إلى أين السبيل

الغدر القاتل( الفصل الثاني )

#الغدر_القاتل

#بقلم_منى_المجبري

#part2

تفاعل ضروري ودعوة الاصدقاء بيش يزيد تفاعل القروب?وصلوها200 تعليق?

______________________

_ ابتسمت" صفاء "بِراحة وقربت اكثر من" حمزه "وبدو يديرو في لقطات عشان المصوره والكل منسجم معاهم بس قطع الانسجام خشت" ريناد "وهيا لابسه فستان ابيض امبوج وكله فصوص ورافعه شعرها وميك اب عرايس وبدأ همس الناس وكلامهم ، قربت عليهم وفتحت "صفاء "عيونها على وسعهن من الصدمه سلمت على" صفاء" وسلمت على حمزه وخشت بينهم

ريناد "بِابتسامه": صورينا مع بعضنا

المصوره: تمام ممكن تقرب منها يا عريس وانتِ كذالك ياعروس

_ صفاء... قربت ونا منجمطه ولقيت حمزه مقرب وجوه تمام حسيت للحظه ان فرحان بقربها استغفرت الله وتعوذت من الشيطان ومسكت في يده ابتسملي صورتنا المصوره وطلعت انا وحمزه وريناد معانا لِآخر لحظة

حسناء "بِدموع": رد بالك منها

حمزه: متخفش في اعيوني يا عمتي

صفاء "ودمعتها في رموشها": متبكش يا ماما توا كم يوم ونجيكم

حسناء: ربي يهنيكم يارب

_ طلعت "صفاء" ومعاها حمزه وهوا يرفعلها في الفيلو واكتفت "ريناد" بِنظراتها الغريبه وبس

________________________

_وصلو للحوش(العرسان)

حمزه" بِضحكه": خشي بِرجلك اليمين ههههه

صفاء" بِأرتباك": هههههه حاضر

حمزه: هاتي يدك نخشو مع بعضنا

_صفاء..مديت يدي بِأرتباك وخشينا مع بعضنا، حاول حمزه ينكت ويضحكني لين تريحت ونضنا صلينا مع بعضنا وتعشينا وبدت حياتنا الجديده?

"نخلو العرسان في حالهم شويا??"

___________________________

رواد "بِأستغراب": نموت ونعرف عليش النكد والبكاء بس

حسناء:فقدت اختك واعره راه

رواد : هههههه تي زوجتيها افرحي مش تقعدي تبكي هكي مايصرلهش خير راه ادعي ربي يعقد عسلهم ونقعد انا خال وانتِ جده

حسناء" بِاقتناع": إن شاءالله يارب بنتي مانودلها إلا كل خير

رواد: اليوم فرح جارنا زكريا لكن مقدرتش نمشي عشان صفاء

حسناء: احسن من زمان نقولك فكنا من خلطته ه الشلتوت

رواد: مهما كان جاري من الصغر راه ومعدنه طيب غير الحياة غيراته

_ قطع كلام" رواد" صوت رنة فونه ناض وطلع من الصاله بيش يرد

حسناء: كنك تبحتي فيا هكي تعالي اض*بي

ريناد" بِقهر": مش قصدي بس كنك مع الراجل عليش تكرههيه هكي

حسناء: وانتِ شن دخلك بالرجاله يا قليلت الادب

ريناد "بِخوف": مدخنيش فيه غير حرام نحكو على الناس هكي

حسناء: نعرف الحرام انا متعلمينيش غير علمي روحك الفضيحة الى درتيها اليوم معقولة لابسه قفطان ابيض ورافعه شعرك تحسابي روحك العروسة

ريناد" بتلكلك" : مش قصدي بس هضا القفطان الى لقيت محد شايفه

حسناء: عارفتك حقوده تول نزوجك كان تبي بس اختك شن ذنبها

ريناد" بِدموع": خلاص يا ماما خلاص

_ ريناد... خشيت وسيبت ماما تهزب ودموعي ينزلن كل الى كان في خاطري نعيش للحظة كأني عروسة تمنيت للحظة يكون حمزه زكريا ونصبي جنبه بالابيض بس شفت لِنظرات صفاء رديت للواقع المر وكلام ماما زاد تعبلي نفسيتي ، نضت نبي نغسل وجي بس سمعت كلام طيحني من طولى?

حسناء: كنك شن في وجك مش طبيعي

رواد "بِعبره": زكريا دار حادث وهوا ماشي للصالة وقاعد في للمستشفي وحالته مش مستقره

حسناء "بِصدمه": لا حول ولا قوة الا بالله ربي يشفيه يانويرتي اصغير

_طلع "رواد" والعبره خانقته اما "ريناد" حضنت مخدتها ودموعها ينزلو ورنت اكثر من مرا على" زكريا" بس مفش رد ???????

