Nagising si Aymee sa mahigpit na yakap ni Brayden sa kaniyang bewang. Ang mukha ng binata ay nakasiksik sa kaniyang dibdib. Para bang isang alaga ito na natatakot iwan ng kaniyang amo. She smiled unconsciously at the thought.
Alam ni Aymee na mataas na ang sikat ng araw sa labas. Ilang oras din kasi siyang nakatulog at ngayon nga ay lagpas alas dyis na ng umaga ang isinasaad ng orasan sa pader. Hindi na nga siya nakapasok sa trabaho dahil napasarap ang tulog niya sa tabi ni Brayden. Tatawag na lamang siya mamaya kay Lewis upang ipaalam kung bakit hindi siya nakapasok sa opisina. Sa ilang araw kasi na hindi pumasok sa trabaho si Brayden ay si Lewis ang nag-aasikaso ng mga naiwan nitong trabaho. Siya naman ay tinutulong-tulungan si Lewis upang hindi naman ito masyadong mabigatan sa trabaho.
