اعذرني لاني عشقتك

الحلقة الثانية

البارت الثاني

كعدنا وصار بين امي و امه و خالته الحجي ... ابوية جان مركز على الولد يريده يحجي ماكو ... اشو هذا ساكت ... اني هم اتفاجئت... كلت لا هذا مستحي ... رفعت عيني و بنظرة سريعة شفته بايده موبايله و يگلب بي ...

سمعت ابوية كال عمي قيصر شنو شغلك ...

افتهمت اسمه قيصر ...يا للجمال هم جميل و هم صوت جهوري و فوكاها اسم ملكي ...

رفع راسه و جان يكوله بنبرة بيهة كبرياء اني خريج هندسة حاسبات و اشتغل بمكتب حاسبات ...

ابوية..: زين وليدي هو الك

قيصر ..: لا شريك وية صديقي ...

ابوية..: اهااا زين عمي اذا نريد نسأل عليك وين مكتبك ...؟

قيصر ...: بحي الجامعة اسمه الملاك للحاسبات ...

ابوية ..: اهااا خوش... ابني انتو هم سألوا علينا و احنه ان شاءالله ننطيكم خبر بعد السؤال ...

هو ما رد اي شي ... بس سمعته يكول احنه نترخص ..

كام وكف واني هم وكفت شنووو طووول شنو هيبة ...

فطلعت امه و خالته ليكدام و اني واكفة يم امي وابوية شفت اندار فصارت عينه بعيني و جانت نظرته مبهمة مفتهمته و بنفس الوقت خلتني ارجف و ارتبك معدتي ترجف بس معدتي شعليها ...المهم صافح ابوية و بوسه و من بوسه اجاني عطره يجنننن ... رجعت معدتي ترجف .. اي ادري قابل هو بيتزا سلموا و طلعوا ...

مرت الايام و ابوية ما خله احد ما سأل على الولد من جوارينه سواء جوارين بيتهم و جوارين المكتب والكل مدحوا بي هذا الي يكول لو رايد من عدنه مرة ننطي واحنه مغمضين و هذا الي يكول ع الراس هذا خوي و الخ من المديح الي صفنه صراحة ...

صار اسبوعين من اجوي علينة ولازم يردولنه خبر ...ابوية كلها لامي انت لا تخابرين همه يخابرون واذا رادوها لنور اني سالت هواية و ما شاءالله مدحوا بي كولش لذلك رح انطيها ...

امي.: كالتله بس ابو نور اشو اني ما مرتاحة ... شفت الولد شوية انفة و كبرياء ... و لا مهتم عبالك ...

ابوية..: لا ام نور ترة الولد الحمدلله مؤدب و اني شفته من حجيت وياه شفته ما شاءالله حجاي بس محترم ... و مثل مدكولين كبرياء ...

امي ..: والله يا ابو نور بكيفك انا ارتاحيت لامه مبينه حبابة ..

ابوية ..: اي ها هي نتوكل على الله وان شاءالله ترتاح نور وياهم ...

اجة دور بطلنه قيصر بالحجي لازم نتعرف عليه بنات ... افسحوا مجال للولد ولا تسون زايدة ناكصةصح هو حليو بس ترة عصبي 

سلام ... اني قيصر عمري ٣٠ سنة .. مواصفاتي اسمر .. طويل و ضخم العب حديد صارلي سنين ... بس مو جماليةً لا ...بس احس هالرياضة اطلع بيهة طاقة جواية سلبية و ارتاح نفسياً من اروح للقاعة يومية ...

اني مريت بفترة عصيبة جداً و يجوز بعدني بيها لكن اهون من قبل ... حالتي يجوز سببها الرئيسي نص الشعب العراقي متعرضلها الي هي فقدان العزيز بسبب الوضع الامني لكن اكو اسباب ثانوية رح اتكلم بيها بعدين ..

بعد وفاة اخوية سليم الله يرحمه ... الدنيا صغرت بعيني .. هذا خوي .. عضيدي .. موضع اسراري .. شلون يتركني و يروح .. هو ما مات بسرعة ظل يعالج بالمستشفى ل ٣ ايام و بعدها غادر هالدنيا و تركني ... و ترك غصة بقلبي ...

ظليت لا اني الحي و لا اني الميت ... ادخل بحالة نفسية ما احس على نفسي ابدددد ... هسة رح دكولون اكو هيج شي معقولة ... رح اجاوب و اكولكم وفاة اخوية الي يد بيها و جان من الممكن اني اروح بداله ...

اخوية سليم جان يحب ... هو اكبر مني بسنتين احنه مثل التوم كووولش سوة و واحد يحب اللخ ... مرة حجالي عليها وكلي احب وحدة و اريد افاتح امي بالموضوع حتى تروح تخطبها الي ... اني فرحتله كولش و شجعته يفاتح امي ع السريع حتى يعرس و اوكفله هالاخ عندي روحي من الدنيا ... اكلب الدنيا بعرسه ...

يتبع....