LALORAN MORIS

Kapitulu 23

Husi parte señor Antoninho ninian momentu koalia ho Noi ninia mãe.

Flashback on

Ha’u tenke buka maneira ida hodi halo diskusaun ho Noi ninia mãe. Hein katak Noi ninia mãe bele komprende ha’u nia intensun no la interpreta sala.

“Obrigada barak ba mãe ninia prontidaun atu koalia ho ha’u mesak” ha’u hahu loke konversa.

“Nada barak mos, Nino. Ha’u agradese Noi monu ba mane ida hanesan ita boot. Ha’u la hetene loos, saida mak sei akuntese see nia fó nia aan ba mane badiu sira nee ka mane lanu teen sira nee. Mane nee bele estraga nia to’o aat tiha deit. En vez de nia atinzi ninia objetivu atu hetan oan, maibe nia bele trauma liu tan fali” Noi nia mãe haktuir ho tristi.

“Sin, mãe. Ha’u mos la espera bainhira ha’u simu kargu ida nee, muda mai serbisu iha kapital nee, bele hasoru kedas problema ida hanesan nee. Buat hotu kala Maromak ninia planu ona” ha’u tenke esplika neneik atu Noi ninia mãe bele komprende, tanba bainhira nia rona ha’u dehan ha’u kazadu, nia hirus no la simu.

“Entau agora oinsa ho Nino ninia hanoin? Ita atu halo oinsa?” Noi ninia mãe husu.

“Mãe, onestu deit. Durante ami serbisu hamutuk iha fulan lima nia laran nee, ha’u sente ha’u apaixonadu ka laran monu ona ba Noi. Ha’u gosta ona nia no hakarak hadomi nia to’o mate, saa tan ami nain rua iha ona oan ida ne’ebé bele hametin ami nain rua nia relasaun” ha’u tenta nafatin koalia ho kalma no neneik, hein katak ferik ida nee bele simu.

“Hmmmmmmm, obrigada barak tanba bele gosta no hadomi ona ha’u nia oan feto, Nino! Maibe problema ba ha’u nee mak nee, ita boot kazadu. Ita boot iha ona fen. No ha’u lakohi ha’u nia oan feto sai ai-tarak ba ita boot ninia uma kain” Noi ninia mãe haktuir ho tristi. Ha’u bele haree husi ninia espresaun.

“Oinsa mãe bele hanoin nunee! Ha’u mak hakarak nia mãe. Favor ida mãe labele hanoin nunee” ha’u tenta nafatin.

“Nino, ha’u nee sai tiha ona vitima. Ha’u sente tiha ona oinsa moras bainhira mane ne’ebé ita hadomi huisk hela ita no ba moris ho feto seluk! Moras ida nee extrañu tebes no ita labele sukat ho liafuan” Noi ninia mãe haktuir ho matan been.

“Deskulpa, mãe! Karik tan ha’u halo mãe lembra fali esperensia moruk nee” ha’u sente ladun diak tanba halo ona Noi ninia mãe tanis no loke fali kanek ne’ebé Noi ho ninia mãe utrapasa durante nee.

“Nino, ha’u sente mundu nee la justu ona ba ha’u ho ha’u nia oan” Noi ninia mãe kontinua koalia.

“Tanba saa mãe bele hanoin nunee?” ha’u husu.

“Uluk ha’u nia kaben kurti ho feto seluk no husik hela ha’u ho ha’u nia oan. Husik ami moris terus, araska didiak. Maibe ho grasa Maromak nian, ami konsege ultrapasa situasaun difisil nee, no moris hakmatek to’o agora. Iha momentu ha’u foin atu sente hakmatek no goza moris nee, ha’u nia oan feto tenke monu ba mane ida ne’ebé kazadu. Signifika mane nee kurti ho ha’u nia oan feto no tenke husik hela ninia fen? Lae-lae… ha’u lakohi ida nee atu akontese tan iha ami nain rua moris” Noi ninia mãe esklarese ho depresaun.

“Lae, mãe! Ami nain rua Noi laos kurti. Ami laiha intensaun atu kurti. Buat nee mosu hanesan insidente ida ne’ebé laos ha’u nia planu. Laos hahu ho intensaun kurti. Lae mãe, lae! “ ha’u fó argumentu atu Noi ninia mãe bele komprende, tanba bele oinsa ba mos ha’u mos hakarak ha’u nia oan nee tenke moris hamutuk ho ha’u. Ha’u tenke dezaraska para bele hetan direitu bao an nee. Bele oinsa ba mos ha’u tenke iha direitu ba oan nee. Nia mos ha’u nia oan. See karik la ho ha’u esperma, Noi sei labele isin rua. Ida nee mak Noi ninia mãe tenke komprende.

“Ha’u nunka imajina atu moris bebeik iha situsaun ida hanesan nee, Nino”

“Mãe, ha’u sente buat sira nee hotu Maromak ninia planu. Ha’u kaben tinan lima liu ona, maibe to’o agora ami seidauk iha oan. Ha’u ho Noi toba hamutuk dala ida deit, maibe Maromak fó fiar ona ba ami. Ha’u agradese tebes ba ida nee, mãe. Ha’u lakohi husik ida nee liu leet deit” ha’u esplika.

