺸﻬﻮﺭﺓ ﻭﻓﻴﻬﺎ ﻧﺴﻴﺞ ﺍﺟﺘﻤﺎﻋﻲ ﻗﻮﻱ ﺟﺪﺍ .. ﻋﻄﻴﺔ ﺳﺎﻛﻦ ﻓﻲ ﺣﻲ ﺍﺳﻤﻮ ﺍﻻﻣﺘﺪﺍﺩ ﺍﻟﺸﻤﺎﻟﻲ .. ﻭﻓﻌﻼ ﺍﻟﺤﻲ ﺩﻩ ﺑﻴﻘﻊ ﻓﻲ ﺍﻟﻄﺮﻑ ﺍﻟﺸﻤﺎﻟﻲ ﻟﻤﺪﻳﻨﺔ ﻋﻄﺒﺮﺓ .. ﻃﻮﺍﻟﻲ ﺍﻻﻣﻴﻦ ﺳﺎﻕ ﻣﺮﺍﺗﻮ ﻭﻭﻟﺪﻭ ﻭﻣﺸﻮ ﻋﻠﻰ ﻣﻮﺍﺻﻼﺕ ﺍﻟﺸﻤﺎﻟﻲ .. ﻭﻧﺰﻟﻮ ﻓﻲ ﺍﻟﻤﺤﻄﺔ ﺍﻟﻤﻌﻨﻴﺔ .. ﺑﺎﻟﺸﺎﺭﻉ ﺍﻟﻤﻌﻨﻲ .. ﻭﺳﺄﻝ ﻣﻦ ﺍﻟﺒﻘﺎﻟﺔ .. ﻓﻲ ﺷﺒﺎﺏ ﻛﺪﺍ ﻗﺎﻟﻮ ﻟﻴﻬﻮ ﻭﺻﻠﺖ ﺍﻟﻘﺪﺍﻣﻚ ﻓﻲ ﺍﻟﻨﺎﺻﻴﺔ ﺩﻱ ﺍﻟﺒﻘﺎﻟﺔ .. ﻣﺎﺑﻌﻴﺪﺓ ﻣﻦ ﺧﻂ ﺍﻟﻤﻮﺍﺻﻼﺕ .. ﻭﻣﺸﻰ ﻃﻮﺍﻟﻲ ﻧﻘﺮ ﺍﻟﺒﺎﺏ ﺍﻟﺘﺎﻟﺖ ﻣﻦ ﺍﻟﺒﻘﺎﻟﺔ .. ﺍﻻﻣﻴﻦ ﺑﺪﻕ ﻓﻲ ﺍﻟﺒﺎﺏ .. ﻭﺍﻳﻤﺎﻥ ﻭﺍﻗﻔﺔ ﻭﺭﺍﻫﻮ ﻃﻮﺍﻟﻲ .. ﻭﺍﻟﺼﺎﻓﻲ ﻗﻌﺪ ﻓﻮﻕ ﺍﻟﺸﻨﻄﺔ ﺍﻟﻜﺒﻴﺮﺓ ﻣﻦ ﻓﻮﻕ ﻣﻨﺘﻈﺮﻳﻦ ﻭﺑﺘﻬﻮﺯﺯ ﻛﻜﺪﺍ ﻳﻌﻨﻲ ﺯﻱ ﺍﻟﺴﺎﻳﻖ ﻋﺮﺑﻴﺔ .. ......... ﻋﻄﻴﻪ ﻓﺘﺢ ﺍﻟﺒﺎﺏ ﻭﺟﺎ ﻃﺎﻟﻊ ﺭﺣﺐ ﺑﻴﻬﻢ .. ﻣﺮﺣﺐ ﻣﺮﺣﺐ ﻭﺍﻟﻠﻪ .. ﻧﻮﺭﺗﻮ ﺍﻟﺒﻠﺪ ﺷﺮﻓﺘﻮ ﺍﻟﺪﻳﺎﺭ .. ﺍﺗﻔﻀﻠﻮ ﺑﺎﻟﺒﺎﺏ ﺍﻟﺘﺎﻧﻲ .. ﻭﺷﺎﻝ ﺍﻟﺸﻨﻄﺔ ﺑﺮﺍﻫﻮ .. ﻭﻣﺸﻰ ﻋﻠﻰ ﺍﻟﺒﺎﺏ ﺍﻟﺘﺎﻧﻲ .. ﺍﻟﺒﻴﺖ ﻓﺎﺗﺢ ﻓﻲ ﺷﺎﺭﻉ ﻣﺎﺷﻲ ﺷﺮﻕ ﻏﺮﺏ .. ﻭﺍﻟﺒﻴﺖ ﻓﺎﺗﺢ ﺷﻤﺎﻝ .. ﻓﻴﻬﻮ ﺑﺎﺑﻴﻦ .. ﺑﺎﺏ ﻛﺒﻴﺮ ﻭﻫﻮ ﺍﻟﺠﺰﺀ ﺍﻟﺴﺎﻛﻦ ﻓﻴﻬﻮ ﻋﻄﻴﺔ .. ﻭﺑﺎﺏ ﺻﻐﻴﺮ .. ﻭﺩﻩ ﺍﻟﺨﺎﺗﻴﻬﻮ ﻟﻴﻬﻢ ﻳﺴﻜﻨﻮ ﻓﻴﻬﻮ ﻫﻢ .. ﺍﻫﺎ ﻣﺸﻰ ﻋﻠﻰ ﺍﻟﺒﺎﺏ ﺍﻟﺼﻐﻴﺮ .. ﺍﻟﺒﻴﺖ ﻧﺺ ﻓﻴﻬﻮ ﻏﺮﻓﺘﻴﻦ ﻣﺴﻘﻮﻓﺎﺕ ﺑﺎﻟﺨﺸﺐ .. ﻓﺎﺗﺤﺎﺕ ﻓﻲ ﺑﺮﻧﺪﺓ ﻣﻘﻔﻠﺔ ﻣﻘﻔﻮﻟﺔ ﺑﺎﻟﺰﻧﻜﻲ ﺍﻟﻤﻠﻘﻢ .. ﻭﻣﻄﺒﺦ ﺑﺎﻟﻨﺎﺣﻴﺔ ﺍﻟﻐﺮﺑﻴﺔ .. ﻭﺍﻟﺤﻤﺎﻡ ﻓﻲ ﺍﻟﻨﺎﺣﻴﺔ ﺍﻟﺸﺮﻗﻴﺔ ﻣﺸﺘﺮﻙ ﻣﻊ ﺣﻤﺎﻡ ﺍﻟﺠﺰﺀ ﺍﻟﺘﺎﻧﻲ ﻣﻦ ﺍﻟﺒﻴﺖ ﺣﻤﺎﻣﻴﻦ ﻣﻨﻔﺼﻼﺕ ﻳﻌﻨﻲ .. ﺍﻟﻤﻬﻢ ﺍﻟﺒﻴﺖ ﻛﻮﻳﺲ ﻻﺳﺮﺓ ﺻﻐﻴﺮﺓ .. ﻭﻓﻲ ﺍﻟﻨﻬﺎﻳﺔ ﻧﺺ ﺑﻴﺖ ﻳﻌﻨﻲ .. ﻋﻠﻰ ﻗﺪﺭ ﺍﻟﺤﻮﺟﺔ .. ﻟﻜﻦ ﻣﺎﻓﻴﻬﻮ ﻣﻜﺎﻥ ﺿﻴﺎﻓﺔ ﻭﺍﺳﺘﻘﺒﺎﻝ ﺭﺟﺎﻝ .. ﺍﻟﺤﺎﺟﺔ ﺍﻟﻐﺮﻳﺒﺔ ﻭﻋﺠﻴﺒﺔ .. ﺍﻧﻮ ﺍﻟﺒﻴﺖ ﻣﻔﺮﻭﺵ .. ﻓﻴﻬﻮ ﺍﺭﺑﻌﺔ ﺳﺮﺍﻳﺮ ﺑﻲ ﻟﺤﺎﻓﺎﺗﻬﺎ ﻭﻣﻼﻳﺎﺗﻬﺎ .. ﻭﺍﺯﻳﺎﺭ ﻣﻼﻧﺔ ﻣﻮﻳﺔ .. ﻭﻣﻜﻨﻮﺱ ﻭﻣﺮﺷﻮﺵ .. ﻭﺣﺘﻲ ﺍﻟﻤﻄﺒﺦ ﻓﻴﻬﻮ ﺍﻟﻌﺪﺓ ﺍﻟﻀﺮﻭﺭﻳﺔ .. ﺣﻠﺘﻴﻦ ﻭﺻﺤﺎﻧﺔ ﻭﻛﺒﺎﺑﻲ .. ﻭﺳﻴﺮﻣﺲ ﻭﺑﻮﺗﺠﺎﺯ ﻭﺍﻧﺒﻮﺑﺔ ﻭﻭﻭ .. ﻳﻌﻨﻲ ﺣﺎﺟﺎﺕ ﻣﺘﻮﺍﺿﻌﺔ ﻟﻜﻦ ﻛﺎﻓﻴﺔ .. ﻭﺍﻻﻣﻴﻦ ﺣﺎﻳﻢ ﻓﻲ ﺍﻟﺒﻴﺖ ﻭﻳﻌﺎﻳﻦ .. ﻭﺍﻳﻤﺎﻥ ﻣﺎﺷﺔ ﻭﺭﺍﻫﻮ .. ﻭﻋﻄﻴﺔ ﻗﺎﻋﺪ ﺟﻤﺐ ﺍﻟﺒﺎﺏ .. ﻭﻣﺎﺳﻚ ﺍﻟﺼﺎﻓﻲ ﻣﻦ ﻳﺪﻳﻬﻮ ﻭﺑﺴﺎﻝ ﻓﻴﻬﻮ .. ﺍﺯﻳﻚ ﻳﺎ ﺍﻟﺼﺎﻓﻲ .. ﺍﻟﺼﺎﻓﻲ ﻗﺎﻟﻴﻬﻮ . ﺍﻫﻠﻦ . ﻗﺎﻟﻴﻬﻮ ﺍﻧﺖ ﻛﻮﻳﺲ ؟ ﺍﻟﺼﺎﻓﻲ ﻗﺎﻝ ﻟﻴﻬﻮ ﺍﻳﻮﺓ ﻛﻮﻳﺲ .. ﻭﻻ ﺑﻄﻨﻲ ﻃﻤﺖ ﻭﻻ ﻃﺮﺷﺘﺎ .. ﺍﻣﻲ ﺳﺎﻛﺖ ﺷﺎﻟﺖ ﻛﻴﺲ .. ﻗﺎﻟﺖ ﻟﻲ ﺍﻟﺒﺎﺹ ﺑﺨﺞ ﺍﻟﺒﻄﻦ .. ﻭﺍﻟﺰﻭﻝ ﺑﻄﺮﺵ .. ﻟﻜﻦ ﺍﻧﺎ ﻭﻻ ﻃﺮﺷﺖ ﻭﻻﺷﻲ .. ﻋﻄﻴﺔ ﻗﺎﻝ ﻟﻴﻬﻮ ﻳﺎﺧﻲ ﺍﻧﺖ ﺯﻭﻝ ﺗﺤﻔﺔ ﻫﻬﻪ ﺍﻫﺎ ﻭﺍﻟﺒﻠﺪ ﻛﻴﻒ ؟ ﺍﻟﺼﺎﻓﻲ ﻣﺎﺟﺎﻭﺏ ﻋﻠﻰ ﺍﻟﺴﺆﺍﻝ .. ﻟﻜﻦ ﺳﺄﻝ ﺳﺆﺍﻝ . ﻗﺎﻝ ﻟﻴﻬﻮ ﺍﻧﺖ ﻳﺎﻋﻤﻮ ﻫﺴﻊ ﻏﻨﻤﻜﻢ ﻭﻳﻨﻦ ؟ ﻣﺎﻋﻨﺪﻛﻢ ﻭﻻ ﻧﻌﺠﺔ؟ ﻗﺎﻝ ﻟﻴﻬﻮ ﻣﺎﻋﻨﺪﻧﺎ ﻧﻌﺎﺝ ﻳﺎ ﺍﻟﺼﺎﻓﻲ .. ﻗﺎﻝ ﻟﻴﻬﻮ ﻃﻴﺐ ﺑﺘﺸﺮﺑﻮ ﺷﺎﻱ ﺍﻟﺼﺒﺎﺡ ﺑﺸﻨﻮﻭﻭ؟؟ ﻭﺑﺘﺎﻛﻠﻮ ﺍﻟﻔﻄﻴﺮ ﺑﺸﻨﻮﻭﻭﻭ؟ ﺑﺘﻜﻠﻢ ﺑﻴﺪﻳﻬﻮ ﻭﺑﺠﺮ ﺍﻟﻮﺍﻭ ﺑﺘﺎﻋﺔ ﺷﻨﻮﻭﻭﻭﻭ .. ‏( ﻫﻬﻬﻬﻬﻪ ﻓﻌﻼ ﺍﻟﺼﺎﻓﻲ ﺗﺤﻔﺔ ‏) .. ﺍﻻﻣﻴﻦ ﻭﺍﻳﻤﺎﻥ ﺟﻮ ﻋﻠﻰ ﻋﻄﻴﺔ .. ﺍﻻﻣﻴﻦ ﻗﺎﻝ ﻟﻴﻬﻮ ﻳﺎﻋﻄﻴﺔ .. ﺍﻧﺖ ﺍﻟﺒﻴﺖ ﻛﺎﻥ ﻣﺴﻜﻮﻥ ؟ ﻭﻻ ﺍﻟﻌﻔﺶ ﺩﻩ ﺣﻖ ﻣﻨﻮ؟ ﻗﺎﻝ ﻟﻴﻬﻮ ﻻﻻ ﻳﺎ ﺍﻻﻣﻴﻦ .. ﻻ ﻛﺎﻥ ﻣﺴﻜﻮﻥ ﻭﻻﺣﺎﺟﺔ .. ﺍﻟﻌﻔﺶ ﻭﻳﻨﻮ ﻫﻮ ؟؟ .. ﻳﺎﻫﻦ ﺍﻟﺴﺮﺍﻳﺮ ﻭﺍﻻﺯﻳﺎﺭ .. ﻭﺍﻟﻤﻮﺍﻋﻴﻦ ﺍﻟﻔﻲ ﺍﻟﻤﻄﺒﺦ؟ ﺩﻳﻞ ﺣﻘﺎﺗﻜﻢ ﺍﻧﺘﻮ .. ﻋﻠﻰ ﺑﺎﻝ ﻣﺎﺗﺪﺑﺮﻭ ﺍﻣﻮﺭﻛﻢ . ؟ ﺍﻻﻣﻴﻦ ﻗﺎﻝ ﻟﻴﻬﻮ ﻳﺎﻋﻄﻴﺔ ﺷﻨﻮ ﻳﺎﺧﻲ ﺍﻟﺘﻌﺐ ﺩﻩ؟؟ .. ﻳﺎﺧﻲ ﺑﺘﺒﺎﻟﻎ .. ﺍﻧﺖ ﻣﺎﻛﻔﺎﻳﺔ ﺍﻧﻚ ﺩﺑﺮﺕ ﻟﻴﻨﺎ ﺍﻟﺴﻜﻦ ؟ ﻗﺎﻝ ﻟﻴﻬﻮ ﻣﺎﻓﺮﻗﺖ ﻳﺎ ﺍﻻﻣﻴﻦ .. ﺍﻧﺎ ﻭﺍﻧﺖ ﻭﺍﺣﺪ .. ﺑﺲ ﺍﻥ ﺷﺎﺀ ﺍﻟﻠﻪ ﺍﻟﺒﻴﺖ ﻋﺠﺒﻜﻢ .. ﻗﺎﻝ ﻟﻴﻬﻮ ﻭﺍﻟﻠﻪ ﻣﺎﻛﻨﺎ ﻣﺘﺨﻴﻠﻴﻦ ﺫﺍﺗﻮ ﺑﻜﻮﻥ ﺑﺎﻟﻄﺮﻳﻘﺔ ﺩﻱ .. ﻳﺎﺧﻲ ﺩﻩ ﺯﻱ ﺑﻴﺖ ﻋﻠﻰ ﻭﺩ ﺣﻤﺪ .. ﻋﻠﻲ ﻭﺩ ﺣﻤﺪ ﺩﻩ ﻣﻦ ﺍﻻﻏﻨﻴﺎﺀ ﻓﻲ ﺍﻟﺤﻠﺔ .. ﻭﺍﻳﻤﺎﻥ ﺷﻜﻠﻬﺎ ﻓﺮﺣﺎﻧﺔ ﺑﺎﻟﻮﺿﻊ .. ﻭﻣﺒﺴﻮﻃﺔ ﻣﻦ ﺍﻟﺒﻴﺖ .. ﻭﺩﺍﻳﺮﺓ ﺗﺸﻜﺮ ﻋﻄﻴﺔ ﻭﺑﺎﻗﻴﻪ ﻟﻴﻬﺎ ﺗﻘﻴﻠﺔ .. ﻗﺎﻣﺖ ﺑﺮﺍﺣﺔ ﻛﺪﺍ ﻗﺎﻟﺖ ﻟﻲ ﺍﻻﻣﻴﻦ ﺍﺷﻜﺮﻭ ﻳﺎ ﺍﻻﻣﻴﻦ .. ﺍﺩﻋﻲ ﻟﻴﻬﻮ ﺍﻋﻤﻞ ﺍﻱ ﺣﺎﺟﺔ .. ﺍﻻﻣﻴﻦ ﻗﺎﻝ ﻟﻴﻬﻮ ﻭﺍﻟﻠﻪ ﻳﺎﻋﻄﻴﺔ ﺭﺑﻨﺎ ﻳﺠﺰﻳﻚ ﺧﻴﺮ ﻳﺎﺥ .. ﻭﺍﻟﻠﻪ ﻣﺎﻗﺼﺮﺕ .. ﺍﻥ ﺷﺎﺀ ﺍﻟﻠﻪ ﻧﺨﺪﻣﻚ ﻓﻲ ﺍﻻﻳﺎﻡ ﺍﻟﻄﻴﺒﺔ .. ﻭﺍﻟﻠﻪ ﻣﻌﺮﻭﻓﻚ ﺩﻩ ﺡ ﻳﻔﻀﻞ ﺩﻳﻦ ﻓﻲ ﺭﻗﺒﺘﻲ .. ﻗﺎﻝ ﻟﻴﻬﻮ ﺩﻩ ﺷﻨﻮ ﻳﺎ ﺍﻻﻣﻴﻦ ﺍﻟﻜﻼﻡ ﺍﻟﺒﺘﻘﻮﻝ ﻓﻴﻬﻮ ﺩﻩ؟؟ ﻳﺎﺧﻲ ﻧﺤﻦ ﺍﺧﻮﺍﻥ ﺯﻱ ﺍﻭﻻﺩ ﺍﻻﻡ ﻭﺍﻻﺑﻮ .. ﺍﻫﺎ ﺍﻧﺎ ﺑﻤﺸﻲ ﺑﻲ ﻏﺎﺩﻱ .. ﺍﻟﺒﺲ ﺍﺣﺼﻞ ﺍﻟﺴﻮﻕ .. ﺍﻟﻠﻴﻠﺔ ﻣﺨﺼﻮﺹ ﻣﺎﻣﺸﻴﺖ ﻋﺸﺎﻥ ﺍﻧﺘﻮ ﺟﺎﻳﻴﻦ .. ﺍﻫﺎ ﻳﺎﺯﻭﻝ ﻋﻄﻴﺔ ﻣﺸﻰ ﻃﻮﺍﻟﻲ ﺑﻲ ﻏﺎﺩﻱ ﻟﻲ ﺑﻴﺘﻮ .. ﻣﻮﺵ ﻋﺸﺎﻥ ﻳﺒﻠﺒﺲ ﻭﺑﺲ .. ﻛﻤﺎﻥ ﻋﺸﺎﻥ ﻳﺪﻳﻬﻢ ﺭﺍﺣﺘﻬﻢ .. ﻭﺍﻟﻤﺮﺍﺓ ﺗﻤﻠﺺ ﻫﺪﻭﻣﻬﺎ ﻭﻛﺪﺍ .. ﺳﺎﻕ ﻣﻌﺎﻫﻮ ﺍﻟﺼﺎﻓﻲ ﻭﻣﺸﻰ .. ﻭﺧﻼ ﺩﻳﻞ ﺑﺮﺍﻫﻢ .. ﻭﺍﻳﻤﺎﻥ ﺑﻘﺖ ﺗﺮﺗﺐ ﻓﻲ ﺍﻟﺤﺎﺟﺎﺕ .. ﻭﺗﻨﻀﻢ ﺑﺮﺍﻫﺎ .. ﻭﺍﻟﻠﻪ ﻏﺎﻳﺘﻮ ﻋﻄﻴﺔ ﺩﻩ .. ﺍﻟﻠﻪ ﻳﺒﺎﺭﻙ ﻓﻲ ﺍﻳﺎﻣﻮ .. ﻫﺴﻊ ﻋﻠﻴﻚ ﺍﻟﻠﻪ ﻣﻦ ﻏﻴﺮﻭ ﻛﻨﺎ ﺡ ﻧﺘﺼﺮﻑ ﻛﻴﻒ .. ﻭﺑﺘﺘﻜﻠﻢ ﺑﺮﺍﺣﺔ .. ﺍﻻﻣﻴﻦ ﻣﺎﺳﺎﻣﻊ ﺣﺎﻳﻢ ﺑﺮﺓ .. ﺑﻌﺎﻳﻦ ﻟﻠﺰﻗﺎﻗﺎﺕ .. ﻭﺑﺘﻔﻘﺪ ﻓﻲ ﺍﻟﺸﺒﺎﺑﻴﻚ .. ﺑﻌﺪ ﻋﻄﻴﺔ ﻟﺒﺲ .. ﺟﺎﻫﻢ ﻳﻮﺩﻋﻬﻢ .. ﻭﺟﺎﺏ ﻣﻌﺎﻫﻮ ﺍﻟﺼﺎﻓﻲ .. ﻋﻠﻰ ﻛﻞ ﺣﺎﻝ ﺍﺳﺘﻘﺮﻭ ﻧﻔﺴﻴﺎ ﻛﺪﺍ .. ﺑﻌﺪ ﻣﺎﻃﻠﻊ ﻋﻄﻴﻪ .. ﺍﻻﻣﻴﻦ ﻃﻠﻊ ﺑﻌﺪﻭ ﺑﺸﻮﻳﺔ ﻋﻠﻰ ﺍﻟﺴﻮﻕ ﺍﻟﻘﺮﻳﺐ .. ﺳﻮﻕ ﺍﻟﺸﻤﺎﻟﻲ .. ﻭﺟﺎﺏ ﻟﻴﻬﺎ ﺍﻟﺨﺪﺍﺭ ﻭﻟﻠﺤﻤﺔ ﻭﺍﻟﻌﻴﺶ ﻭﻗﺎﻝ ﻟﻴﻬﺎ ﻇﺒﻄﻲ ﺍﻟﻐﺪﺍ ﺍﻧﺎ ﺩﺍﻳﺮ ﻟﻤﻦ ﻳﺠﻲ ﻋﻄﻴﺔ ﻳﻠﻘﺎ ﺍﻟﻐﺪﺍ ﺟﺎﻫﺰ .. ﺍﻟﺰﻭﻝ ﺩﻩ ﻛﻔﺎﻫﻮ ﻣﻦ ﺍﻛﻞ ﺍﻟﻌﺰﺍﺑﺔ ﻭﻧﺴﻮﺍﻥ ﺍﻟﺴﻮﻕ .. ﺧﺘﺎ ﻟﻴﻬﺎ ﺍﻟﺤﺎﺟﺎﺕ ﻭﺍﺧﺪ ﻟﻴﻬﻮ ﻭﻧﺴﺔ ﻣﻊ ﺍﻟﺼﺎﻓﻲ ﻭﻣﺮﻕ .. ﻓﻲ ﻧﻔﺲ ﺍﻟﻴﻮﻡ ﺯﻱ ﺍﻟﺴﺎﻋﺔ 3 ﻛﺪﺍ ﻧﺴﻮﺍﻥ ﺍﻟﺤﻠﺔ ﺍﻟﺠﻴﺮﺍﻥ ﺍﺗﻠﻤﻠﻤﻦ ﻭﺟﻦ ﻳﺴﻠﻤﻦ ﻋﻠﻴﻬﺎ ﻭﻳﺘﻌﺮﻓﻦ ﻋﻠﻴﻬﺎ .. ﻭﻛﻞ ﻭﺍﺣﺪﺓ ﺟﺎﺑﺖ ﻣﻌﺎﻫﺎ ﻏﺪﺍ .. ﻧﻈﺎﻡ ﺟﺎﺭﺓ ﺟﺪﻳﺪﺓ ﻭﻛﺪﺍ .. ﻭﺩﻱ ﻣﻴﺰﺓ ﻓﻲ ﻧﺎﺱ ﻋﻄﺒﺮﺓ ﻭﺍﻟﺪﺍﻣﺮ ﻗﺪ ﻧﺎﺩﺭﺓ ﻓﻲ ﺑﻘﻴﺔ ﺍﻟﻤﺪﻥ .. ﻗﻌﺪﻥ ﺍﺗﻮﻧﺴﻦ ﻣﻬﺎﻫﺎ ﻭﺍﺗﻐﺪﻥ ﻭﺷﺮﺑﻦ ﺍﻟﺠﺒﻨﺔ .. ﻭﺍﻟﺼﺎﻓﻲ ﻃﻠﻊ ﺍﻟﺸﺎﺭﻉ ﻣﻊ ﺍﻟﺸﻔﻊ ﻳﻠﻌﺐ .. ﻃﺒﻌﺎ ﺟﺪﻳﺪ ﻛﺮﺕ ﻋﻠﻰ ﺍﻻﻭﻻﺩ .. ﻭﻗﺎﻋﺪ ﺑﻌﻴﺪ .. ﻭﻫﻢ ﻛﺎﻧﻮ ﺑﻠﻌﺒﻮ ﻓﻲ ﻧﺺ ﺍﻟﺸﺎﺭﻉ .. ﺑﻄﻘﺸﻮ ﺍﻟﺒﻠﻲ .. ﻭﻫﻮ ﻃﺒﻌﺎ " ﺍﻟﻠﻌﺒﺔ ﺩﻱ ﻣﺎﺑﻌﺮﻓﻬﺎ .. ﻗﺎﻝ ﻟﻴﻬﻮ ﺗﻌﺎﻝ ﺍﻟﻌﺐ ﻣﻌﺎﻧﺎ .. ﻗﺎﻝ ﻟﻴﻬﻢ ﻻﻻ ﺩﻱ ﻣﺎﻧﺨﺎﺑﺮﺍ .. ﻭﺍﺣﺪ ﻗﺎﻝ ﻟﻴﻬﻢ ﻳﻌﻨﻲ ﻣﺎﺑﻌﺮﻑ ﻟﻴﻬﺎ .. ﺑﺲ ﻗﺎﻋﺪ ﻓﻲ ﺍﻟﻀﻞ ﻭﺑﺘﻔﺮﺝ ﻓﻴﻬﻢ .. ﺑﻌﺪ ﺷﻮﻳﺔ ﺟﻮ ﺷﻔﻊ ﺍﺗﻨﻴﻦ ﺳﺎﻛﻴﻦ ﻟﻴﻬﻢ ﻛﺪﻳﺴﺔ .. ﺻﻐﻴﺮﺓ ﻛﺪﺍ ﻭﺿﻌﻴﻔﺔ .. ﻣﺎﻗﺎﺩﺭﺓ ﺗﺠﺮﻱ ﻛﻮﻳﺲ .. ﺍﻟﺼﺎﻓﻲ ﻭﻗﻒ ﺑﻘﻰ ﻳﻌﺎﻳﻦ ﻟﻴﻬﻢ .. ﺩﻳﻞ ﺍﻟﺒﻠﻌﺒﻮ ﻓﻲ ﺍﻟﺒﻠﻲ ﻭﻗﻔﻮ ﺍﻟﻠﻌﺐ .. ﻭﺑﻘﻮ ﺟﺎﺭﻳﻦ ﻣﻌﺎﻫﻮ .. ﻗﺒﻀﻮ ﺍﻟﻜﺪﻳﺴﺔ .. ﻭﺍﻟﺼﺎﻓﻲ ﻳﻌﺎﻳﻦ . ﻭﺍﺣﺪ ﻓﻴﻬﻢ ﺧﺒﻄﻬﺎ ﺑﻲ ﻧﺺ ﻃﻮﺑﺔ ﻓﻲ ﺭﺍﺳﻬﺎ .. ﺍﻟﻜﺪﻳﺴﺔ ﺩﺍﺧﺖ .. ﻭﺍﻟﺼﺎﻓﻲ ﻗﺎﻝ ﻟﻴﻬﻢ .. ﻻ ﻻ ﻣﺎﺗﻜﻠﺘﻠﻮﻫﺎ ﺧﻠﻮﻫﺎ ﺗﻤﺸﻲ ﻻﻣﻬﺎ .. ﺍﻣﻬﺎ ﺑﺘﻜﻮﻥ ﺭﺍﺟﻴﺎﻫﺎ .. ﻭﺍﺣﺪ ﻗﺎﻝ ﻟﻴﻬﻮ ﺍﻣﺸﻲ ﻻﻣﻚ ﺍﻧﺖ .. ﺑﺘﻜﻮﻥ ﺭﺍﺟﻴﺎﻙ .. ﻭﺗﺎﺍﺍﺡ ﺍﺩﻭ ﺍﻟﻜﺪﻳﺴﺔ ﻃﻮﺑﺔ ﺗﺎﻧﻲ .. ﺍﻟﻜﺪﻳﺴﺔ ﺩﺷﺮﺕ ﺍﻟﺪﻡ ﺑﻲ ﺧﺸﻤﻬﺎ ﻭﻧﺨﺮﻳﻬﺎ .. ﻭﺳﻠﻤﺖ ﺍﻟﺮﻭﺡ .. ﻭﻫﻢ ﻳﻀﺤﻜﻮ .. ﻳﺎﺯﻭﻝ ﺍﻟﺼﺎﻓﻲ ﺩﻩ ﺍﻧﻔﻘﻊ ﺑﺎﻟﺒﻜﺎ .. ﻭﺩﻳﻞ ﻃﻴﺮﻭ ﻋﻴﻨﻴﻬﻢ ﺑﻘﻮ ﻳﻌﺎﻳﻨﻮ ﻟﻴﻬﻮ ﻣﺴﺘﻐﺮﺑﻴﻦ .. ﺩﻩ ﻣﺎﻟﻮ ﺩﻩ؟؟ ﺍﻟﻮﻟﺪ ﺩﻩ ﺑﻜﻰ ﺑﻜﺎ .. ﻻﻣﻦ ﻣﺨﺎﺧﻴﺘﻮ ﺳﺎﻟﻦ .. ﻭﺍﻟﺪﻣﻮﻉ ﺩﻱ ﻣﺎﺗﺪﻳﻚ ﺍﻟﺪﺭﺏ .. ﻭﻗﺎﻡ ﻣﺸﻰ ﺩﺧﻞ ﺍﻟﺒﻴﺖ ﻳﺠﻌﺮ .. ﻟﻘﻰ ﺍﻟﻨﺴﻮﺍﻥ ﺍﻟﻜﺎﻧﻦ ﻣﻊ ﺍﻣﻮ ﻳﺎﺩﻭﺏ ﻃﺎﻟﻌﺎﺕ .. ﻭﺍﺣﺪﺓ ﻣﺴﻜﺘﻮ ﺩﺍﻳﺮﺓ ﺗﺘﻜﻠﻢ ﻣﻌﺎﻫﻮ .. ﻧﺘﻞ ﻳﺪﻫﺎ ﻛﺪﺍ ﻭﺩﺧﻞ .. ﺍﻟﻤﺮﺍﺓ ﻗﺎﻟﺖ ﻟﻲ ﺭﻓﻴﻘﺘﻬﺎ ﺗﻠﻘﻰ ﺍﻻﻭﻻﺩ ﺍﻟﺒﺮﺓ ﺩﻳﻞ ﺩﻗﻮﻫﻮ .. ﺍﺻﻠﻬﻢ ﻗﻠﻴﻠﻴﻦ ﺍﺩﺏ ﻭﻣﺎﻣﺮﺑﻴﻴﻦ .. ﺩﺧﻞ ﻟﻲ ﺍﻣﻮ .. ﺍﻣﻮ ﻃﺎﻟﻌﺔ ﻣﻦ ﺍﻟﻐﺮﻓﺔ ﺷﺎﻳﻠﺔ ﻋﺪﺓ ﺍﻟﺸﺎﻱ .. ﻣﺪﺧﻼﻫﺎ ﺍﻟﻤﻄﺒﺦ .. ﺧﺘﺘﻬﺎ ﻓﻲ ﻧﺺ ﺍﻟﺤﻮﺵ .. ﻭﺟﺎﺕ ﺟﺎﺭﻳﺔ ﻋﻠﻴﻬﻮ .. ﻣﺎﻟﻚ ﻳﺎ ﺍﻟﺼﺎﻓﻲ .. ﺍﻟﺪﻗﺎﻙ ﻣﻨﻮ؟ ﻗﺎﻝ ﻟﻴﻬﺎ ﻣﺎﻓﻲ ﺯﻭﻝ ﺩﻗﺎﻧﻲ .. ﺑﺲ ﺍﻻﻭﻻﺩ ﻛﺘﻠﻮ ﺍﻟﻜﺪﻳﺴﺔ ﺍﻟﻌﻴﺎﻧﺔ .. ﻗﺎﻟﺖ ﻟﻴﻬﻮ ﻛﺘﻠﻮﻫﺎ ﻛﻴﻒ ؟ .. ﻗﺎﻝ ﻟﻴﻬﺎ ﺿﺮﺑﻮﻫﺎ ﺑﺎﻟﻄﻮﺏ ﻓﻲ ﺭﺍﺳﻬﺎ .. ﻻﻣﻦ ﻣﺎﻧﺨﺮﺗﻬﺎ ﺟﺎﺑﺖ ﺍﻟﺪﻡ .. ﺍﻳﻤﺎﻥ ﻣﺴﻜﺘﻮ ﻗﺸﺖ ﻟﻴﻬﻮ ﻭﺷﻮ ﻭﺧﺸﻤﻮ ﻭﻧﺨﺮﻳﻬﻮ ﺑﻲ ﻃﺮﻑ ﺗﻮﺑﻬﺎ .. ﺳﺒﺤﺎﻥ ﺍﻟﻠﻪ .. ‏( ﺍﻻﻡ ‏) .. ﻻ ﺑﺘﻘﺮﻑ ﻭﻻﺑﻄﻨﻬﺎ ﺑﺘﻄﻢ .. ﻭ ﻗﺎﻟﺖ ﻟﻴﻬﻮ ﺧﻼﺹ ﻣﺎﺗﺒﻜﻲ ﺩﻳﻞ ﺭﺑﻨﺎ ﺑﺤﺎﺳﺒﻬﻢ ﺑﺮﺍﻫﻢ .. ﺍﻧﺖ ﻣﺎﻛﺘﻠﺘﻬﺎ ﺍﻧﺖ ﻣﺎﻙ ﻣﻌﺎﻫﻢ .. ﻗﺎﻝ ﻟﻴﻬﺎ ﺍﻟﺤﻠﺔ ﺩﻱ ﻛﻌﺒﺔ .. ﺍﺭﺣﻜﺎﻛﻲ ﺍﻫﻠﻨﺎ .. ﻗﺎﻟﺖ ﻟﻴﻬﻮ ﺍﺻﻼ ﻣﺎ ﺡ ﻧﻘﻌﺪ ﻛﺘﻴﺮ .. ﺑﺲ ﺍﻧﺖ ﺍﺻﺒﺮ ﺷﻮﻳﺔ .. ﺍﺣﺘﻤﺎﻝ ﺍﻟﻜﺪﻳﺴﺔ ﺍﻣﻬﺎ ﺗﺠﻲ ﻋﺸﺎﻥ ﻧﺪﻳﻬﺎ ﻟﺒﻦ ﻭﻧﻤﺸﻲ ﻧﺮﺟﻊ ﺍﻫﻠﻨﺎ .. ﻗﺎﻝ ﻟﻴﻬﺎ ﻛﻮﻳﺲ .. ﻭﺷﻜﻠﻮ ﺍﻗﺘﻨﻊ ﺑﻲ ﻛﻼﻡ ﺍﻣﻮ .. ﻟﻜﻦ ﺑﺮﺿﻮ ﻣﺎﺯﺍﻝ ﺑﺘﻨﻬﺪ ﻣﻤﻐﻮﺹ .. ﻣﺸﻰ ﻃﻠﻊ ﻓﻲ ﺍﻟﺴﺮﻳﺮ .. ﺑﻲ ﺑﺎﻗﻲ ﺑﻜﺎﻫﻮ .. ﻭﻳﺘﻨﻬﺪ ﻭﺩﺧﻞ ﻓﻲ ﻧﻮﻣﺔ .. ﻭﺍﻟﻮﻛﺖ ﺩﻩ ﺍﻻﻣﻴﻦ ﻣﺎﻓﻲ .. ﻻﻧﻮ ﻟﻮ ﻛﺎﻥ ﻗﺮﻳﺐ .. ﻣﺎﺑﺴﺘﺤﻤﻞ ﻳﺴﻤﻊ ﺍﻟﺼﺎﻓﻲ ﺑﺒﻜﻲ .. ﺍﻳﻤﺎﻥ ﺧﺘﻮ ﻧﺎﻳﻢ ﻭﺩﺧﻠﺖ ﺗﺠﻬﺰ ﻓﻲ ﺍﻟﻐﺪﺍ .. ﻭﺍﻟﺴﺎﻋﺔ ﻣﺎﺷﺔ ﻋﻠﻰ ﺧﻤﺴﺔ ﻭﺷﻮﻳﺔ ﺑﻌﺪ ﺷﻮﻳﺔ ﺟﺎ ﻋﻄﻴﺔ ﺩﻕ ﺍﻟﺒﺎﺏ .. ﺍﻳﻤﺎﻥ ﻗﺎﻟﺖ ﻟﻴﻬﻮ ﻣﻨﻮ؟؟ ﻗﺎﻝ ﻟﻴﻬﺎ ﺍﻧﺎ ﻋﻄﻴﺔ ﻳﺎ ﺍﻳﻤﺎﻥ .. ﺍﻓﺘﺤﻲ ﺍﻟﺒﺎﺏ .. ﻗﺎﻟﺖ ﻟﻴﻬﻮ ﺩﻗﻴﻘﺔ ﺍﻟﻨﻠﺒﺲ ﺗﻮﺑﻲ .. ﻟﺒﺴﺖ ﺗﻮﺑﻬﺎ ﻭﺟﺎﺕ .. ﻓﺘﺤﺖ ﻟﻴﻬﻮ ﺍﻟﺒﺎﺏ .. ﺳﻠﻤﻬﺎ ﻛﻴﺴﻴﻦ .. ﻭﻗﺎﻝ ﻟﻴﻬﺎ ﻭﻳﻦ ﺍﻻﻣﻴﻦ؟؟ ﻗﺎﻟﺖ ﻟﻴﻬﻮ ﻭﺍﻟﻠﻪ ﻣﺎﻧﺨﺎﺑﺮﺍﻫﻮ .. ﻣﻦ ﺍﻟﻀﻬﺮ ﻣﺎﻓﻴﺶ .. ﻗﺎﻝ ﻟﻴﻬﺎ ﻛﻮﻳﺲ ﺍﻧﺎ ﺑﻤﺸﻲ ﺑﻲ ﻏﺎﺩﻱ ﺑﻨﺘﻈﺮﻭ ﻻﻣﻦ ﻳﺠﻲ .. ﻗﺎﻟﺖ ﻟﻴﻬﻮ ﺍﻟﻠﻪ ﻳﺒﺎﺭﻙ ﻓﻲ ﺍﻳﺎﻣﻚ ﻳﺎ ﻋﻄﻴﺔ .. ﻭﻳﺪﻳﻚ ﺍﻟﻔﻲ ﻣﺮﺍﺩﻙ .. ﻓﺘﺤﺖ ﺍﻻﻛﻴﺎﺱ .. ﻟﻘﺖ ﺍﻟﺸﻌﻴﺮﻳﺔ ﻭﺍﻟﺒﺴﻜﻮﻳﺖ ﻭﻟﺒﻦ ﺍﻟﺒﻮﺩﺭﺓ . ﻭﺻﻨﺪﻭﻕ ﺑﺘﺎﻉ ﺑﺎﺳﻄﺔ .. ﻗﻌﺪﺕ ﺗﺘﺒﺴﻢ ﺑﺮﺍﻫﺎ .. ﻗﺎﻟﺖ ﺷﻮﻑ ﻋﻄﻴﺔ .. ﺍﻟﺘﻘﻮﻝ ﺑﺎﻟﻠﻪ ﺳﻤﻊ ﺍﻟﺼﺎﻓﻲ .. ﻣﻦ ﺍﻟﺼﺒﺎﺡ ﺷﻮﻗﻮ ﻓﻲ ﺑﺎﺳﻄﺔ .. ﺑﻌﺪ ﺷﻮﻳﺔ ﺍﻻﻣﻴﻦ ﺟﺎﺀ .. ﻗﺎﻟﺖ ﻟﻴﻬﻮ ﻛﻨﺖ ﻭﻳﻦ ﻳﺎ ﺍﻻﻣﻴﻦ؟؟ .. ﻗﺎﻝ ﻟﻴﻬﺎ ﻃﻠﻌﺖ ﻛﺪﺍ ﻻﻗﺪﺍﻡ .. ﻋﻠﻰ ﺍﻟﺴﻮﻕ ﺑﺘﺎﻉ ﺣﻲ ﺍﻟﻤﻄﺎﺭ ﻗﺪﺍﻡ ﻛﺪﻱ .. ﻗﺎﻟﺖ ﻟﻴﻬﻮ ﺩﻩ ﻭﻳﻦ ﻛﻤﺎﻥ؟؟ ﻧﻌﻠﻮ ﻣﻮ ﺑﻌﻴﺪ؟؟ ﻗﺎﻝ ﻻﻻ ﻗﺮﻳﺐ .. ﻋﻨﺪﻱ ﺻﺎﺣﺒﺎ ﻟﻲ ﻗﺪﻳﻢ ﻣﺸﻴﺖ ﺍﺳﻠﻢ ﻋﻠﻴﻬﻮ .. ﺍﻻﻣﻴﻦ ﺑﻌﺮﻑ ﻋﻄﺒﺮﺓ ﻛﻮﻳﺲ .. ﻭﻓﻲ ﺍﻟﺴﻨﻮﺍﺕ ﺍﻟﻔﺎﺗﺖ ﻛﺎﻥ ﺑﺠﻲ ﻣﺮﺓ ﻣﺮﺓ .. ﻳﻌﻨﻲ ﺟﺎ ﻋﻄﺒﺮﺓ ﻛﺘﻴﺮ .. ﻟﻜﻦ ﺍﻳﻤﺎﻥ ﻣﺎﺟﺎﺕ ﻏﻴﺮ ﺗﻼﺕ ﻣﺮﺍﺕ .. ﻭﺍﺣﺪﺓ ﻟﻲ ﺑﻜﺎ ﻣﻊ ﻧﺴﻮﺍﻥ ﺷﻮﻗﺎﺭ .. ﻭﺍﺣﺪﺓ ﺟﺎﺕ ﻟﻲ ﺍﻭﺭﺍﻕ ﺛﺒﻮﺗﻴﺔ .. ﻭﺍﺣﺪﺓ ﻣﺎﻋﺎﺭﻑ ﺷﻨﻮ ﺍﻟﻤﻬﻢ .. ﻫﻮ ﺑﻌﺮﻑ ﻋﻄﺒﺮﺓ ﺍﻛﺘﺮ ﻣﻨﻬﺎ .. ﺍﻫﺎ ﺣﻜﺖ ﻟﻴﻬﻮ ﺍﻟﺤﺼﻞ ﻣﻊ ﺍﻟﺼﺎﻓﻲ ﻓﻲ ﺍﻟﺸﺎﺭﻉ .. ﻗﺎﻝ ﻟﻴﻬﺎ ﺣﺮﺍﻡ ﻋﻠﻴﻬﻢ ﻭﺍﻟﻠﻪ .. ﺍﻟﺼﺎﻓﻲ ﻭﻟﺪﻱ ﻣﻌﺎﻫﻮ ﺣﻖ .. ﻛﻴﻒ ﻳﻜﺘﻠﻮ ﺍﻟﻜﺪﻳﺴﺔ ﺍﻟﻤﺴﻜﻴﻨﺔ .. ﻫﺴﻊ ﺗﻠﻘﻴﻬﺎ ﻣﺴﻮﻳﻨﻬﺎ ﻟﻌﺒﺔ .. ﻗﺎﻟﺖ ﻟﻴﻬﻮ ﻏﺸﻴﺖ ﻋﻄﻴﺔ ﺑﻲ ﻏﺎﺩﻱ؟ ﺟﺎ ﻗﺒﺎﻟﻚ ﺑﺸﻮﻳﺔ .. ﻭﺑﻜﻮﻥ ﺟﻴﻌﺎﻥ .. ﺩﻗﻴﻘﺔ ﺍﻧﺎ ﻣﺠﻬﺰﺓ ﺍﻟﻐﺪﺍ .. ﺍﻟﻨﺪﻳﻚ ﻟﻴﻬﻮ ﺗﺸﻴﻠﻮ .. ﺗﻤﺸﻲ ﻟﻴﻬﻮ ﺑﻲ ﻏﺎﺩﻱ .. ﻭﺩﺧﻠﺖ ﻋﻠﻰ ﺍﻟﻤﻄﺒﺦ ﺣﻔﻴﺎﻧﺔ .. ﺟﺎﺕ ﺷﺎﻳﻠﺔ ﺍﻟﺼﻴﻨﻴﺔ .. ﻭﺗﺘﺒﺴﻢ ﻭﺗﻌﺎﻳﻦ ﻟﻼﻣﻴﻦ .. ﻗﺎﻝ ﻟﻴﻬﺎ ﻣﺎﻟﻚ ﻳﺎ ﺍﻳﻤﺎﻥ .. ؟ ﻗﺎﻟﺖ ﻟﻴﻬﻮ ﻣﺎﻓﻲ ﺷﻲ ﻭﺍﻟﻠﻪ .. ﺣﺎﺳﺔ ﺑﻲ ﺭﻭﺣﻲ ﻓﺮﺣﺎﻧﺔ ﺳﺎﻱ .. ﻫﺎﻙ ﺷﻴﻞ ﺍﻟﺼﻴﻨﻴﺔ . ﺍﻣﺸﻲ ﺍﻣﺸﻲ ﻭﺗﻌﺎﻝ ﺑﻘﻮﻝ ﻟﻴﻚ ﺑﻌﺪﻳﻦ .. ﺷﺎﻝ ﻣﻨﻬﺎ ﺍﻟﺼﻴﻨﻴﺔ ﻭﻣﺸﻰ ﺑﻲ ﻏﺎﺩﻱ ﻟﻲ ﻋﻄﻴﺔ .. ﻭﻗﻌﺪﻭ ﻳﺘﻐﺪﻭ ﻭﻳﺘﻮﻧﺴﻮ .. ﻋﻄﻴﺔ ﻗﺎﻝ ﻟﻴﻬﻮ ﺍﻫﺎ ﺍﻥ ﺷﺎﺀ ﺍﻟﻠﻪ ﺍﻳﻤﺎﻥ ﺍﻟﺒﻴﺖ ﻳﻜﻮﻥ ﻋﺠﺒﻬﺎ .. ﺍﻥ ﺷﺎﺀ ﺍﻟﻠﻪ ﻣﺎﺷﻜﺖ ﻣﻦ ﺣﺎﺟﺔ .. ﻗﺎﻝ ﻟﻴﻬﻮ ﻭﺍﻟﻠﻪ ﺗﻤﺎﻡ ﻣﺮﺗﺎﺣﺔ ﻭﻣﺒﺴﻮﻃﺔ ﺗﺘﺒﺴﻢ ﺑﺮﺍﻫﺎ .. ﻗﺎﻝ ﻟﻴﻬﻮ ﻭﺍﻟﻠﻪ ﺍﻳﻤﺎﻥ ﺗﺴﺘﺎﻫﻞ .. ﻭﺍﻧﺖ ﺗﺴﺘﺎﻫﻞ ﻳﺎ ﺍﻻﻣﻴﻦ .. ﺍﻧﺘﻮ ﻫﺴﻲ ﺑﻘﻴﺘﻮ ﻟﻲ ﺍﻫﻞ ﻭﺗﻘﻠﺔ .. ﺍﻧﺎ ﻣﻦ ﻣﺘﻴﻦ ﻣﺎ ﺍﻛﻠﺖ ﻟﻲ ﺍﻛﻞ ﻳﻨﻔﻌﻨﻲ .. ﺍﻻﻣﻴﻦ ﻃﺒﻌﺎ ﻣﺘﻮﻗﻊ ﺍﻧﻮ ﻋﻄﻴﺔ ﻳﻘﻮﻝ ﻟﻴﻬﻮ ﻟﻘﻴﺖ ﻟﻴﻚ ﺷﻐﻞ .. ﻭﻣﺎﺩﺍﻳﺮ ﻳﺴﺒﻖ ﺍﻟﺤﻮﺩﺍﺙ ﻭﻳﺴﺄﻟﻮ .. ﻭﻋﻄﻴﺔ ﺳﺎﻛﺖ ﻣﺴﺎﺍﺍﻓﺔ ﻛﺪﺍ .. ﻭﻗﺎﻝ ﻟﻴﻬﻮ ﻋﺎﺭﻑ ﻳﺎ ﺍﻻﻣﻴﻦ .. ﻭﺍﻟﻠﻪ ﺍﻧﺎ ﻭﺍﻗﻊ ﻓﻲ ﻣﺸﻜﻠﺔ ﻛﺒﻴﺮﺓ ﺧﻼﺹ .. ﻗﺎﻝ ﻟﻴﻬﻮ ﻣﺸﻜﻠﺔ ﺷﻨﻮ ﻳﺎﻟﻄﻴﻒ .. ﻳﺎﻟﻄﻴﻒ .. ﻭﺍﻻﻣﻴﻦ ﻭﻗﻒ ﺍﻻﻛﻞ .. ﻗﺎﻝ ﻟﻴﻬﻮ ﻭﺍﻟﻠﻪ ﻣﺸﻜﻠﺔ ﺻﻌﺒﺔ ﻳﺎ ﺍﻻﻣﻴﻦ .. ﻭﺍﻧﺎ ﻣﺎﺩﺍﻳﺮ ﻧﺎﺱ ﺍﻟﺒﻠﺪ ﻳﻌﺮﻓﻮﻫﺎ .. ﺍﺫﺍ ﺍﻧﺖ ﺑﺘﻌﺎﻫﺪﻧﻲ ﺍﻧﻚ ﺗﺴﻜﺖ ﻭﻣﺎ ﺗﺘﻜﻠﻢ .. ﺍﻧﺎ ﺑﻘﻮﻻ ﻟﻴﻚ .. ﻗﺎﻝ ﻟﻴﻬﻮ ﺍﻓﻮﻭ ﻳﺎ ﻋﻄﻴﺔ .. ﺍﻧﺖ ﻟﻮ ﺷﺎﻳﻔﻨﻲ ﻗﻮﺍﻝ ﻭﺑﺘﺎﻉ ﻛﻼﻣﺎﺕ ﻣﺎﺗﻘﻮﻻ ﻟﻲ .. ﻋﻄﻴﺔ ﻗﺎﻝ ﻟﻴﻬﻮ ﻻﻻ ﻭﺍﻟﻠﻪ .. ﺍﻧﺎ ﻭﺍﺛﻖ ﻣﻨﻚ .. ﻟﻜﻦ ﺧﺎﻳﻔﻚ ﻳﻮﻡ ﺧﺸﻤﻚ ﻳﻌﺘﺮ .. ﻭﺗﻜﻠﻢ ﺍﻳﻤﺎﻥ .. ﻭﺍﻟﻜﻼﻡ ﻛﺎﻥ ﻭﺻﻞ ﺍﻟﺤﺮﻳﻢ .. ﺗﺎﻧﻲ ﺧﻼﺹ .. ﺍﺫﺍﻋﺔ ﻟﻨﺪﻥ ﺫﺍﺗﻬﺎ ﺗﻜﻮﻥ ﻣﻘﺼﺮﺓ .. ﻗﺎﻝ ﻟﻴﻬﻮ ﻣﺎﻓﻲ ﺯﻭﻝ ﺑﻌﺮﻑ ﻣﻨﻲ ﺍﻧﺎ ﻳﺎ ﻋﻄﻴﺔ .. ﻗﻮﻝ ﺑﺲ ﺍﻟﻤﺸﻜﻠﺔ ﺷﻨﻮ؟ ﻭﺍﻧﺎ ﺑﻘﺪﺭ ﺍﺳﺎﻋﺪﻙ ﺑﺸﻨﻮ؟ ﻗﺎﻝ ﻟﻴﻬﻮ ﻃﺒﻌﺎ " ﺍﻧﺖ ﻋﺎﺭﻑ ﻳﺎ ﺍﻻﻣﻴﻦ .. ﺍﻧﺎ ﺧﻄﺒﺖ ﺳﻠﻤﻰ ﺑﺖ ﻧﻔﻴﺴﻪ ﻗﺒﻞ ﺳﻨﺘﻴﻦ .. ﻭﺟﻴﺖ ﻋﻄﺒﺮﺓ ﻫﻨﺎ ﻋﺸﺎﻥ ﺍﺩﺑﺮ ﺍﻣﻮﺭﻱ .. ﻭﺍﻟﺤﻤﺪ ﻟﻠﻪ ﺍﻟﺸﻐﻞ ﻣﺸﻰ ﻣﻌﺎﻱ ﺗﻤﺎﻡ ﻭﺍﺷﺘﻐﻠﺖ ﺑﺎﻟﻤﻼﻳﻴﻦ .. ﻟﻜﻦ ﻓﻲ ﺍﻟﻔﺘﺮﺓ ﺍﻻﺧﻴﺮﺓ ﺍﻭﺿﺎﻋﻲ ﺍﺗﻠﺨﺒﻄﺖ . ﻭﺗﺠﺎﺭﺗﻲ ﺑﻘﺖ ﺗﻤﺸﻲ ﻓﻲ ﺍﻟﻨﺎﺯﻝ . ﺍﻫﺎ ﻳﺎﺯﻭﻝ ﻋﻠﻰ ﺣﺴﺐ ﺳﻤﻌﺘﻲ ﺑﺘﺎﻋﺔ ﺯﻣﺎﻥ . ﺍﻱ ﺯﻭﻝ ﺩﺍﻳﺮ ﻳﺴﺘﺜﻤﺮ ﻗﺮﻭﺷﻮ ﺑﺠﻴﻨﻲ .. ﻓﻲ ﻭﺍﺣﺪ ﻛﺎﻥ ﻣﻌﺎﻧﺎ ﻫﻨﺎ ﻓﻲ ﺍﻟﺴﻮﻕ .. ﺍﺳﻤﻮ ﻣﻮﺳﻰ .. ﻭﺯﻭﻝ ﺻﺎﺣﺒﻲ ﻭﺑﺜﻖ ﻓﻴﻨﻲ ﺟﺪﺍ ﺟﺪﺍ . ﺍﻟﺰﻭﻝ ﺳﺎﻓﺮ ﺍﻟﺨﻠﻴﺞ ﻭﺭﺳﻞ ﻟﻲ ﻗﺮﻭﺵ ﻛﺘﻴﺮﺓ .. ﻗﺎﻝ ﻟﻲ ﺩﺍﻳﺮﻙ ﺗﺸﺘﺮﻱ ﻟﻲ ﺗﻼﺕ ﻗﻄﻊ ﺍﺭﺑﻌﺔ ﻗﻄﻊ ﻓﻲ ﺣﻲ ﺍﻟﻤﻄﺎﺭ .. ﻗﺪﺭ ﻣﺎﺗﺠﻴﺐ ﺍﻟﻘﺮﻭﺵ ﺩﻱ ﺑﺲ .. ﺍﻫﺎ ﺍﻧﺎ ﻋﻠﻰ ﺑﻼﺩﺗﻲ ﻭﻏﺒﺎﻱ .. ﻗﻠﺖ ﻳﺎﺯﻭﻝ ﺍﻧﺎ ﺍﺣﺎﻭﻝ ﺍﺳﺘﻔﻴﺪ ﻣﻦ ﺍﻟﻘﺮﻳﺸﺎﺕ ﺩﻳﻞ .. ﻗﺒﻞ ﻣﺎ ﺍﺷﺘﺮﻱ ﺍﻟﻘﻄﻊ .. ﻓﻲ ﻭﺍﺣﺪ ﻣﻦ ﻧﺎﺱ ﺍﻟﺸﺮﻕ ﺩﻳﻞ .. ﻛﺎﻥ ﻋﻨﺪﻭ ﺷﺎﺣﺔ ﻣﺎﻥ ﺑﻲ ﻣﻘﻄﻮﺭﺓ .. ﻭﻛﺎﻥ ﻋﻨﺪﻭ ﻇﺮﻭﻑ ﻋﺎﺭﺿﻬﺎ ﺑﻲ ﺳﻌﺮ ﻣﻐﺮﻱ ﺷﺪﻳﺪ .. ﺍﻧﺎ ﻃﻮﺍﻟﻲ ﺍﺗﻮﻛﻠﺖ ﻋﻠﻰ ﺍﻟﻠﻪ .. ﻭﻛﻠﻤﺖ ﺍﺻﺤﺎﺑﻲ ﺍﺗﻨﻴﻦ ﺳﻤﺎﺳﺮﺓ .. ﻭﺍﺗﻔﻘﻮ ﻣﻌﺎﻫﻮ ﻭﺍﺷﺘﺮﻳﺖ ﺍﻟﺸﺎﺣﻨﺔ .. ﺍﻧﺎ ﺍﺻﻼ ﻣﺎﻛﻨﺖ ﻋﺎﻳﺰ ﺍﺷﻐﻼ .. ﺑﺲ ﻗﻠﺖ ﺍﺑﻴﻌﻬﺎ ﺳﺮﻳﻊ ﻭﺍﺳﺘﻔﻴﺪ ﻣﻦ ﺍﻟﻔﺎﻳﺪﺓ . ﻭﺍﺷﺘﺮﻱ ﻟﻤﻮﺳﻰ ﻗﻄﻌﻮ .. ﺍﻫﺎ ﻳﺎﺯﻭﻝ ﺍﻟﺒﻴﻌﺔ ﺗﻤﺖ .. ﻭﻛﺎﻧﺖ ﺑﺎﻟﻨﺴﺒﺔ ﻟﻲ ﻓﺮﺣﺔ ﺷﺪﻳﺪﺓ .. ﻭﺑﻘﻴﺖ ﻣﻊ ﻧﺎﺱ ﻫﺎﺷﻢ ﺍﻟﺴﻤﺴﺎﺭ .. ﻳﺸﻮﻑ ﻟﻲ ﻟﻴﻬﺎ ﺑﻴﻌﺔ . ﻭﻓﻌﻼ ﻫﺎﺷﻢ ﺑﻌﺪ ﺍﺳﺒﻮﻉ ﺑﺲ .. ﻗﺎﻝ ﻟﻲ ﻋﻨﺪﻱ ﺯﻭﻝ ﺛﻘﺔ .. ﺣﻴﺸﺘﺮﻱ ﺍﻟﻌﺮﺑﻴﺔ ﺑﻲ ﺷﻴﻚ ﻣﺪﺗﻮ ﺷﻬﺮ .. ﻟﻜﻦ ﺑﺘﻜﻮﻥ ﻗﺮﻭﺷﻬﺎ ﻛﺘﻴﺮﺓ ﺷﺪﻳﺪ .. ﻭﺍﻧﺎ ﻃﺒﻌﺎ ﺍﺻﺎﺑﻨﻲ ﺍﻟﻄﻤﻊ .. ﻭﺑﻌﺘﻬﺎ ﻟﻴﻬﻮ ﺑﻲ ﺷﻴﻚ .. ﻋﻠﻰ ﺣﺴﺐ ﺛﻘﺔ ﻫﺎﺷﻢ .. ﻭﻫﺎﺷﻢ ﺍﻧﺎ ﻭﺍﺛﻖ ﻓﻴﻬﻮ .. ﻭﻟﻤﻦ ﺟﺎ ﻣﻮﺍﻋﻴﺪ ﺍﻟﺸﻴﻚ .. ﺍﺗﻔﺎﺟﺎﺕ ﺍﻧﻮ ﺍﻟﺰﻭﻝ ﺍﻻﺷﺘﺮﻱ ﺍﻟﻌﺮﺑﻴﺔ , ﻓﻲ ﺍﻟﺴﺠﻦ ﻣﻄﻠﻮﺏ ﻣﻴﺎﺕ ﺍﻟﻤﻼﻳﻴﻦ .. ﺍﻧﺎ ﺧﻼﺹ ﻭﻛﺖ ﻋﺮﻓﺖ ﻛﺪﺍ ﻗﻨﻌﺖ ﻣﻦ ﺍﻟﻘﺮﻭﺵ . ﻭﺍﻟﻠﻪ ﺣﺼﻠﺖ ﻟﻲ ﺣﺎﻟﺔ ﻗﺮﺑﺖ ﺍﺟﻦ .. ﻭﺑﻘﻴﺖ ﻣﻨﺘﻈﺮ ﻣﻊ ﺍﻟﻨﺎﺱ ﺍﻟﻤﻨﺘﻈﺮﻳﻦ .. ﺍﻟﺰﻭﻝ ﻓﻲ ﺍﻟﺴﺠﻦ ﺣﺼﻠﺖ ﻟﻴﻬﻮ ﺻﺪﻣﺔ ﺳﻜﺮﻱ ﻭﻣﺎﺕ .. ﻭﺍﻟﻨﺎﺱ ﻛﻠﻬﻢ ﻋﻔﻮ ﻗﺮﻭﺷﻬﻢ .. ﻭﺍﻧﺎ ﺑﻘﻰ ﻣﺎﻋﻨﺪﻱ ﺣﻞ .. ﻭﻣﺎﻋﺮﻓﺖ ﺍﺳﻮﻱ ﺷﻨﻮ .. ﻭﺍﻟﻠﻪ ﻗﺮﺑﺖ ﺍﻃﺶ ﻣﻦ ﺍﻟﺒﻠﺪ .. ﻭﺍﻏﻴﺐ .. ﻃﺒﻌﺎ ﺍﻟﻘﺮﻭﺵ ﻛﺘﻴﺮﺓ .. ﻭﺍﻧﺎ ﺑﻀﺎﻋﺘﻲ ﺍﻟﻔﻲ ﺍﻟﺪﻛﺎﻥ ﻣﺎ ﺑﺘﺴﻮﻱ ﺍﻟﺤﺒﺔ .. ﻭﺍﻟﻠﻪ ﺭﺍﺳﻲ ﺷﺎﻃﺐ ﺷﻄﺒﺔ ﻳﺎ ﺍﻻﻣﻴﻦ ﺍﻻﻛﻞ ﻭﺍﻟﻨﻮﻡ ﻏﺎﻟﺒﻨﻲ .. ﻭﻟﻐﺎﻳﺔ ﻫﺴﻲ ﻣﻮﺳﻰ ﻣﺎﻋﺎﺭﻑ ﺍﻟﻘﺼﺔ ﺩﻱ .. ﻭﻛﻞ ﻣﺎﻳﻘﻮﻝ ﻟﻲ ﺍﺷﺘﺮﻳﺖ ﺍﻟﻘﻄﻊ .. ﺑﻘﻮﻝ ﻟﻴﻬﻮ ﺷﻮﻳﺔ ﻛﺪﺍ .. ﻣﺮﺓ ﺑﻘﻮﻝ ﻟﻴﻬﻮ ﻣﺎﻟﻘﻴﺖ ﺍﻟﺸﻲ ﺍﻟﻤﻨﺎﺳﺐ .. ﻭﻣﺮﺓ ﺑﻘﻮﻝ ﻟﻴﻬﻮ ﺍﻟﻘﻄﻊ ﻣﺮﺗﻔﻌﺔ .. ﺧﻠﻴﻬﺎ ﺗﻨﺰﻝ ﺷﻮﻳﺔ .. ﻫﺴﻲ ﺍﻟﻜﻼﻡ ﻟﻴﻬﻮ ﺷﻬﺮﻳﻦ .. ﻭﺍﻟﻠﻪ ﺍﻧﺎ ﻣﻬﺪﺩ ﺑﺎﻟﺴﺠﻦ .. ﻭﻟﻮ ﺑﻌﺖ ﺍﻣﻲ ﻭﺍﺑﻮﻱ ﻣﺎ ﺍﻇﻨﻲ ﺍﻗﺪﺭ ﺍﺳﺪﺩ ﺍﻟﻤﻮﺿﻮﻉ ﺩﻩ .. ﻳﺎﺯﻭﻝ ﺍﻻﻣﻴﻦ ﻭﻗﻒ ﺍﻻﻛﻞ ﻭﻗﻌﺪ ﻓﻲ ﺍﻟﻮﺍﻃﺔ .. ﻭﻗﺎﻝ ﻟﻴﻬﻮ ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ .. ﺩﻩ ﺷﻨﻮ ﻳﺎ ﻋﻄﻴﺔ ﺍﻟﺴﻮﻳﺘﻮ ﺩﻩ .. ﺩﻱ ﻋﻤﻠﻴﺔ ﺗﻌﻤﻼ ﻓﻲ ﺻﺎﺣﺒﻚ ﺍﻟﻮﺛﻖ ﻓﻴﻚ؟ ﺍﻧﺖ ﻛﻴﻒ ﺗﺘﺼﺮﻑ ﻓﻲ ﺍﻣﺎﻧﺔ ﺍﺩﻭﻙ ﻟﻴﻬﺎ ؟ ﺍﻧﺖ ﻛﻴﻒ ﺗﺒﻴﻊ ﻭﺗﺸﺘﺮﻱ ﻓﻲ ﻗﺮﻭﺵ ﻣﺎﺣﻘﺘﻚ ﻭﻣﻦ ﺩﻭﻥ ﺍﺫﻥ ﺻﺎﺣﺒﻬﺎ ؟ ﻛﻤﺎﻥ ﺗﺒﻴﻊ ﺑﺎﻟﺸﻴﻚ؟ .. ﻭﺍﻟﻠﻪ ﻛﻼﻣﻚ ﺩﻩ ﺟﺎﺏ ﺣﻤﻰ ﻋﺪﻳﻞ .. ﻋﻄﻴﺔ ﻗﺎﻝ ﻟﻴﻬﻮ ﻳﺎ ﺍﻻﻣﻴﻦ .. ﻫﺴﻲ ﺍﻟﻠﻮﻡ ﻣﺎﻣﻨﻮ ﻓﺎﻳﺪﺓ .. ﺍﻟﺤﺼﻞ ﺣﺼﻞ .. ﺑﺲ ﻫﺴﻲ ﺍﻧﺎ ﻣﺎﻋﺎﺭﻑ ﺍﺗﺼﺮﻑ ﻛﻴﻒ .. ﺷﻮﻑ ﻟﻲ ﺣﻞ .. ﺍﻧﺎ ﻛﻠﻤﺘﻚ ﻋﺸﺎﻥ ﺗﺸﻮﻑ ﻟﻲ ﺣﻞ .. ﻗﺎﻝ ﻟﻴﻬﻮ ﺍﻧﺎ ﻟﻮ ﻋﻨﺪﻱ ﺣﻞ ﻟﻲ ﻗﺮﻭﺵ ﻗﺪﺭ ﺩﻱ .. ﻛﺎﻥ ﺍﻏﻨﻴﺖ ﺑﻴﻬﺎ ﺭﻭﺣﻲ . ﺍﺷﻮﻑ ﻟﻚ ﺣﻞ ﻣﻦ ﻭﻳﻦ ﻋﺎﺩ؟ .. ﺷﻴﻞ ﺷﻴﻠﺘﻚ ﻭﺍﺳﺘﺤﻤﻞ ﻣﺴﺆﻭﻟﻴﺘﻚ .. ﻭﺍﻟﻠﻪ ﺩﻱ ﻣﺸﻜﻠﺔ ﻓﻌﻼ ﻳﺎﻋﻄﻴﺔ .. ﺩﻱ ﻣﺼﻴﺒﺔ ﺷﻨﻮ ﺩﻱ ؟ ﻭﻗﻌﺪﻭ ﺍﻻﺗﻨﻴﻦ ﻣﺤﺘﺎﺭﻳﻦ .. ﻭﺧﻠﻮ ﺍﻻﻛﻞ ﻓﻲ ﻣﺤﻠﻮ .. .. ﺑﻲ ﻫﻨﺎﻙ ﺍﻟﺼﺎﻓﻲ ﺻﺤﺎ ﻣﻦ ﺍﻟﻨﻮﻡ .. ﻭﻗﺎﻝ ﻟﻲ ﺍﻣﻮ ﻳﻤﺔ ﺍﺑﻮﻱ ﻭﻳﻨﻮ؟ . ﻗﺎﻟﺖ ﻟﻴﻬﻮ ﺷﺎﻝ ﺍﻟﻐﺪﺍ ﻭﻣﺸﻰ ﻟﻲ ﻋﻤﻚ ﻋﻄﻴﺔ ﺑﻲ ﻏﺎﺩﻱ .. ﺍﻧﺖ ﻣﺎﺟﻴﻌﺎﻥ ؟ ﻗﺎﻝ ﻟﻴﻬﺎ ﺍﻱ ﺟﻴﻌﺎﻥ . ﻗﺎﻟﺖ ﻟﻴﻬﻮ ﺧﻼﺹ ﺍﻣﺸﻲ ﺍﻛﻞ ﻣﻌﺎﻫﻢ . ﻃﻮﺍﻟﻲ ﻗﺎﻡ ﺟﺎﺭﻱ ﺣﻔﻴﺎﻥ .. ﻣﺮﻕ ﺑﺎﻟﺒﺎﺏ ﺩﻩ .. ﻭﺩﺧﻞ ﺑﺎﻟﺒﺎﺏ ﺍﻟﺘﺎﻧﻲ .. ﻭﺍﺑﺎ ﻳﻌﺎﻳﻦ ﻓﻲ ﺍﻻﺗﺠﺎﻩ ﺍﻟﻐﺮﺑﻲ ﺍﻟﻜﺎﻥ ﻓﻴﻬﻮ ﺍﻻﻭﻻﺩ .. ﺑﺲ ﺟﺎﺭﻱ ﻭﺗﻮﺵ ﺍﻧﻘﻄﻊ ﻓﻲ ﺑﺎﺏ ﺑﻴﺖ ﻋﻄﻴﺔ .. ﺩﺧﻞ ﻭﻃﻮﺍﻟﻲ ﻋﻠﻰ ﺍﻟﺼﻴﻨﻴﺔ .. ﺩﺍﻳﺮ ﻳﺎﻛﻞ .. ﺍﺑﻮﻫﻮ ﻗﺒﺾ ﻟﻴﻬﻮ ﻳﺪﻭ ﻗﺒﻞ ﻣﺎ ﺗﺼﻞ ﺍﻻﻛﻞ .. ﻭﺳﺎﻗﻮ ﺑﺮﺓ ﻏﺴﻞ ﻟﻴﻬﻮ ﻳﺪﻭ .. ﻭﺟﺎﺑﻮ ﺍﻛﻞ .. ﺑﻴﺎﻛﻞ ﻭﺑﻌﺎﻳﻦ ﻻﺑﻮﻫﻮ .. ﻭﺑﻌﺎﻳﻦ ﻟﻲ ﻋﻄﻴﺔ .. ﻭﺍﻟﻠﻘﻤﺔ ﻓﻲ ﺧﻤﺸﻤﻮ ﺑﻌﻤﻞ ﺍﻣﻤﻢ .. ﺍﺑﻮﻫﻮ ﻗﺎﻝ ﻟﻴﻬﻮ ﻓﻲ ﺷﻨﻮ ﻳﺎ ﺍﻟﺼﺎﻓﻲ ﻣﺎﻟﻚ؟ ﺍﻟﺼﺎﻓﻲ ﻣﺪﺍ ﻟﻴﻬﻮ ﻳﺪﻭ ﺍﻟﺸﻤﺎﻝ ﻛﺪﺍ .. ﻭﺟﻤﻊ ﺍﺻﺎﺑﻌﻴﻬﻮﺍﻟﺼﻐﻴﺮﻭﻧﺎﺕ ﺩﻳﻚ ﻣﻊ ﺑﻌﺾ . ‏( ﻳﻌﻨﻲ ﺩﻗﻴﻘﺔ ﺩﻗﻴﻘﺔ .. ﺍﺧﻠﺺ ﺍﻟﻠﻘﻤﺔ ﺍﻟﻔﻲ ﺧﺸﻤﻲ ﻭﺍﺗﻜﻠﻢ ‏) ﻫﻪ . ﺍﺑﻮﻫﻮ ﻗﺎﻝ ﻟﻴﻬﻮ ﻛﻮﻳﺲ ﺧﻠﺺ .. ﻭﻋﻄﻴﺔ ﺑﻘﻰ ﻳﻀﺤﻚ .. ﻗﺎﻝ ﻭﺍﻟﻠﻪ ﻏﺎﻳﺘﻮ ﺍﻻﻃﻔﺎﻝ ﺩﻳﻞ ﻧﻌﻤﺔ .. ﺷﻮﻑ ﺑﺎﻟﻠﻪ ﺍﻟﺼﺎﻓﻲ ﺧﻼﻧﻲ ﺍﺿﺤﻚ ﻓﻲ ﻗﻤﺔ ﺍﻟﻬﻢ .. ﺍﻟﺼﺎﻓﻲ ﺑﻠﻊ ﺍﻟﻠﻘﻤﺔ .. ﻭﺷﺎﻝ ﻧﻔﺴﻮ ﻛﺪﺍ ﻗﺎﻝ ﺍﺣﺤﺎ .. ﺷﻔﺖ ﻳﺎ ﺍﺑﻮﻱ .. ﺍﻧﺎ ﻋﺮﻓﺘﻜﻢ ﺍﻧﺘﻮ ﺍﻻﺗﻨﻴﻦ ﺯﻋﻼﻧﻴﻦ .. ﺍﻧﺘﻮ ﻛﻨﺘﻮ ﺑﺘﺘﺸﺎﻛﻠﻮ؟ ﻗﺎﻝ ﻟﻴﻬﻮ ﻻﻻ ﺍﺑﺪﺍ ﻳﺎ ﺍﻟﺼﺎﻓﻲ .. ﻟﻜﻦ ﻧﺤﻦ ﻋﻨﺪﻧﺎ ﻣﺸﻜﻠﺔ .. ﺩﺍﻳﺮﻳﻦ ﻣﺴﺎﻋﺪﻩ ﻣﻦ ﺭﺑﻨﺎ ﺑﺲ ﻳﺎﻭﻟﺪﻱ .. ﺍﻟﺼﺎﻓﻲ ﻗﺎﻝ ﻟﻴﻬﻮ ﺍﻣﻲ ﻗﺎﻟﺖ ﺍﻟﺪﺍﻳﺮ ﻣﺴﺎﻋﺪﺓ ﻣﻦ ﺭﺑﻨﺎ .. ﻳﺴﺎﻋﺪ ﺍﻟﻨﺎﺱ . ﻋﻄﻴﺔ ﻗﺎﻝ ﻟﻴﻬﻮ ﻣﺎﺷﺎﺀ ﺍﻟﻠﻪ ﻳﺎ ﺍﻻﻣﻴﻦ .. ﻭﻟﺪﻙ ﺑﺘﻜﻠﻢ ﻛﻼﻡ ﺍﻛﺒﺮ ﻣﻦ ﻋﻤﺮﻭ .. ﻗﺎﻝ ﻟﻴﻬﻮ ﻳﺎﺧﻲ ﺩﻩ ﺑﺴﺄﻝ ﺳﺆﺍﻝ ﻧﻜﻴﺮ .. ﺍﻱ ﺣﺎﺟﺔ ﻻﺯﻡ ﻳﺴﺄﻝ ﻣﻨﻬﺎ ﻭﻳﻌﺮﻓﺎ .. ﻗﺎﻝ ﻟﻴﻬﻮ ﺩﻱ ﺍﺣﺴﻦ ﺣﺎﺟﺔ ﻓﻲ ﺍﻻﻃﻔﺎﻝ .. ﺍﻻﺳﺌﻠﺔ ﺍﻟﻜﺘﻴﺮﺓ ﺑﺘﻔﺘﺢ ﻟﻴﻬﻢ ﺍﻣﺨﺎﺧﻢ .. ﺑﺲ ﺍﻧﺘﻮ ﻣﺎﺗﺰﻫﺠﻮ ﻭﺗﻀﺎﻳﻘﻮ ﻣﻦ ﺍﻟﺴﺆﺍﻻﺕ .. ﻗﺎﻝ ﻟﻴﻬﻮ ﻭﺍﻟﻠﻪ ﺍﻧﺎ ﻓﻲ ﻫﻤﻲ .. ﻟﻜﻦ ﺍﻣﻮ ﺑﺘﺠﺎﻭﺏ ﻟﻴﻬﻮ ﺍﻱ ﺳﺆﺍﻝ .. ﻭﺍﻻﺭﺑﻌﺔ ﻭﻋﺸﺮﻳﻦ ﺳﺎﻋﺔ ﺑﺘﻮﺻﻲ ﻓﻴﻬﻮ .. ﺍﻟﺘﻘﻮﻝ ﺑﺎﻟﻠﻪ ﻣﺴﺎﻓﺮﺓ .. ﺍﻟﺼﺎﻓﻲ ﻗﺎﻃﻌﻬﻢ ﺗﺎﻧﻲ .. ﻗﺎﻟﻴﻬﻮ ﻋﻤﻮ ﻋﻄﻴﺔ ﻋﻤﻮ ﻋﻄﻴﺔ .. ﺍﻗﻮﻝ ﻟﻴﻚ ﺣﺎﺟﺔ ؟ ﻗﺎﻝ ﻟﻴﻬﻮ ﺍﻳﻮﺓ ﻗﻮﻝ ﻳﺎ ﺍﻟﺼﺎﻓﻲ .. ﻗﺎﻝ ﻟﻴﻬﻮ ﻟﻮ ﺍﻟﺰﻭﻝ ﻗﺎﻝ ﻛﻼﻡ ﻇﻨﻮﻥ ﺑﻠﻘﻰ ﺍﻟﺤﺎﺟﺔ ﺍﻟﺮﺍﻳﺤﺔ .. ﻗﺎﻟﻴﻬﻮ ﻛﻼﻡ ﻇﻨﻮﻥ ﺩﻩ ﺷﻨﻮ ﻳﺎ ﺍﻟﺼﺎﻓﻲ؟ .. ﻗﺎﻝ ﻟﻴﻬﻮ ﺍﻧﺎ ﻧﺴﻴﺘﻮ ﺑﺲ .. ﻗﺎﻟﺘﻮ ﻟﻲ ﺍﻣﻲ .. ﻟﻜﻦ ﺧﻠﻴﻨﻲ ﺍﺷﺒﻊ ﻭﺍﻣﺸﻲ ﺍﺳﺄﻟﻬﺎ ﺗﺎﻧﻲ .. ﻗﺎﻝ ﻟﻴﻬﻮ ﺧﻼﺹ ﺍﺷﺒﻊ ﻭﺍﻣﺸﻲ ﺍﺳﺄﻟﻬﺎ .. ﻋﻄﻴﺔ ﻗﺎﻝ ﻟﻼﻣﻴﻦ ﻭ ﻛﻼﻡ ﻇﻨﻮﻥ ﺩﻩ ﺷﻨﻮ ﻳﺎ ﺍﻻﻣﻴﻦ ؟ ﺍﻻﻣﻴﻦ ﻗﺎﻝ ﻟﻴﻬﻮ ﺷﻦ ﺧﺒﺮﻧﻲ ﻫﻪ .. ﺍﻟﺼﺎﻓﻲ ﺑﻠﻊ ﺍﻟﻠﻘﻤﺔ .. ﻭﻗﺎﻝ ﻟﻲ ﻋﻄﻴﺔ ﻗﺎﻟﻮ ﻟﻴﻚ ﻣﺎﺗﺴﺘﻌﺠﻞ .. ﺍﺻﺒﺮ ﺍﺻﺒﺮ ﺍﻟﻨﺸﺒﻊ .. ﺍﻻﺗﻨﻴﻦ ﺿﺤﻜﻮ .. ﻭﻗﺎﻝ ﻟﻴﻬﻮ ﺧﻼﺹ ﺭﺍﺟﻨﻚ ﻳﺎ ﺍﻟﺼﺎﻓﻲ .. ﺍﻟﻤﻬﻢ ﺍﻟﺼﺎﻓﻲ ﺑﻌﺪ ﺷﺎﻝ ﺍﺧﺮ ﻟﻘﻤﺔ .. ﻭﺍﺑﻮﻫﻮ ﺳﺎﻗﻮ ﻋﺸﺎﻥ ﻳﻐﺴﻞ ﻟﻴﻬﻮ ﻳﺪﻭ .. ﺍﻟﺼﺎﻓﻲ ﺑﻘﻰ ﻳﺘﻜﻠﻢ ﺑﺮﺍﻫﻮ .. ﺯﻱ ﺍﻟﺒﻘﻮﻝ ﻟﻴﻬﻮ ﻓﻲ ﻧﻐﻤﺔ ﻛﺪﺍ ﺑﻘﻮﻝ .. ﺍﻟﻤﺴﺘﻌﺠﻞ ﻭﻗﻊ ﻣﺘﻜﻨﺠﻞ .. ﻭﺍﻟﻀﻴﺎﻕ ﺧﻨﻘﻮ ﺍﻟﻔﺎﻕ .. ‏( ﺍﻟﻔﺎﻕ : ﺍﺑﻮ ﺍﻟﺸﻬﻴﻖ ‏) .. ﺍﻟﻤﺴﺘﻌﺠﻞ ﻭﻗﻊ ﻣﺘﻜﻨﺠﻞ .. ﻭﺍﻟﻀﻴﺎﻕ ﺧﻨﻘﻮ ﺍﻟﻔﺎﻕ .. ﻋﻄﻴﺔ ﻗﺎﻝ ﻟﻴﻬﻮ ﻭﺍﻟﻠﻪ ﻳﺎﻭﻟﺪﻱ ﻛﻼﻣﻚ ﺻﺎﺡ .. ﺍﻧﺎ ﺑﻼ ﺍﻻﺳﺘﻌﺠﺎﻝ ﻭﺍﻟﻀﻴﻖ .. ﺷﻲ ﺳﻮﺍﻫﺎ ﻓﻴﻨﻲ ﻣﺎﻓﻲ .. ﺍﻟﻜﻼﻡ ﺩﻩ ﺷﻨﻮ ﺍﻟﺒﺘﻘﻮﻝ ﻓﻴﻬﻮ ﺩﻩ ﻳﺎ ﺍﻟﺼﺎﻓﻲ؟؟ .. ﻗﺎﻝ ﻟﻴﻬﻮ ﺩﻩ ﺑﺘﻘﻮﻟﻮ ﻟﻲ ﺍﻣﻲ .. ﻻﻣﻦ ﺍﻛﻮﻥ ﺟﻴﻌﺎﻥ ﻭﺑﺒﻜﻲ ﻟﻼﻛﻞ .. ﺑﺘﻘﻮﻝ ﻟﻲ ﺍﻟﻤﺴﺘﻌﺠﻞ ﻭﻗﻊ ﻣﺘﻜﻨﺠﻞ .. ﻭﺍﻟﻀﻴﺎﻕ ﺧﻨﻘﻮ ﺍﻟﻔﺎﻕ .. ﻭﻣﺎﻛﻤﻞ ﻛﻼﻣﻮ ﻗﺎﻡ ﺟﺎﺭﻱ ﺗﺎﻧﻲ ﺑﻴﻐﺎﺩﻱ ﻟﻲ ﺍﻣﻮ .. ﻗﺎﻝ ﻟﻴﻬﺎ ﻳﻤﺔ ﻳﻤﺔ .. ﻛﻼﻡ ﻇﻨﻮﻥ ﺷﻨﻮ .. ؟؟ ﻗﺎﻟﺖ ﻟﻴﻬﻮ ﻣﺎ ﻛﻼﻡ ﻇﻨﻮﻥ .. ﺩﻋﻮﺓ ﺫﻭﺍﻟﻨﻮﻥ .. ﺍﻧﺖ ﺍﻱ ﻛﻼﻡ ﺗﺤﻮﻟﻮ .. ﻗﺎﻝ ﻟﻴﻬﺎ ﺧﻼﺱ ﺧﻼﺱ ﻫﻮ ﺷﻨﻮ ﺑﺲ؟ .. ﻗﺎﻟﺖ ﻟﻴﻬﻮ ﺣﻔﻈﺘﻚ ﻟﻴﻬﻮ ﺯﻣﺎﺍﺍﻥ .. ﻻ ﺍﻟﻪ ﺍﻻ ﺍﻧﺖ ﺳﺒﺤﺎﻧﻚ ﺍﻧﻲ ﻛﻨﺖ ﻣﻦ ﺍﻟﻈﺎﻟﻤﻴﻦ .. ﺍﻟﺴﺄﻟﻚ ﻣﻨﻪ ﻣﻨﻮ ﻳﺎ ﺍﻟﺼﺎﻓﻲ ﺍﻟﻜﻼﻡ ﺩﻩ ؟ ﻗﺎﻝ ﻟﻴﻬﺎ ﻋﻤﻮ ﻋﻄﻴﺔ ﻋﻤﻮ ﻋﻄﻴﺔ .. ﻭﻫﻮ ﺟﺎﺭﻱ ﻋﻠﻰ ﺍﻟﺒﺎﺏ .. ﻃﻠﻊ ﻭﻟﻒ ﺑﺎﻟﺸﺎﺭﻉ ﺗﺎﺍﺍﻧﻲ .. ﻭﺩﻓﺮ ﺍﻟﺒﺎﺏ ﺑﺘﺎﻉ ﻋﻄﻴﺔ ﺑﻲ ﻧﻔﺲ ﺳﺮﻋﺘﻮ ﺍﻟﺠﺎﺭﻱ ﺑﻴﻬﺎ .. ﻋﻤﻮ ﻋﻄﻴﻪ ﻋﻤﻮ ﻋﻄﻴﺔ .. ﻗﺎﻟﺖ ﻟﻴﻚ ﺩﻋﻮﺓ ﺯﻭﻝ ﻧﻮﻥ .. ﻻ ﺍﻟﻪ ﺍﻻ ﺍﻧﺖ ﺳﺒﺤﺎﻧﻚ ﺍﻧﻲ ﻛﻨﺖ ﻣﻦ ﺍﻟﻈﺎﻟﻤﻴﻦ .. ﻋﻄﻴﺔ ﻗﺎﻝ ﻟﻴﻬﻮ ﻭﺍﻟﻠﻪ ﻳﺎ ﺍﻻﻣﻴﻦ ﺗﺒﺎﺭﻙ ﺍﻟﻠﻪ .. ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﻘﺴﻢ ﻟﻴﻨﺎ ﺣﺮﻳﻢ ﺯﻱ ﺍﻳﻤﺎﻥ .. ﺭﺑﻨﺎ ﻳﺤﻔﻈﻬﺎ .. ﺍﻻﻣﻴﻦ ﻗﺎﻝ ﻟﻴﻬﻮ ﻓﻌﻼ ﻳﺎ ﻋﻄﻴﺔ .. ﺷﻔﺖ ﺍﻟﺪﻋﻮﺓ ﺩﻱ .. ﻭﺍﻟﻠﻪ ﻗﺎﻟﻮ ﺍﺻﻠﻮ ﻣﺎﺑﺘﺠﻠﻲ .. ﻓﻴﻬﺎ ﺣﺪﻳﺚ ﻋﺪﻳﻞ .. ﻋﻄﻴﺔ ﻗﺎﻝ ﻟﻴﻬﻮ ﻳﺎﺯﻭﻝ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﻬﻮﻥ .. ﻭﺍﻟﻠﻪ ﺍﻧﺎ ﻓﻲ ﺩﺭﻙ ﻋﺪﻳﻞ .. ﺍﻻﻣﻴﻦ ﻗﺎﻝ ﻟﻴﻬﻮ ﻗﺎﻟﻮ ﻳﺎ ﻋﻄﻴﺔ ﺍﻟﻤﻼﻳﻜﺔ ﺗﻨﻄﻖ ﻋﻠﻰ ﺍﻟﺴﻨﺔ ﺍﻻﻃﻔﺎﻝ .. ﻛﻼﻡ ﺍﻟﺼﺎﻓﻲ ﺩﻩ ﻣﺎﺗﻬﻤﻠﻮ .. ﺍﺣﺘﻤﺎﻝ ﺭﺑﻨﺎ ﺩﺍﻳﺮ ﻳﻔﺮﺝ ﻋﻠﻴﻚ .. ﻋﻄﻴﺔ ﻗﺎﻝ ﻟﻴﻬﻮ ﻣﻼﻳﻜﺔ ﺷﻨﻮ ﻳﺎ ﺍﻻﻣﻴﻦ؟ ﺍﻟﺒﺘﻨﻄﻖ ﻓﻲ ﺍﻟﺴﻨﺔ ﺍﻻﻃﻔﺎﻝ؟ ﺍﻧﺖ ﺑﺮﺿﻮ ﺑﺘﻘﺘﻨﻊ ﺑﺎﻟﺨﺮﺍﻓﺎﺕ ﺩﻱ .. ﺍﻧﺎ ﺍﺻﻼ ﺍﻟﺤﻤﺪ ﻟﻠﻪ ﺑﺴﺎﻋﺪ ﺍﻟﻨﺎﺱ .. ﻭﺍﻟﺪﻋﻮﺓ ﺩﻱ ﺑﻌﻤﻼ ﺑﺎﺫﻥ ﺍﻟﻠﻪ .. ﻃﺒﻌﺎ ﻫﻢ ﺑﺘﻜﻠﻤﻮ ﺍﻻﺗﻨﻴﻦ .. ﻭﻣﺎﺧﺎﺗﻴﻦ ﺑﺎﻟﻬﻢ ﻟﻠﺼﺎﻓﻲ .. ﺍﻟﺼﺎﻓﻲ ﻭﺍﻗﻒ ﻣﺘﻜﻞ ﻋﻠﻰ ﺍﻟﻜﺮﺳﻲ .. ﻭﻳﻌﺎﻳﻦ ﻟﻴﻬﻢ ﻭﺑﺴﻤﻊ ﺑﻜﻞ ﺍﻧﺘﺒﺎﻩ .. ﺑﻌﺪ ﺧﻠﺼﻮ ﺍﻟﻜﻼﻡ .. ﺍﻟﺼﺎﻓﻲ ﻣﺸﻰ ﻟﻲ ﺍﻣﻮﺗﺎﺍﺍﻧﻲ .. ﻗﺎﻝ ﻳﺎ ﺍﻣﻲ ﺍﻧﺎ ﻋﺎﻳﺰ ﺍﺳﺄﻟﻚ ﺳﺆﺍﻝ .. ﺷﻨﻮ ﻳﻌﻨﻲ ﺍﻟﺪﺭﻙ؟ ﻗﺎﻟﺖ ﻟﻴﻬﻮ ﺩﻱ ﻛﻤﺎﻥ ﺳﻤﻌﺘﻬﺎ ﻭﻳﻦ؟ ﻗﺎﻝ ﻟﻴﻬﺎ ﻋﻤﻮ ﻋﻄﻴﺔ ﻗﺎﻝ ﻟﻲ ﺍﺑﻮﻱ ‏( ﺍﻧﺎ ﻓﻲ ﺩﺭﻙ ﻋﺪﻳﻞ ‏) .. ﺍﻳﻤﺎﻥ ﻗﺎﻟﺖ ﻳﺎﻟﻄﻴﻒ .. ﻣﺎﻟﻮ ﻳﺎﺭﺑﻲ ﻋﻄﻴﺔ؟؟ ﺍﻥ ﺷﺎﺀ ﺍﻟﻠﻪ ﻣﺎﻳﻜﻮﻥ ﻋﻨﺪﻭ ﻣﺮﺽ ﻭﻻ ﺣﺎﺟﺔ " ﻛﻌﺒﺔ .. ﺍﻟﺼﺎﻓﻲ ﺳﻤﻌﻬﺎ .. ﻗﺎﻝ ﻟﻴﻬﺎ ﻳﻌﻨﻲ ﺩﺭﻙ ﻣﻌﻨﺎﻫﺎ ﻣﺮﺽ ؟ ﻗﺎﻟﺖ ﻟﻴﻬﻮ ﻻﻻ ﻳﺎ ﺍﻟﺼﺎﻓﻲ ﻣﺎﻣﻌﻨﺎﻫﺎ ﻣﺮﺽ .. ﺍﻧﺖ ﺍﺻﺒﺮ ﺍﻧﺎ ﺑﺴﺄﻝ ﻣﻨﻬﺎ ﻭﺑﻜﻠﻤﻚ .. ﻟﻜﻦ ﺗﺎﻧﻲ ﻣﺎﺗﺴﺄﻝ ﻣﻨﻬﺎ ﺯﻭﻝ .. ﻗﺎﻟﻴﻬﺎ .. ﺳﻤﺢ .. ﺍﻳﻤﺎﻥ ﻗﻠﻘﻠﺖ ﻓﻌﻼ .. ﻭﺑﻘﺖ ﻣﺴﺘﻌﺠﻠﺔ ﻭﻣﻨﺘﻈﺮﺓ ﺍﻻﻣﻴﻦ .. ﻳﺠﻴﺐ ﺍﻟﻌﺪﺓ ﻭﻳﺠﻲ ﻳﺸﻴﻞ ﺍﻟﺸﺎﻱ .. ﻭﺗﺴﺎﻟﻪ ﻣﻦ ﺍﻟﺤﺎﺻﻞ ﻋﻠﻰ ﻋﻄﻴﺔ ﺷﻨﻮ ؟ ﻭﺍﻻﻣﻴﻦ ﺍﺗﺎﺧﺮ ﺷﺪﻳﺪ .. ﻭﺃﺫﺍﻥ ﺍﻟﻤﻐﺮﺏ ﻗﺮﺏ ﻳﺄﺫﻥ .. ﺍﻻﻣﻴﻦ ﻃﺒﻌﺎ ﻗﺎﻋﺪ ﻣﻊ ﻋﻄﻴﺔ ﻣﺤﺘﺎﺭ ﻭﺍﻟﻔﻲ ﺭﺍﺳﻮ ﻛﻠﻬﺎ ﻛﻤﻼﻧﺔ .. ﻭﺑﻘﻰ ﻣﺴﺘﺤﻲ ﻳﺴـﺎﻝ ﻋﻄﻴﺔ ﻋﻦ ﻃﺮﻳﻘﺔ ﺷﻐﻞ ﻟﻴﻪ .. ﻻﻧﻮ ﺣﺲ ﺍﻧﻮ ﻣﺸﻜﻠﺔ ﻋﻄﻴﺔ ﺍﻛﺒﺮ ﻣﻦ ﻣﺸﻜﻠﺘﻮ .. ﺍﻟﻤﻬﻢ ﻓﻲ ﺍﻟﻨﻬﺎﻳﺔ ﻗﺎﻝ ﻟﻴﻬﻮ ﻧﺤﻦ ﻳﺎﻋﻄﻴﺔ .. ﺍﻟﻤﻔﺮﻭﺽ ﻣﺎﻧﻘﻌﺪ ﻧﺮﺑﻊ ﺍﻳﺪﻧﺎ ﻭﻧﻨﺘﻈﺮ .. ﻟﻤﻦ ﻳﺠﻲ ﻣﻮﺳﻰ ﺳﻴﺪ ﺍﻟﻘﺮﻭﺵ .. ﻻﺯﻡ ﻧﺘﺼﺮﻑ ﻧﻌﻤﻞ ﺍﻟﺒﻨﻘﺪﺭ ﻋﻠﻴﻬﻮ .. ﻗﺎﻝ ﻟﻴﻬﻮ ﻭﺍﻟﻠﻪ ﻳﺎ ﺍﻻﻣﻴﻦ ﺍﻧﺎ ﻣﺎﺧﻠﻴﺖ ﺣﺎﺟﺔ .. ﻳﺎﺧﻲ ﺍﻧﺎ ﺳﺎﻓﺮﺕ ﻟﻲ ﺍﻫﻞ ﺍﻟﺰﻭﻝ ﺩﻩ ﻓﻲ ﺣﻠﻔﺎ ﺍﻟﺠﺪﻳﺪﺓ .. ﻟﻤﻦ ﻟﻘﻴﺘﻬﻢ ﺣﺰﻳﻨﻴﻦ ﻭﺍﻟﺪﻧﻴﺎ ﻣﻀﻠﻤﺔ ﻓﻲ ﻭﺷﻬﻢ .. ﻭﺍﻟﻠﻪ ﺍﺳﺘﺤﻴﺖ ﺍﻗﻮﻝ ﻟﻴﻬﻢ ﺍﻟﻤﺮﺣﻮﻡ ﻣﺎﻛﻠﻨﻲ ﻗﺮﻭﺵ ﻛﺪﺍ ﻭﻛﺪﺍ .. ﺍﻻﻣﻴﻦ ﻗﺎﻝ ﻟﻴﻬﻮ ﻛﺪﻱ ﻫﺴﻲ .. ﺍﻧﺎ ﺑﻤﺸﻲ ﻣﻌﺎﻙ ﺍﻟﺴﻮﻕ ﺑﻜﺮﺍ .. ﻭﻧﺸﻮﻑ ﺡ ﻧﻐﻤﻞ ﺷﻨﻮ ؟ ﻣﺎﻋﺎﺭﻑ ﻟﻜﻦ ﺍﻧﺎ ﺣﺎﺳﻲ ﻧﺤﻦ ﻟﻮ ﺍﺗﺼﻠﻨﺎ ﻋﻠﻰ ﻣﻮﺳﻰ .. ﻭﺣﻜﻴﻨﺎ ﻟﻴﻬﻮ ﺍﻟﺤﻘﻴﻘﺔ .. ﻋﻄﻴﺔ ﻗﺎﻝ ﻟﻴﻬﻮ ﻻﻻﻻﻻ .. ﺩﻱ ﺍﻟﻮﺣﻴﺪﺓ ﺍﻟﻤﺎﺑﻘﺪﺭ ﺍﻋﻤﻼ .. ﻗﺎﻡ ﺍﻻﻣﻴﻦ ﺷﺎﻝ ﺍﻟﺼﻴﻨﻴﺔ ﺑﺘﺎﻋﺔ ﺍﻻﻛﻞ ﻭﻭﺩﺍﻫﺎ ﺑﻲ ﻏﺎﺩﻱ ﻻﻳﻤﺎﻥ .. ﻭﻫﻮ ﺳﺎﺭﺡ ﺧﺖ ﺍﻟﺼﻴﻨﻴﺔ ﻭﺑﺎﻟﻮ ﺑﻌﻴﺪ ﻭﺍﻳﻤﺎﻥ ﺗﻌﺎﻳﻦ ﻟﻴﻬﻮ ﻓﻲ ﻭﺷﻮ ﻭﻫﻮ ﻣﺎﺟﺎﻳﺐ ﺧﺒﺮ .. ﻗﺎﻟﺖ ﻟﻴﻬﻮ ﻓﻲ ﺷﻨﻮ ﻳﺎ ﺍﻻﻣﻴﻦ ؟ ﻋﻄﻴﺔ ﻣﺎﻟﻮ ﺍﻟﺤﺎﺻﻞ ﻋﻠﻴﻬﻮ ﺷﻨﻮ؟ ﺍﻻﻣﻴﻦ ﻃﻴﺮ ﻋﻴﻮﻧﻮ ﻗﻌﺪ ﻳﻌﺎﻳﻦ ﻟﻴﻬﺎ ﻛﺪﺍ ﻗﺎﻝ ﻟﻴﻬﺎ ﻣﺎﻟﻮ؟ ﺍﻧﺘﻲ ﻋﺮﻓﺘﻲ ﻣﻦ ﻭﻳﻦ؟ ﻗﺎﻟﺖ ﻟﻴﻬﻮ ﻋﻠﻴﻚ ﺍﻟﻠﻪ ﺗﺤﻜﻲ ﻟﻲ ﻳﺎ ﺍﻻﻣﻴﻦ ﻭﺍﻟﻠﻪ ﺍﻧﺎ ﻛﺪﻱ ﻻﺑﻘﺪﺭ ﺍﻛﻞ ﻻﺑﻘﺪﺭ ﺍﻧﻮﻡ .. ﻋﻄﻴﺔ ﻣﺎﻟﻮ ؟؟ .. ﺍﻻﻣﻴﻦ ﻗﻌﺪ ﻓﻲ ﻧﺺ ﺍﻟﺴﺮﻳﺮ .. ﻟﻜﻦ ﻫﻞ .. ﻣﻤﻜﻦ ﻳﺤﻜﻲ ﻟﻴﻬﺎ . ؟