Heart broken killer

Khooni Nishaan

Vikrant ki maut ne poore shahar mein sannata khich diya tha. Ek itne bade businessman ke bete ka is tarah car mein qatl hona koi aam baat nahi thi. Media mein har jagah sirf isi murder ki charcha thi.

Inspector Sameeksha subah-subah crime scene par khadi thi. Baarish ab thami thi, par hawa mein abhi bhi thandak aur khauf ghula hua tha.

Sameeksha ne apne haath mein woh laal rang ka card liya jo laash ke paas mila tha. Card par ek tute hue dil (broken heart) ka nishaan bana tha aur niche khoon se likha tha—"Heart Broken Killer".

Uska assistant, Rahul, ghabraate hue bola, "Ma'am, forensic report ke mutabik killer ne koi fingerprint nahi chhoda. Yeh kaam kisi professional ka lagta hai."

"Professional?" Sameeksha ne thandi hansi hanste hue kaha. "Nahi Rahul, yeh kisi professional shooter ya gangster ka kaam nahi hai. Yeh kisi aashiq ka pagalpan hai... ek aisa aashiq jiska dil is tarah toda gaya ki woh ab jaan lene par utar aaya hai."

Sameeksha ne Vikrant ki profile check karni shuru ki. Vikrant ka itihas ladkiyon ko dhokha dene aur unke jazbaat se khelne se bhara pada tha. Par sawal yeh tha ki Killer ka agla target kaun hai?

Usi waat, shahar ke ek doosre kone mein, ek bade se club ke VIP lounge mein Aryan baitha tha. Aryan ek mashhoor model tha, par uski aadat bhi bilkul Vikrant jaisi thi—ladkiyon se jhoothe wade karna aur apna kaam nikalte hi unhe chhod dena.

Aryan apni drink ka sip lete hue apne dosto se keh raha tha, "Arre yaar, tum logo ne suna Vikrant ke baare mein? Kisi 'Heart Broken Killer' ne use nipta diya. Kya fattu tha yaar woh, apni hi car mein mara gaya!"

Uske dost hasne lage, lekin unhe nahi pata tha ki club ke counter par khada ek shakhs, jisne black hoodie pehni hui thi, bade dhyan se Aryan ki baatein sun raha tha. Hood ke andar se uski aankhein nafrat se chamak uthi thin.

Killer ne dheere se apna phone nikala aur Aryan ki photo par ek laal cross (X) ka nishaan bana diya.

Usne dabe aawaz mein khud se kaha, "Agla number tera hai, Aryan... Tune jis masoom ki zindagi narak banayi hai, ab uski saza bhugatne ke liye taiyar ho ja."