“Maibe oinsa ho ita nia kaben? Nia sei senti laran moras see bainhira nia hatene ida nee” Noi ninia mãe dezafia. To’o iha pontu ida nee ha’u mos apoiu Noi ninia mãe nia hanoin.

“Loos, mãe. Ha’u labele husik hela Noi tanba tanba ami nain rua iha ona oan. Maibe ha’u sei tenta nafatin atu justu. Ha’u sei tenta oinsa para laiha ema ida mak sente laran moras. Ha’u sei esplika ba ha’u nia fen uluk atu nia bele komprende no fuan boot simu realidade ida” ha’u promete ba Noi ninia mãe.

“Hmmmmm, karik mane iha mundu nee barak mak hanoin hanesan ita boot, parese sei laiha feto ida mak sai vitima no moris terus” Noi ninia mãe teni ho lian halerik, halo ha’u mos sente agradese tanba Noi ninia mãe bele simu ona ha’u nia asaun.

“Obrigadu barak, mãe. Buat ida mak presiza mãe hatene! Ha’u nunka sente oinsa apaixonadu ka laran monu ba feto ruma. Ha’u nia fen nee ha’u nia inan-aman mak eskolla ba ha’u, bazeia ba ami nia lisan. Hanesan oan mane boot iha uma laran, ha’u tenke obedese no hakruuk ba dezisaun tomak. Maibe ha’u rasik laiha sentimentu ba nia no nia hatene ida nee” ho aten barani ha’u lekar ami nain rua ho ha’u nia fen ninia segredu ba Noi ninia mãe, maske loloos nee ha’u labele halo ida nee, tanba nee hanesan deit ha’u hamoe ona ha’u nia familia. Maibe ha’u obriga aan halo ida nee ho esperansa katak Noi ninia mãe atu bele komprende no la interpreta salah ha’u nia intensaun ida nee.

“Loos ona, Nino! Ha’u sei buka tempu para oinsa ha’u koalia didiak ho Noi lai. No ha’u mos presiza halo diskusaun ho ha’u nia familia sira. Ami presiza tuur hamutuk hodi desidi ida nee” Noi ninia mãe desidi.

“Diak, mãe! Ha’u hein deit”. Ha’u hatan

“Yea…” Noi ninia mãe hatan no doko ulun mamar.

“Entaun ha’u fila lai. Kuida Noi didiak. Tenke obriga nia haan. Ha’u nia oan tenke hetan nutrisaun diak. Dehan ba ha’u karik nia presiza buat ruma” ha’u husu lisensa ba Noi ninia mãe atu fila ba uma.

“Diak, Nino. Obrigada barak” Noi ninia mãe hatan. “Presiza fó hatene ba Noi?” nia kontinua konfirma.

“Lae, mãe, la presiza ida. Husik nia deskansa ba. Nia kolen demais ho ninia pensamentu. Fó biban ba nia atu nia deskansa. Labele halo nia hanoin barak lai. Mãe mos tenke tenta atu labele halo presaun demais ba nia. Ha’u tauk fó impaktu negativu ba ha’u nia oan.

Ami hamriik, ha’u bensa tiha Noi ninia mãe ninia liman, sinal obedese nuudar mane foun.

Flashback off

To’o iha ha’u nia uma, uma kiik ida ne’ebé ha’u aluga durante asumi kargu hanesan diretur iha sidade ida, ha’u tama liu ba kuartu no tuur mesak hodi lembra fali buat sira ne’ebé akuntese mai ha’u nia moris. Falta fulan haat tan ha’u bele iha ona ema ida mak bolu ha’u pai. Ksolok ida ne’ebé labele sosa ho osan. Hanoin ida nee halo ha'u nia fuan nakfunan.

Loron tuir mai ha’u tama serbisu hanesan bai-bain. Maibe ha’u sente iha buat ruma mak falta. Oras hatudu ona ba tuku sanulu. Noi nia oin seidauk mosu iha serbisu fatin. Ho kuriuzu ha’u lao sai husi ha’u nia fatin no tenta ba hafuhu iha liur. Keta halo ba nia mai tiha maibe seidauk tama mai deit. Ha’u hateke ba mai maibe la hetan. Alina mos mesak tuur deit iha ninia fatin. Ha’u hakbesik ba Alina no konfirma.

“Alina…. “ ha’u bolu nia.

“Ahh.. señor, bondia” Alina hakfodak ho ha’u nia presenza tanba nia fokus hela ho ninia serbisu.

“Noi iha ne’ebé?” ha’u husu ho kuriuzu.

“Nia la tama ida. Ohin ha’u telefone ba nia, mas ninia telemovel desliga hela” Alina mos hanesan preokupa ituan. “Buat ruma akuntese ba nia karik?” Alina kontinua husu.

“Hmmmmm…. Noi ninia mãe nia numeru kontaktu iha ka?” ha’u preokupa no tenta atu liga direitamente ba Noi ninia mãe.

