العهد المكتوب

يقول عز وجل "تلك حدود الله ومن يتعد حدود الله فقد ظلم نفسه" سورة الطلاق.

وانا ظلمت نفسى ظلم عظيم ،

اسمعوا حكايتي واحكموا بنفسكم ،

انا ايمان كنت عندي 30 سنة وقت ما بدات حكايتي ،

حلوة ونغشة كدا زي مابيقول ولاد البلد اجتماعية وبشوشة ، بس اللي داخل النفوس حاجة يعلمها العالم واحده ، مقطوعة من شجرة لا ليا ام ولا ليا اب ، ماليش غير مرات خالي ، ست غلبانة كده على قد حالها تعتبر هي اللي ربتني وعلمتني تعليم على قد حاله ، بس اهو احسن من مافيش واكيد احسن من رامية الشارع ، ما هو اصل احساس اليتم ده وحش اوي وأوحش منه احساس الحرمان ، انك تكون نفسك في اي حاجة بس ما ممعكش

وتملكش اى حاجة عشان تقدر تحقق حلم حلمت بيه ، حتى ولو كان صغير ، ممكن يتلخص الحلم ده في فستان تلبسه اول يوم العيد ، أو في شنطة جديدة في اول يوم مدرسة ،

في جزمة تحمي رجلك من برد الشتاء وحرارة الشمس ،

كبرت واشتغلت سكرتيرة ، و كنت قاعدة مع مرات خالي ،لحد ما اتجوزت محسن عامل بناء باليومية ، بس كانت جوازة الندامة وبصراحة الحياة بينا كانت شبه مستحيلة ، اه ما هو لاشبهي ولا في بينا اي وافق نهائي ، راجل فقري بعيد عنكم ، تصدقوا قال يرفض الغ*ي انه يزود الموني شوية رمل زيادة ، مش عايز يفتح مخه ولا يفهم الدنيا ماشية ازاي ، عاملي فيها الشريف العفيف ، اااه بس لو ماكنتش حامل منه ،كنت اتطلقت وغورت من ام البيت الفقر ده ، بس هروح فين ارجع الحارة تاني لمرات خالي وجوزها الرخم ، ااه ماهو بعد ما اتجوزت وسيبتها لف عليها راجل حلانجي كدا واتجوزها عشان ياخد معاشها منها ، اهو اديني صبره على عيشته ولولا شغلي بيسند معايا لكنا زمنا شحاتنا وتعدي الايام وتمر ويحصل اللي مكنتش اتوقعه تحصل الكارثة عند محسن في الشغل ، بسبب عنده ودماغه الناشفة تأمروا عليه أصحابه ، ولفقوا له قضية محترمة ، واتحبس خمس سنين ، بتهمة الغش في مواد البناء ، مش بقولكم فقري ، ومش فاهم الدنيا ماشية ازاي ،اهو خسر شغله وخسر حياته ومستقبله عشان عنيد و غ*ي ، وبغبائه ده ضيعنا معه انا وابنه اللي لسة مافيش الدنيا ، بس انا مش هستسلم للي انا فيه ده ، ومش هقبل انى اعيش ابني العيشه اللي انا عيشتها ،

اول حاجة عملتها رفعت قضية طلاق ، و طبعا أطلقت ،من اول جلسة ،

وركزت في شغلي ماهو ده الامان ليا حاليا خصوصا ان صاحب الشركة اللي كنت بشتغل فيها ناس بيحبوني اوي لاني شايفة شغلي علي اكمل وجه ، اااه ، بس حصل اللي مكنتش عاملة حسابه وهو اني ولدت في الشهر السابع ، للاسف الموضوع جه علي غافلة و مكنتش عاملة حسابى نهائي ، جالي الوجع في الشغل وبصراحة اصاحبي لحقوني وودني المستشفى لاني زي ماقولتلكم مكنتش عاملة حسابى مكنش معايا فلوس المستشفى ، بس بصراحة مراد بيه ومراته اصاحب الشركة لما عرفوا قاموا بالكل المصاريف وقاموا برعايتي على أكمل وجه ، واخدوني عندهم في الفيلا اعيش معاهم ، وحياة مراته بصراحة ست كمل كدا ، ولما عرفت حكايتي من أصحابي ، قالت لجوزها انها هتروح معانا ، وبيني وبينكم انتهزت الفرصة طبعا في حد تجيله فرصة زي ده ويرفضها ، المهم روحت معاهم و كانت فيه داده كدا يا سبحان الله مستريحناش لبعض من اول يوم ،

بس ولا يهمني ، كفاية أصحاب البيت بيرحبوا بيا و شايلني على كفوف الراحة ، لحد ما دخل عليا مراد بيه وطلب مني طلب ووقتها عرفت السبب الحقيقي وراء كل الاهتمام والرعاية ده ، وهو ان الست حياة مراته كانت مريضة بالمرض الخبيث ، وكانت بتعالج وممنوع انها ترضع ،وكانت معاها طفل عمره 3 شهور ، ومحتاجين اللي يرضعه طبيعي لان الولد صحته ضعيفة ، ومحتاج رعاية

وافقت ورحبت اوي ، ماهو كده ضمنت اني اعيش في البيت ده سنتين اكله شاربة ومتهنية اخر هنا ببلاش ومرتبي بقيت بخدوا أضعاف مضاعفة كمان ، ده غير ان مراد بيه كان بيعامل حسام ابني زي ادهم ابنه بظبط كانهم الاتنين أولاده من صلبه ويقول اخو ابني يبقي ابني ، حسام بقي عنده سنه و يلبس أحسن لبس ويتربي احسن تربية ، لحد ما جه اليوم اللي غير حياتي 180 درجة ، وهو وفاة ام ادهم في جلسة علاج ، يومها قررت اني لازم اكون مكانها ، لازم ابني ما يترباش ، ااقل من ادهم ، وفعلا لعبت كويس اوي علي الموضوع ده ، وبصراحة مراد طيب علي قد ما كان بيحب مراته ، بس علي مين ،

كيد النساء غلب كيد الشيطان ،

كنت ديما بتظاهر قدامه باهتمامي بادهم بأكله وشربه وبكل حاجة ، بس طبعا في وقت ما يكونش هو موجود يبقي كل حاجة لحسام ابني ، واستمرت الحياة علي كدا ،

لحد ما كنت نازلة من عند الأولاد بعد ما ناموا سمعت مراد بيتخانق جامد بس ماكنتش عارفة ايه السبب ، بس مراد عمره ماكان عصبي بشكل ده ،

لحد ما عرفت انه بيتخانق مع اخواته ،مراد كان له أخوات أصغر منه ، يعتبر هو اللي رباهم، وكبارهم وعلمهم ، وده كله كان من نصيبه الشخصي من ميراث ابوهم ، ولما كبروا سلمهم ميراثهم ، وهو كان عبارة عن أرض زراعية في الصعيد ، لكن مراد باع نصيبه وفتح به الشركة مع فلوس مراته وعمل منها ثروته ، واتجوز وهو كبير في السن بسبب رعاية اخواته ، بس هم رفضوا ده ، وخصوصا لما خلف أدهم ، لأنه بوجود ادهم راح اي امل في أنهم يورثو في الشركة ، ووقفوا ضده ورفعوا قضية في المحكمة عشان يحجروا عليه بعد جوازي ، وقالوا انهم ليهم حق في الشركة لانها من فلوس ابوهم في الأساس ، وأنكروا كل اللي عمله معهم مراد ،واتهموا بالسفه و بالجنان عشان اتجوزني وهو في السن ده ، وان استغليته ووافقت على الجواز منه رغم ان الفرق بيني وبينه أكثر من 25 سنه وده لانه كتبلي ربع الشركة بيع وشراء ك مهر ليا ، وده طبعا جنن مراد وخاله في الحالة العصبية ده ،

مش بقولكم النفس امارة بسوء ما يعلم بيها الا اللي خلقها ، استكتروا عليه يتجوز ويعيش حياته زيهم ، يااما يديهم تعبه وحق ابنه ، يااما بقي سافيه ومجنون ومحتاج يتحجر عليه ، مراد اتصل بالمحامي وخاف علي أدهم منهم ، فعمل وصية ، بباقي الشركة باسم ادهم ، طبعا انا لما عرفت اتجننت انا كمان ،ازاي يعني انا الربع وادهم باقي الشركة ، بس بعد المحامي ما مشي مراد جاله ازمة قلبية ، وللاسف مات ، وده شيء غضبني اوي يعني ماكنش ينفع يموت قبل الوصية ، ايه الزهق ده يعني هفضل انا وابني خدامين عند ادهم العمر كله ، لا طبعا انا استحالة اسمح بده ، مش بعد العز والهنا اللي عايشين فيه ده يصبح لينا الربع بس ، وابني مش هيكون اقل من ادهم ابدا ، بس اعملها ازاي ده ، فكرت ابعت حد ي**ق الوصية من المحامي قيل ما يسجلها ، وفعلا بعت جوز مرات خالي ، وحاول ي**قها من المكتب المحامي ،بس ملقهاش ، يظهر أنه كان شايلها في مكان محدش يعرف يوصله ، لأنه علي دراية بالمشاكل اللي بين مراد وبين اخواته ،

