عشق بطعم العلقم - علا فائق

16

" عشق بطعم العلقم " .

" بارت 16 " .

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في المستشفى "

‹•‹•‹•‹•‹•‹•‹•‹•‹•‹•‹•‹•‹

وصل هارون للـ عنوان اللي بعته رائد في رسالة و اسيا و زهرة نزلوا من العربية و هارون قال : خدوا بالكوا من بعض و ابقوا طمنوني عليكوا على طول ، سلام ..

اسيا : سلام ..

اسيا مسكت ايد زهرة و طلعوا لـ رائد بعد ما سألوا موظف الاستقبال عن مكان رائد و سيف ..

طلعت اسيا بسرعة على درجات السلالم و وراها زهرة و اول لما شافت رائد واقف قدام اوضة العمليات ندهت عليه : رائد !

رائد بصلها اول لما ندهت عليه حس ان روحه اتردت فيه و قال : اسيا ..

اسيا مشت ناحيته بـ خطوات واسعة و الغريبة المرة دي انها لما قربت هو اللي حضنها بـ قوة و كأنها كانت غايبة عنه سنين ..

رائد : اسيا انتِ كنتي فين ، ايه اللي حصل ؟

اسيا : مش مهم ، المهم انك كويس ، سيف عامل ايه ؟

رائد : لسه في العمليات ، اللي معاكي دي زهرة صح ؟

اسيا : ايوه هي ، تعالي يا زهرة قربي ..

قربت زهرة جمبهم و متكلمتش و فضلت باصة لـ باب غرفة العمليات بس بـ حزن ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في فيلا خليل "

‹•‹•‹•‹•‹•‹•‹•‹•‹•‹•‹•‹•‹

خليل كان قاعد في مكتبه و بـ يكلم اتنين من رجالته و قال : هـ تروحوا الوقتي البيت و لازم تتأكدوا ان مفيش حد غيرها او على الاقل هي تفتحلكوا الباب ، لو اسيا فتحت قولولها اي حجه بس لو زهرة هي اللي فتحت تخلصوا عليها متديهاش فرصة انها تصوت او تلفت انتباه اسيا ، خلصوا على البت دي النهارده و بـ أي شكل ..

واحد من الاتنين اتكلم و قال : طيب نسرق اي حاجة من الشقة عشان يبقى تمويه ..

خليل : لا مش مستاهله اصل اسيا مش هـ تقدر تبلغ و زهرة ملهاش لا اهل و لا اثبات شخصية كل اللي اسيا هـ تعمله انها هـ تعيطلها شوية و تحبس نفسها في البيت و بعد كدا انا عارف هرجعها ازاي .. ، يلا اخرجوا دلوقتي قبل ما هارون يوصل ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في المستشفى "

‹•‹•‹•‹•‹•‹•‹•‹•‹•‹•‹•‹•‹

خرجت الممرضة تقول لـ رائد : احنا محتاجين كيسين دم فصيلة o+ ..

رائد : اشتريهم من بنك الدم يعني ؟

الممرضة : موجود كيس واحد في بنك الدم ، محتاجين كيس كمان ..

رائد : طيب اقدر اجيبه منين ؟

الممرضة : لازم تشوف متبرع بسرعة عشان امريض فقد دم كتير ..

زهرة : انا فصيلتي o+ ينفع اتبرع ؟

الممرضة : هـ نشوف ، تعالي معايا ..

اسيا : هما كدا مش هـ يحتاجوا بطاقتها او معلومات عنها ؟

رائد : مش عارف بس حتى لو حصل انا هحاول امشي الحوار دا بـ أي شكل ، لازم نلحق سيف ، انا هروح اشوف الكيس اللي في البنك دا و هجيلك على طول ، خدي الموبايل بتاعك اهو ابقي رني عليا لو حصل حاجه تمام ..

اسيا : تمام ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•

" في فيلا اسيا "

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹

سمعت زهوة خبط جامد على الباب و رنة الجرس فـ عقدت حواجبها بـ استغراب و قامت براحة و وقفت ورا الباب تشوف مين في العين السحرية بس مكنش فيه غير سواد ..