“Aiihh deskulpa señor, laiha ida. Uluk iha duni, maibe tia Ana troka tiha ona ninia numeru ida tuan nee, tanba ninia telefone monu ba bee laran. Tia ninia numeru ida foun nee iha ha’u sei laiha” Alina responde.

“Huufffttt….. orsida meiu-dia mak ha’u liu took ba uma” ha’u desidi.

“Señor, ha’u bele hatene buat ruma?” Alina investiga ha’u tanba haree ha’u inkuitu no la hakmatek.

“Agora oras serbisu. Haree ba halo hotu lai serbisu nee, meiu-dia mak ita ba Noi ninia uma, see Alina hakarak” ha’u oferese opsaun.

“Ahh, obrigada barak. Ha’u mos kuriuzu loos, tanba horseik dader nia telefone ha’u no nia ninia lian hanesan tanis. Nia haruka atu ba tan nia iha uma, maibe iha hela opsital, hamaluk hela mãe ba haree mãe ninia prima baixa hela iha opsital ne’eba” Alina kontente no simu ha’u nia opsaun ne’ebé ha’u oferese.

Tuku sanulu resin rua loloos, ha’u foti ha’u nia pasta, la’o lalais sai mai no hein Alina iha kareta laran. Ha’u kuriuzu loos hakarak haree ona Noi, feto oan ida ne’ebé halo ha’u nia moris nabilan, halo ha’u nia fuan tuku-tuku, halo halo ha’u labele tuur hakmatek, halo ha’u mesak hamnasa bainhira hanoin kona ninia oin no ninia jeitu. Durante nee ha’u tenta subar ha’u nia sentimentu ba nia, tanba tauk nia atu la simu ha’u. Agora ha’u tenke luta atu bele hetan nia absolutamente. Liu-liu tanba agora ha’u nia oan iha ona ninia knotak. Atu saida mak akontese mos, ha’u tenke luta hodi bele hetan nia. Imajina buat hirak nee, halo ha’u la konsiente bainhira Alina mai loke odamatan kareta, tuur tiha iha laran no koalia ba ha’u.

“Lao ona, señor!” ha’u hakfodak.

“Ahh.. sin, sin! Lao ona” ha’u nain hamnasa ha’u nia beik nee.

“Maibe oinsa ho haan meiu-dia nian?” Alina husu.

“Aiihhh loos. Sekarik ita mosu derepente ba mos ladun diak, saa tan iha oras haan meiu-dia nian hanesan nee” ha’u tetu.

“Entau oinsa? Ita haan tiha mak ita bao u ba tiha fila mai mak haan?”

“Lae, hanesan nee deit. Ita ba haan tiha lai iha ristorante ida besik sira nia uma nee, depois mak ita sei ba. Tanba ita ba nee atu sertifika deit ninia kondisaun nee oinsa” ha’u desidi.

“Ok, ha’u tuir deit señor ninia hakarak. Naran katak ita bele ba haree Noi” Alina aseita.

Ha’u diriji volante, dulas ba restaurante ida ne’ebé besik Noi sira nia uma. To’o iha ne’eba ami nain rua Alina tuun, ba order hahan. Haan hotu tiha, ami kontinua ba Noi ninia uma.

Hateke ba portaun taka hela. Ahhh…. saida mak akuntese? Ema sira iha uma nee ba ne’ebé hotu ona?

Liu tiha minutu balun, Anita, Noi ninia prima ne’ebé hela ho sira tun husi mikrolete ida iha uma oin. Ha’u koñese ona Anita tanba momentu ha’u ba vizita Noi ninia uma, feto oan ida nee mak sempre servi kafe ba ha’u no Noi ninia mãe mos fó koñese ona ba ha’u.

“Boa tarde señor diretur” Anita kumprimenta ha’u.

“Heeiiii…… boa tarde, Nita” ha’u hatan ho kontente.

“Señor sira mai hamriik iha liur deit nee?” Anita husu.

“Ahh.. sin, ami presizaatu haree abin Noi saa” Alina tuun husi kareta laran no dehan ba Anita.

“Ohhh… Bin Noi la ba serbisu ka?” Anita duvidu.

“Lae ida, Nita. Nee ma kami mai buka nia nee” ha’u hatan lalais.

“entaun tama mai ba. Parese nia iha uma laran ” Anita konvida ami atu tama ba uma laran depois de nia loke portaun boot nee, maibe ami hakfodak tanba odamatan oin mos taka hela.

“Eihhh… sira sai hotu karik. Odamatan ho janela taka hotu nee?” Anita mos konfujaun.

“Bain-bain la taka ka?” Alina konfirma.

“Sin, abin. bai-bain la taka ida, tanba tia Ana la naran sai ba fatin ruma” Anita esplika.

“Ohhh…..” ha’u dada iis no tolan kabeen araska.

La hatene ema nia oan feto ida nee lori ha’u nia oan iha ninia knotak nee ba ne’ebè loos? Telefone mos desliga tan………..

****

[NB: Olá, belun leitor sira.... obrigada barak tanba tuir ona istoria nee. Hein katak imi la baruk atu nafatin mantein no tuir istoria nee too remata. Keta haluha atu fó komentariu ba istoria nee yeea, guys...

Hakuak boot ba ita hotu].