NATIGILAN si Ria sa narinig. Hindi niya malaman sa sarili kung matutuwa o maiiyak ba siya sa sinabi ni Fabio. Ngunit ang huli ang nangyari.
Hindi niya mapigilan ang mga luha niya. Unti-unti na lang itong nagparamdam sa gilid ng kanyang mga mata. Hanggang sa maramdaman na lang niya ang pag-agos ng mga luha niya sa kanyang pisngi.
"R-Ria," ani Fabio at hinawakan pa ang kanyang pisngi.
Ihinarap ni Fabio ang mukha ni Ria sa kanya ng mag-iwas ito ng tingin. Patuloy pa rin sa pag-iyak si Ria.
Nakaramdam naman ng pagkataranta si Fabio. Hindi tuloy niya malaman kung tama bang binigla niya si Ria na sabihing siya ang lalaking kasama nito nang gabing iyon. O dapat bang inilihim na lang muna niya. Lalo na sa nakikita niya ngayon kay Ria. Kahit siya ay lubos na naguguluhan sa ikinikilos ng dalaga.
