NAGTATAKANG dalawang pares ng mga mata ang sumalubong kay Bernard pagkababa niya ng hagdan. Nilampasan niya lang ang Lolo Abel at Lola Anita niya saka siya dumiretso ng kusina. Kumuha siya ng isang baso na nakataob sa banggerahan kung saan inilalagay ang mga bagong hugas at mga malilinis na gamit nila sa kusina. Pagdaka'y pumihit siya sa may dulong bahagi ng banggerahan at binuksan ang gripo ng tapayan para kumuha roon ng tubig.
“Ano bagang nangyari’t nagababag yata kayo ng nobya mo, apo?” nag-aalalang tanong ni Lola Anita sa kaniya na hindi niya namalayan ay sumunod pala sa kaniya.
Hindi pa man siya nakakabaling sa matanda para sagutin ang tanong nito ay bigla siyang hinaltak ng Lolo Abel niya pagkaharap niya sa mga ito matapos niyang isarado ang gripo ng tapayan.
“Magasabi ka nga sa ‘
