Hindi mapakali si Aymee habang tinitingnan niya ang sarili niyang repleksyon sa salamin. Bawat galaw niya ay sumasabay ang galaw ng bestida niyang suot. Ngayon lamang siya nagsuot ng ganoon sa isang lakad. Mas sanay kasi siya sa pants at t-shirt. Ewan ba niya ang pumasok sa kaniyang isip ngayon at nanghiram siya ng magandang bestida sa tiyahin niya.
Hanggang tuhod ang bestida na iyon. May maiksing sleeves din iyon at may pagka-oldies ang disenyo pero bumagay iyon sa hubog ng kaniyang katawan. Ang Tiya Baby pa niya ang namili niyon. Akala nga nito ay si Jomar ang kasama niyang kakain sa labas. Nang sinabi niyang si Brayden ang kasama niya ay bahagya itong nagulat.
Ikinuwento niya rito ang nangyari. Pakiramdam niya ay kailangan niyang may masabihan niyon. Mataman naman siyang pinakinggan