___________________________

"ثاني يوم الصبح"

_صفاء...فتحت عيوني بِراحة التفتت جنبي ملقتش حمزه نضت من السرير خشيت للحمام ودوشت وطلعت صليت الصبح والفجر ودعيت الله ان يحفظلي حمزه ويسعدني في حياتي، نضت سلحت محرمة الصلاة ورفعت الصلايا على خشت حمزاوي وفي يده صفره الفطور

صفاء" بِشهقه":عليش هضا كله ليش تعب روحك

حمزه: مفش تعب حبيبتي هيا تعالي افطري

صفاء: اسفه حبيبي نضت وخرى سهرت امس

حمزه: صباحيتك مباركه عروستي و من يوم وغادي نوضي زي ماتبي انتِ في قصرك وانا تحت امرك

صفاء "بِحب": ربي مايحرمني منك

حمزه: ولا منك ياحبي الاول والاخير

_ قعمزو وبدو يفطرو و"حمزه" يوكل في "صفاء "وصفاء" زي الصغار متبيش يوكلها وتبي بروحها?

_______________________

"تسريع الاحداث"

"بعد مرور 4 ايام"

_ خش" رواد "من بعد المكالمة الى وصلاته ودمعته على خده

حسناء "بِخوف" : شن صار كنك

رواد" بِغصه": زكريا عطاك عمره ادعيله

حسنآ "بِتأثر": ربي يرحمه عريس الجنه ربي يغفرله اذنوبه وافعاله ان شاءالله ويصبرك

رواد: إن شاءالله طالع للعزاء بالك مع 1 ليل نروح

حسناء: رد بالك على روحك

_ طلع "رواد" ،وسمعت" ريناد "كلامه وعرفت ان "زكريا" الي كانت ه تأخذه منها وليته خذاته منها الموت ،طاحت من طولها قدام باب الدار???

______________________

_ خشت "صفاء" تسحب على اطراف صوابعها وقعمزت جنب" حمزه" الى غارق في الاحلام وقعدت اتنوله في خشمه بِالروج?

صفاء" في سرها": زعما كان ينوض شن يدير فيا أسد الغابة

حمزه" وهوا مغمض اعيونه": احتمال ياكلك وانتِ نيه

_ نطت "صفاء" بصدمه لين طاحت من السرير? فتح "حمزه" اعيونه ورفعها وحطها جنبه

صفاء" بِصدمه": مش كنت راقد يا ممثل

حمزه: مش موضوعنا كنت راقد ولالا يا برنسيسه بس ليش ديري فيا هكي خلاص ضاقت الواسعه تخربشي وجي

صفاء" بِطفوليه وضحكه": مشعارفه **دت لقيت وجك قدامي وكنت ندير في روج جربته على خشمك بس شوف في المرايا شكلك يهبل زي المهرج

حمزه "بِهدوء": مهرج صار ويهبل تعالي نوريك المهرج بعد ينهبل

صفاء "بِخوف": خلاص اسفه اسفه

_ ناضت "صفاء" تجري وحمزه وراها لين مسكها وخذاه الروج وخربشلها خشمها وحطها قدام المرايا

صفاء" بِتدمر": افف عليش هكي محوتك سويت الميك اب

حمزه" بِضحكه": ديريه اخره مش قصه بس شوفي شكلك كيف يهبل زي المهرج سمح شكلك صاح

_ وغمزلها وقعد يضحك وهيا تضحك

صفاء: شرير

حمزه: محد قالك نابشي، م**ده انتِ صاح

صفاء: صحين

حمزه: شن رايك ناخذك تشوفي هلك شويا ونطلعو انتعشو

صفاء: ياريت?

حمزه: هي البسي واطلعيلي في السياره البسي عبايه خيرلك راه

صفاء "بِشقلبت اعيون": به به

_ طلع "حمزه "يسخن في سيارته ولبست "صفاء "على السريع وطلعتله وانطلقو لِحوش هلها?

____________________________

_ خبط الباب قطع شرود "حسناء"،طلعت من الصاله وفتحت الباب لقتها "صفاء" و"حمزه "سلمت عليهم وخش "حمزه "بعد اصرارها عليه

حسناء: معقوله متحشم منا هلك نحنا

حمزه: لا والله ياعمتي غير منبش نقيدكم بس

حسناء: انت زي رواد لا تقيدنا لا شئ

حمزه: ربي يدومك فوق روسنا

حسناء: شخباركم زعلاتك في حاجه هل فصعونه

حمزه" بِضحكه": خليني ساكت ياعمتي

صفاء 'بِصدمه": حمزاوييي خيرلك راه

حمزه: هههههههه خلاص سكتتتت

حسناء: راه يشكي منك نوريك رد بالك على راجلك

صفاء: حاضر غير هوا بصاص بس،وين ريناد مختفيه لا ترن لا شئ

حسناء:منندري عليها كنها لها كم يوم مش على بعضها عدي شوفيها

صفاء "بِخوف": توا نخشلها شوي ونجيكم

_ ناضت" صفاء "ومشت لِدار "ريناد "بس وقفت قدام باب الدار وقعدت تعيط وتنادي" لِحمزه" و"حسناء"

___________________________

يتبع...

ب قلم : #منى_المجبري

ومسموح ب نقل الروايه ب وجود اسمي❤

متابعه للايميل منى المجبري او روايات واقتباسات منى المجبري بالفحى والعامية او واتباد munaalmajbry ، .،❤بقق لووف ليكم