تربية أسهل

ما هي التربية وليه بنربي أولادنا ؟

التربية ماهي إلا تربية الذات أولًا

🍁🍁إيه هي التربية ؟

التربية رحلة

يلا بينا نبدأ رحلة التربية ونشوف هنقابل إيه في الرحلة دي.

التربية رحلة مكونة من محطتين

أول محطة هي مرحلة الطفولة وتاني محطة هي المراهقة.

وبعد كدا بيكون الطفل نضج وبنجني ثمار التربية، ودا ميمنعش إن بيكون في تربية برضو بس على خفيف بقى مش زي مرحلة الطفولة و المراهقة.

التربية ما هي إلا تربية الذات أولًا (من ضبط إنفعالات وأعصاب وتحكم في النفس و تهذيب خلق من عدم كذب وصدق وأمانة وإلتزام كالإلتزام بالصلاة و الوعود و إلخ)

و التربية مش مرحلة هي رحلة بتمشي بالتوازي مع رحلة حياتك. و عموما التربية مستمرة مجرد إن بقيتي أم من وقتها رحلة التربية بدأت حتى آخر يوم في عمرك.

و التربية مش مقصورة على أولادك بس، إحنا كلنا لينا دور في المجتمع مع أولاد إخواتنا و الجيران و الأطفال في الشارع و المسجد و النادي و في أي مكان ومع أي طفل.

في تعاملك مع أي طفل تعرفيه أو لا، ابنك أو لا؛ و توجيهك له بطريقة علمية صحيحة فهو في حد ذاته نوع من أنواع التربية.

🍁🍁أهم حاجة في رحلة التربية هي أنتِ ( الأم )

🍁🍁أهم حاجة في رحلة التربية هي أنتِ ( الأم )

مبدأيًا حابة أقولك إن أنا حاسة بيكي وفهماكي وعارفة إنك مضغوطة و عليكي حِمل و مسؤوليات كتير؛ عارفة إنك بتحاولي دايمًا تمسكي أعصابك و تضبطي إنفعالاتك و لكن كل مرة الأمور بتخرج عن سيطرتك.

عارفة إنك بتضايقي لما تعنفيهم و بتعيطي مع نفسك و بتروحي تبوسيهم وهما نايمين و ساعات بتجيبي ليهم حاجات حلوة عشان تعوضيهم لأنك ض*بتيهم أو زعقتي أو أو.. إلخ و ضميرك بيأنبك.

صدقيني أنا حاسة بيكي و فهماكي و مش بلومك على أي تصرف أبدًا في الكتاب دا (كل أم بتقرأه فأنا بعتبرها أخت و صديقة) ولأني بحبك عايزاكي توقفي أي تصرف غير تربوي بتستخدميه.

أنا عايزة بيتك و أولادك وانتِ تكونوا سعداء.

عشان بحبك فعلًا عايزة أساعدك

و لأني عايزة أساعدك فـمستحيل ألومك

وانتِ كمان متلوميش نفسك، كلنا بنغلط عادي بس المهم نتعلم من غلطنا و منكرروش أو على الأقل نحاول منكرروش.

لو سمحتي وقفي كل الطرق الغير تربوية و المُضرة نفسيًا للطفل، وإبدأي معايا رحلة التربية من جديد، وأنا في الكتاب هساعدك واد*كي حلول كتير وأساليب كتير، انتِ كمان ساعدي نفسك و ساعدي أولادك

واحتسبي كل حاجة لله (احتسبي كل مجهود وتعلم في تربيتهم لله وربنا هيجازيكي)

و صدقيني لو بذلتي مجهود و اتعلمتي التربية على أسس علمية ونفسية صحيحة هتختصري وقت كبير أوي و هتوفري على نفسك مناهدة و زعيق و خناق كتير أوي ملوش لازمة و أصلًا مش بتجيب نتيجة و لو جابت نتيجة فا بتكون ع**ية.

لو ربيتيهم بطريقة صحيحة و على أسس علمية ونفسية هتشغلي دماغهم و هيكونوا عندهم شخصية و واثقين من نفسهم و متزنين في كل حاجة و عندهم وعي وإدراك وهتفتخري بيهم جدًا لما يكبروا لأن هيكونوا شخصيات سوية نافعة ليهم و لمجتمعهم وذات شأن.

و هت**بيهم في الدنيا وعلاقتك بيهم هتكون كويسة و في الآخرة هيكونوا سبب في دخولك الجنة، لأن ربنا مش هيضيع تعبك ومجهودك.

🍁ولأن أنتِ أساس البيت

والبيت لو مفيهوش سكينة و هدوء و راحة و حوار و تواصل و تفاهم وحب وتقبل، ميبقاش اسمه بيت (البيت لو مش ملجأ فَـمَسموش بيت)

و عشان البيت يبقى كدا فا مهم إن انتِ تكوني هادية و مش مضغوطة

مهم تدي نفسك وقت وتهتمي بنفسك و تفرغي ضغوطاتك أول بأول

مثلا

تروحي جيم بقى تتمشي تعملي أي حاجة المهم تفرغي ضغوطاتك، ومهم يكون ليكي وقت يومي تعملي فيه حاجة بتبسطك حتى لو كُباية كاكاو في هدوء كدا و الكل نايم (الصبح بدري، بليل خالص، وهما في المدرسة ؛ انتِ شوفي ظروفك) تقرأي كتاب تشوفي فيلم شوفي إيه بيخليكي مبسوطة وإعمليه.

