KUNG kailan nasa huling linggo na si Mabel sa trabaho ay saka naman siya pumalpak. Dalawang oras pa lang siya sa trabaho ay ang dami na niyang maling nagawa. Ibang kulay ng sinulid ang nailagay niya sa kanyang makina at hindi kaagad niya iyon napansin. Nakasira na siya ng dalawang karayom dahil hindi niya iyon nailagay nang tama. Marumi ang naging tahi niya sa karamihan sa kanyang finished product, maraming loose threads.
“Gusto mo bang magpahinga muna?” tanong ni Manang Gina. Naging pasensiyosa sa kanya ang ginang at hindi siya pinagagalitan kahit alam niyang dapat na siyang sabunin. Kaya naman hiyang-hiya siya.
“Hindi po. Kaya ko pong magtrabaho, Manang.” Get your acts together, Mabel!
Umiling si Manang Gina. “Wala ka sa sarili mo, Mabel. Patuloy ka lang gagawa ng mga pagkakamali. Pa