فضلت افكر لحد جاتني فكرة شيطانية ، ميفكرش فيها الشيطان نفسه ،الذي هتمكني من كل حاجة وكله ليا ولابني شرعا وقانونا وبسهولة جدا ،

وهي اني هتنازل عن الربع الخاص بيا ادهم ،

ووقتها المحامي كان مستغرب كدا ويومها سألني ليه يا مدام ايمان عملتي كدا ،

طبعا ردت وبتمثيل ، وقولتله يا استاذ سيد ، انا عشت مع مراد بكل حب وكل اخلاص ، طبعا رعايته ليا ولابني ده شيء لا يمكن يتقدر بثمن ، و مراد لما كتابلي الربع ده كنت انا رفضه اساسا ، بس هو اللي اصر وقالي ضمان لحقك وحق ابنك ، ومقدرتش ارده الصراحة لكن كفاية عليا اني اقوم بادارة الشركة والمرتب اللي هاخده نظير ادارتي للشركة هو اللي هصرف منه عليا وعلي ابني ، بس طبعا مضطرة اعقد في البيت عشان اراعي الولاد ،

يومها الأستاذ سيد المحامي ، مكنش مصدق ان في لسه ملايكة على الارض ، في الزمن ده ،

وتم التنازل وبقت الشركة كلها باسم ادهم ، وكل حاجة اتسجلت في الشهر العقاري ، وبقت رسمي ، ومشيت كل الخدامين اللي كانوا في البيت ، وطبعا منهم داد حليمة التي كانت مضيقاني ، اساسا ،

وأخذت الأولاد وسافرت بيهم برا مصر لمدة خمس سنين ورجعت ،

وكانوا الاولاد عندهم وقتها ست سنين ، وبعد مارجعت بكام شهر

تفاجأت بخروج جوزي من السجن

وأنه بيطالب بحضانة ابنه ، انا طبعا معترضتش خالص ، واديتهوله بكل سهولة ، طبعا كلكم مستغربين ازاى انا اتنازلت عن ابني بسهولة ده

، عشان يتربى مع ابوه ، طبعا مقدرش احرم الولد من ابوه ، وده اللي كنت بقوله وانا بعيط واخده فعلا وعاش معاه وانا سافرت تاني وعشت برا مصر اكتر من عشرين سنة ،

ورجعت ،

يااااه السنين عدت بسرعة اوي ،

والعيال الصغيرين كبروا ، وبقوا شباب ، وفي يوم بعد ما رجعت من السفر بكام شهر كدا ، اتفاجأت بمحسن طليقي داخل عليا وكان حالته صعبة اوي وكان بيترجاني ، عشان ابننا تعبان ومحتاج عملية تمنها 200000 جنيه ، للأسف في اليوم ده كان عندي الأستاذ سيد ، اللي استغرب ردي لما قولت وانا اجيب منين ، وقتها قالي ، ممكن ناخدها من ادهم بيه ، انتي ادتيله عمرك كله ، وهو مش هيبخل عليكي بمبلغ زي ده ، يومها سكت بس كنت مضيقة اوي ، لان الاستاذ سيد اتصل بادهم وطلبه وقاله يجي حالا عشان عايزه ضروري ،

وفعلا حضر ادهم علي طول واول ماعرف طبعا طلع دفتر الشيكات وحرر شيك ب 250 الف جنيه ،

وانا كنت هطق وقتها وبلعن الظروف اللي جاب محسن هنا في الوقت ده ،

وعمل حسام العملية وبقي كويس جدا ، وأثناء الفترة ده اتقرب ادهم من حسام وبقوا اصحاب جدا ،

