اعذرني لاني عشقتك

البارت الاول انا اسمي نور عمري ٢٥ سنة متزوجة من شخص الدنيا كلها شجعتني اتركه حتى هو ... بس رغم كل كلامهم فضلت ابقى وياه لان قلبي مكدر يتركه لان هو اول حب بحياتي .... اني حبيته لما خطبني مجنت احبه قبل ... كنت طالبة بوقتها و ابوية ع كد حاله و امي ربة بيت و عندي ٣ خوات وياية و اني الجبيرة صار عمري ١٩ و امي كامت تلوب اسمعها تكول لابوية ... نور الوياها تزوجوا و حبلن و جابن و بتنه بعدها ... لازم نشوف شنو السبب ابوية ردها بنتج حلوة و مية واحد يتمناها على شنو مستعجلة...؟ ردت امي بعصبية ... اني مو مستهانة بجمالها بس ترة رح يفوتها القطار ... بعدين وين اولي اذا كعدت على كلبي ... ابوية سكت و ما جاوبها لان الموضوع صدك جان حساس لان اني حلوة و ما ناقصني شي بيضة و شگرة و عيني خضرة و حتى رصعات عندي بس عيبي الوحيد قصيرة مع ذلك ميعتبر عيب بالنسبة لبقية جمالي... مرت الايام ... وفد يوم جتي خالتي يمنه و اخذت امي على صفحة ... خالتي ..: ام نور عيني هذه صديقتي ام سليم تعرفيها ... امي ...: اي اي اعرفها شلونها على فراك ابنها سليم الله يرحمه ... خالتي ..: الحمدلله زينة بس ابنها الثاني متأثر بوفاة اخوه هواااية و نفسيته تعبانة ودوا اطباء ما فاد ودوا شيوخ و ما فاد بس نصحوهم يزوجوا بلكي يتحسن من باب تغير نمط بحياته .... امي ...: يا عيني خطية .... الله يعافيه خالتي...: شوفي ام نور عيني الناس خوش ناس و نعرفهم كولش زين و همه عائلة متمكنين مادياً و صراحة اني كلتلهم على نور ... امي لا هي الفرحانة و لا هاي الضايجة جانت تتمنى اتزوج و ما ابقة عالة على كلبهم و بنفس الوقت تتمنى الي الزين مو هيج نصيب ... امي ...: والله يا اختي ما ادري شأكولج بس رح اكول لابو نور واردلج خبر ... اني هذا الحجي كله بوقتها ما ادري بي ... بس دريت خالتي جايبتلي نصيب ... بس امي و ابوية جانوا متوهوهين بين الاي و بين اللاع ... فكروا بالحالة المادية لبيت اهل الولد حتى اعيش عيشة زينة و هم اتزوج و ما اتسمة عانس بمرور الايام لاني كبرت بنظرهم و رح يفوتني القطار ... بس الي وكفهم وضع الولد و حجاية خالتي انه متأذي نفسياً ورة وفاة اخوه ... لذلك ابوية قرر يلتقي بالولد ... امي حجت وياية و نوهتلي شي بسيط ان الولد شوية حالته النفسية متأذية لان اخوه علاقتهم جانت قوية و توفى بمفخخة و ديتحسن شوية شوية .... اني شأريد احجي و لا اقدم و لا ااخر ابوية و امي همه رح يقررون و جية الولد و مقابلته ويه ابوية رح تحسم الموضوع ... و اجة يوم المقابلة ..... اني جنت متلهفة اشوف هالانسان الي رح ارتبط بي و بنفس الوقت اكو شي بقلبي يوجعني من ينجاب طاريه ... بس جنت مراهقة و صغيرة لذلك ما اهتميت لهالوجع و لا خليته على بالي بس حطيت ببالي اني رح انزوج و اصير عروس .... فقررت اوكف ورة البردة مال المطبخ حتى اباوع ... اني جنت متحضرة بدلت و حطيت خفيف بوجهي و لبست شال ع** على لون عيني وخلاها تبرز .. و حاولت البس كعب شوية بي علو حتى لا ابين قصيرة وكفت اباوع من ورة البردة ... طبوا نسوان ٢ و ياهم ولد ...ما هذا ...؟ شنو هذا معقولة؟ شاب يخبل اسمر طويل و جسمه رياضي و لبسه سبورت و مناظر شمسية و سويج سيارة بأيده ... وااااو .... ظليت واكفة اتاني احد وراهم يطب لان كل عقلي هذا مو الولد يجوز اخو لا كالوا اخو مات  اذن ولج نور هذا الولد ... يا رب يا الهي صح اني حلوة بس اهلي يكولون عليه فايتني القطار ... هذا الشاب الحليو رايدني؟؟؟معقولة.؟ المهم فرحت و كيفت هوااااية لان هالحلو هذا رح يصير خطيبي و يشوفوني صديقاتي و ياه و هم امي و ابوية يفرحون اني رح اتزوج و ما ابقة على كلبهم .... كعدت بالمطبخ بحدود الربع ساعة ... وراها جتني امي كالت ياله ماما نور كومي... باوعت عليها بلهفة ... بس انصدمت امي اشو مو متلهفة مثلي .. شنو مشافت الي شفته ...؟ ليش مو منبهرة .؟ كتلها اي ماما بس شبيج اشو مو على بعضج ..؟ ابتسمت بفتور و جان تكول ... لا امي ما بية شي ياله حبيبتي كومي قدمي الشربت ... كلبي كام يدك ع السريع ايدي باردة اني صح مريت بهالموقف من ام ستار جيرانه جابت ابن اختها ديخطبني بس مجنت هيج مرتبكة ابن اختها لام ستار جان ولد بسيط و محسيت شوفته تخوف ... او رح تربكني ... يتبع....