وقفت زهوة ورا البال و قالت : مين ؟

محدش رد عليها و سؤالها اتقابل بـ ال**ت فـ قالت تاني : مين على الباب ؟

سمعت اصوات همهمات فـ بعدت عن الباب و هي حاسة بـ الخوف ..

سمعت بعدها خبطة على الباب فـ قالت بـ زعيق : جولت مين !

هارون : انا هارون يا زهوة افتحيلي ..

زهوة رددت اسمه بـ اطمئنان : هارون !

راحت على الباب و فتحته و هي بـ تقوله : خضتني يا هارون ما ترد عليا من اول مرة يا اخي ..

هارون : البسي يلا عشان تيجي معايا !

زهوة : اجي معاك فين و ليه ؟

هارون : يا زهوة يلا مش وقت اسئلة يا تدخليني اقعد معاكي جوا لحد ما زهرة و اسيا يجوا يا تيجي معايا تروحي شقتي و متقلقيش مش هفضل معاكي بس بردو هـ يبقى لحد ما البنات يجوا ..

زهوة : و انا مش متحركة من مكاني جبل ما افهم في ايه يا هارون !

هارون بعصبيه : يا زهوة بطلي عند مرة في حياتك و يلا تعالي معايا ..

زهوة : لا و انا مش هتحرك من مكاني جبل ما افهم في ايه و يلا بجى من اهنه عشان هجفل الباب ..

هارون : دا اخر كلام يعني !

زهوة بعند : ايوه ..

هارون : ماشي انا هفضل قدام الباب لحد ما هما يجوا اتفضلي ادخلي ..

زهوة : هدخل ..

رزعت زهوة الباب في وش هارون بـ ضيق و وقفت ورا الباب و هو قعد على السلم و بـ يفتكر اللي حصل قبل دقايق ..

‹•‹•‹•‹•‹•‹•‹•‹

"فلاش باك "

‹•‹•‹•‹•‹•‹•‹•‹

ركن هارون عربيته قدام بوابة فيلا اسيا و استغرب من وجود عربية تانية قدام البوابة ..

دخل هارون بسرعة جوا و اتفاجأ بـ وجود رجالة خليل قدام الباب و بـ يخبطوا عليه بـ قوة ..

قرب منهم هارون و قال : انتوا بـ تعملوا ايه هنا !

_ هارون !

هارون : بـ تعملوا ايه هنا انتوا الاتنين ؟

_ عايزين اسيا هانم ..

هارون : عايزين اسيا هانم في ايه ؟

_ الباشا قالنا نبلغها حاجه ..

هارون : حاجة ايه و هي كانت عنده الصبح ، ايه الحكاية ؟

قال راجل للـ تاني : اسبقني على العربية و انا جاي وراك ..

فضل الراجل باصص لـ زميله لحد ما خرج و خد هارون و نزلوا درجات السلالم و قال : بص يا صاحبي ، خليل خلاص كتب فرمان موت زهرة و انا عبد المؤمور زيك بـ الظبط ..

هارون : انتَ بتقول ايه !

محمد : زي ما بقولك كدا بـ الظبط ، خليل حط موت زهرة في دماغه و هـ يستغل اي فرصة اسيا مش موجوده جمبها و هـ يخلص عليها ، لو مبعتنيش هـ يبعت مية غيري ، هي اتكتبلها عمر جديد النهارده عشانك و هـ نروح نقوله اننا لقيناك عندها بس مش عارف هي هـ تفضل عايشة لحد امتا .. ، سلام ..

" باك "

دمعت عيون هارون لما تخيل ايه اللي كان ممكن يحصل لـ زهوة لو فتحتلهم الباب قبل ما يوصل ..

غمض هارون عيونه و حاول انه يتمالك نفسه و فضل قاعد على السلم قدام باب الفيلا ..

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹• يتبع ..

رأيكم .. ؟

توقعاتكم .. ؟

هارون حب زهوة .. ؟

تأثر هارون له علاقة بـ مشاعر الاخوة ناحية زهرة و لا له علاقة بـ مشاعر جديدة لـ زهوة في قلبه .. ؟

‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•‹•