مهم يكون ليكي وقت خاص بيكي و لنفسك كل يوم حتى لو نص ساعة، ومهم كل أسبوع مثلًا تفصلي من كل حاجة ليها علاقة بالبيت والأولاد وحتى لو ساعتين تخرجي مع نفسك مع أصحابك المهم تعملي ريفريش لنفسك كدا وبعدين ترجعي، هترجعي أحسن وهيكون عندك طاقة وتقدري تبذلي مجهود في عملية التربية لأنها مش سهلة أبدًا.

والناس اللي بتقول إن التربية سهلة فا دا كلام مش صحيح

لأن ببساطة مفيش حاجة في الدنيا كلها سهلة كل حاجة عايزة طاقة ووقت ومجهود وصبر كل حاجة حرفيًا، فا مستحيل تكون التربية اللي هي إعداد إنسان لتعمير الأرض تكون سهلة!

🌳التربية كمان مش أكل وشرب و هدوم ومدارس وفلوس وتمارين في النادي ومذاكرة (دا مفهوم خاطئ للتربية). دي كدا اسمها رعاية

🌳التربية

هي غرس قيم ومبادئ وأخلاق ودين، التربية إعداد آباء وأمهات المستقبل، التربية صُنع شخصية و إيقاظ وعي وإدراك بني آدم عارف حقه وحق غيره وإحترام الآخرين واحترام ذاته.

🌳يا أربي بني آدم بيشغل مخه و واعي لكل ما حوله نتيجة إني وفرت له بيئة هادية خالية من الصراعات والإهانة والض*ب وكل دا و بذلت مجهود وتعلمت عشان أقدر أربيه صح على أسس علمية ونفسية صحيحة و علمته إزاي يقدر يواجه الدنيا و علمته الأدوات اللي هيحتاجها في رحلة الحياة و كنت على طول بفَهِّمُه وأشغل مُخه وبيننا حوار ونقاش وتفاهم وحبيته حب غير مشروط وزرعت فيه ثقته بنفسه

🌳يا أربي بني آدم منفعل، مخه واقف نتيجة إني عَيِّشته في صراعات وخناقات ومحاولتش حتى أفهمُه أي حاجة و ربيته بالطريقة التقليدية (هو كدا، و لأ يعني لأ، واسمع الكلام، وبس، و هوس، و أنا أكبر منك أعرف أكتر منك، وض*ب وقرص و زعيق إلخ )

فا مشغلتش مخه ولا فهمتيه أي حاجة فا طلع طول الوقت متحفز لأي حاجة وعايز يدافع عن نفسه وعنيف او يطلع من**ر وإمَّعة.

🌳 ولأن التربية ماهي إلا تربية الذات أولًا، عشان كدا إحنا مش بس بنربي ولادنا بس، لا إحنا بنتربى معاهم.

بنتعلم ضبط النفس والتحكم في الإنفعالات و الإتزان في ردود فعلي وأكون ليهم قدوة حسنة و مطالبهمش بحاجة أنا مش بعملها، فا مهم الزم نفسي باللي بطلبه منهم أولًا في كل حاجة.. إلخ

ماهو أنا قدوة ليهم ( إزاي أطلب منهم مثلًا الصلاة وأنا مش بصلي، أو أطلب منهم ميزعقوش وأنا طول الوقت بزعق ) إزاي هعلمهم حاجة وأزرعها فيهم وأنا ع**ها ومش بعملها ( مش منطقي خالص ) فا إحنا طول رحلة التربية بنعلمهم و بيعلمونا .

🍁و التربية رحلة فا استمتعي بيها وخليهم هما كمان يستمتعوا، بلاش تحوليها لِعبء وضغط نفسي عليهم وعليكي.

وخدي بالك

التربية مش بتخلص مجرد إن خلفتي وعندك طفل فا هتفضلي تربيه عمرك كله لأنه مهما كبر هيفضل في عيونك طفل و هتفضلي انتِ ماما (الموجه الأمين الصادق الحنون، هتفضلي ماما الملجأ والأمان و الحنية والحنان ومص*ر الطبطبة والدعم والسند و الأمان، ماما اللي على طول في ضهرك وسنداك اللي فهماك صح وعمرها ما تشمت فيك ولا تدوس على نقاط ضعفك، ولا تعايرك أبدًا بأي حاجة عملتها.. إلخ )

🌳خليهم يشكروا ربنا على إنه إختارك أم ليهم ، خليهم يكونوا سعداء بيكي، فهميهم وافهميهم وعبري ليهم عن حبك دايمًا واحضنيهم و بوسيهم وادعميهم.