وكل يوم والتاني ادهم بقي يعزم حسام في الفيلا عندنا ، وخصوصا ان ادهم كان بيجهز لفرحة ، لحد ما في يوم من الايام مكنتش عاملة حسابه خالص وهو ظهور داده حليمة من جديد في حياتي ، كانت عايزة تطمن علي أدهم ، وهي الوحيدة اللى معملتش حسابها لانها اكتر وحده كانت عايشة معانا وعارفة شكل الاطفال ، ااه مقدرتش تفرق بينهم لما كبروا ، بس لسوء الحظ اليوم ده كان حسام وادهم في حمام السباحة وهي كانت جاية تبارك لادهم بس لقيتها صرخت باسم ادهم ، ماهي الوحيدة اللي عرفتهم ،اااه عرفت تفرق بينهم لان ادهم كان على كتفه شامة ، ولانها هي كانت بتراعيه وهو صغير شافتها في كتفه وسالت امه عليها و عرفت انها عندها شامة زي ده في نفس المكان فضلت تقول انت ادهم انت أدهم مراد ،وكانت بتشاور علي حسام ، طبعا انا اتهمتها بالجنان اهو

لكبر سنها ، بس للاسف طبعا هي كلامها كله صح ، اه طبعا كلكم مش متخيلين الجبروت ده وانه في حد ممكن يفكر كده ، ولاني كان الحرام عاميني ، عملت كدا اكلت مال اليتيم و اخذت حقه واديته لابني ، اخدت ابني واديته اسم مش اسمه ، واديته حق مش حقه ، بدلت الاطفال وادهم الحقيقي اديته لمحسن علي انه حسام وعاش ادهم في الفقر واخد حسام ابني كل الميراث وعاش هو في العز و النغنغة مكان ادهم،

بس ماكنتش عاملة حساب انتقام الخالق العدل الجبار ،

حسبتها بحساب الشيطان ونسيت تدبير ربنا الذي لا يغفل ولا ينام ، بس كان الثمن غالى اوى ،

انا قلقت بعد اللي حصل من دادا حليمه وعرفت انها راحت للأستاذ سيد المحامي وقالتلة كل حاجة ، وانا عارفه انه راجل عقر ، واكيد هينخور في الموضوع ومش هيسكت ،

قولت لازم اهرب بالاتنين ، واخدهم واسافر في اي حتة

وحكيت لحسام الحقبقي وعرفته كل الحكاية ، واتفقت معاه اننا نبيع كل حاجة ونسافر بعيد عن عيونهم وعن اي حد ممكن يعرفنا ، وفعلا جه يوم الفرح وشوفت ابني اجمل عريس، وكانت الدنيا مش سيعاني ، بس عقاب ربنا كان نفذ في وسط فرحتي بابني اسمع صوت رصاص ويقع ابني غرقان في دمه وبدل ما يدخل دنيا خرج منها ،

زي ما طمعت واخدت حق اليتيم واديته لابني ، اهو دفع هو تمن ذنب مش ذنبه ،

اخوات مراد لما عرفوا اني رجعت من السفر بابني اتفقوا يقتلوه ،

عشان الشركة ترجعلهم ، لانهم ميعرفوش ادهم اصلا ولا عمرهم شافوه ، قتلوا حسام علي انه ادهم فضلت حضنة ابني واصرخ باسمه وانده واقول روحت مني ياحسام ، لا لا يارب مقدرش علي العقاب ده ، ليه كده، ياريتها كانت تيجي فيا انا وانت لا ياحبيبي ، افد*ك بعمري يابني ،

ومسكت في ادهم الحقيقي وقولتله انت اللي المفروض تموت مش هو ، هو مش ذنبه حاجة ،

ومن يومها وانا في المصحة النفسية بقالي عشر سنين ، وادهم رجع اسمه واخد حقه لما عمل تحليل الـ DNA

واخوات مراد أخذوا إعدام وادهم هو حاليا اللي بيرعاني ويدفع مصاريف المصحة ، هو وطليقي محسن

من يومها وانا بقيم الليل ، لعلي ربنا يقبل توبتى وافضل ساجدة اناجيه بدموعي وان يقبل توبتي ، وأنه يرحم ابني ويسامحه ،

خلصت حكايتي ، وفي النهاية عايزة اقولكم

أن لا حيلة فى الرزق ولا شفاعة في الموت وان رزقك جاي جاي بس لو استعجلت عليه هتاخذه وعليه ذنوب

واعرفوا ان في حاجة اسمها

العدالة الإلهيَّةُ

قال صلى الله عليه وسلم

يكتب الله للعباد أرزاقهم وهم في بطون أمهاتهم:

النهاية