وبدل ما تواجهيهم بعيوبهم إعملي زوم على مميزاتهم؛ صدقيني لو ركزتي هتلاقي مميزاتهم أكتر بكتير من عيوبهم بس انتِ اللي مركزة على العيوب بس و ناسية وسايبة المميزات خالص..

و قوليلهم مميزاتهم الأخلاقية و الجسدية؛ أنا بحب فيك إنك ( حنون / صادق / مخلص / مجتهد / عيونك حلوة / شعرك حلو ..إلخ ) انت ابني حبيبي.

🍁و إمدحي فيهم كلهم و متفرقيش بينهم

لأن ربنا هيحاسبك على التفرقة المعنوية و المادية حتى لو كلمة أو إبتسامة خدي بالك.

🌳وخدي بالك كويس وركزي لأن وجع الأهل مش زي أي وجع، دا بينخر في القلب و بينسر الروح جرح كبير ومهما اتعالج بيسيب أثر لأنه بيكون في العمق ..

وصدقيني انتِ ممكن تطلعيهم سابع سما و ممكن تنزليهم سابع أرض و انتِ في إيدك الخيار والإختيار، و متفتكريش إن في حاجة هما بينسوها أو بتعدي، لا لا لا.. كله موجود في الذاكرة، الحلو والوحش ولما بيقعد مع نفسه بيفتكر حاجات انتِ متتخيليش إنه فاكرها إعتقادًا منك إنه كان صغير جدًا أو عدى وقت طويل فا أكيد نِسي، فا أحب أقولك إنه منسيش للأسف.

🍁و للأسف بقى إنتِ اللي بتنسي اللي حصل و هو مش بينسى، لأن كل حاجة بتسيب أثر عميق جواه و أي حاجة منك انتِ بالذات.. لأنك ماما

مش منتظر منك غير ( الحب و القبول .. إلخ )

وكل التصرفات والسلوكيات اللي تدعمه وتسنده دايمًا، فَـلما انتِ يص*ر منك أي تصرف ع** دا بيحصله صدمة نفسية، لأن انتِ ماما مينفعش تيجي منك انتِ.

فا خدي بالك

(لأنه مش هيجي يقولك.. وممكن أصلا هو مايكونش عارف ولا عنده وعي بالصدمة النفسية اللي حصلتله، بس كل دا بيبان في تصرفاته وسلوكه عمومًا)

و برضو الع** بالعكس

يعني لما يص*ر منك سلوكيات ( الحب و القبول .. إلخ ) فا دا بيأثر فيه بشكل كبير و بيعزز ثقته بنفسه وتقبله لنفسه .

🌳 باختصار..

أي تصرف و سلوك منك ثأثيره مضاعف أضعاف كثيرة على أبنائك دا في ( الإيجابي و السلبي ) خدي بالك النقطة دي مهمة جدا.

🍁أنا واثقة فيكي

ومتأكدة إنك بعد ما تخلصي الكتاب هتراجعي نفسك و لو في اخطاء هتحاولي جاهدة تصلحيها، متأكدة إنك هتحسني العلاقة بينكوا و هتسعي إنك تكوني ذكرى جميلة ليهم و تبقي ماضي سعيد (وهما بيحكوا لأحفادهم عنك عايزاهم يقولوا إيه ؟ ماما كانت إيه ؟؟ )

مص*ر السعادة ولا سبب التعاسة والـstress والضغط النفسي و العصبي، كانت بتحاول تِفَهِمّنا وتِفْهَمنا وتتعمد تشوف الحلو اللي فينا وتزوده وتعالج السلبيات اللي فينا..

ولا كانت شايفانا وحشين و مش شايفة غير العيوب وبس و مهما عملنا كانت مبتعترفش بينا ولا بنجاحنا ..

كانت بتحس بينا و بوجعنا ولا بتسخف بمشاعرنا و إحساسنا و مشاكلنا و تقول ( إنتوا عيال.. ايه الهبل دا / إنتوا لسه شوفتوا حاجة / دي حاجات تافهة .. إلخ ) من كلام رخم بيتقال مفيهوش مراعاة لمشاعر الأطفال.

🍂خدي بالك

دي نقطة مهمة و بتحصل كتير وأثارها النفسية مدمرة

ولّا يقول

كانت على طول بتحس بينا و بتساعدنا نحل مشاكلنا وإزاي نتعامل مع مشاعرنا وإحساسنا حتى لو كانت المشكلة تافهة وبسيطة.. بس هي كانت على طول بتراعي مشاعرنا وبتتفهم ومش بتستخف بيها أبدًا.

انتِ عايزة إيه ؟؟

إسالي نفسك! عايزة ولادك يفتكروكي بإيه؟

🌲إفتكري دايمًا

التربية رسالة لتعمير الأرض ومكلفين بيها وهما هدية من ربنا و وهنتحاسب عليهم ..كلكم راعٍ وكل راع مسؤول عن رعيته