العاصي

الفصل الثاني

- اول يوم ليا فى السكن بعد موضبت حاجتى طلعت قعدت مع الشباب

انا : اذيكم يا اخوانا

مجدى : اهلا بيك يا دياب ياريت تكون مرتاح معانا

انا : اه تمام والشقه باين عليها كويسه

محمد : على العموم لو احتجت اى حاجه ماتت**فش مننا

انا : اكيد طبعا

يوسف : انت من فين يا دياب

انا : من الاقصر

يوسف : احسن ناس

انا : تسلم ياكبير

يوسف : مش عاوزك تعتبر نفسك فى غربه خالص ... احنا كلنا هنا بعيد عن اهالينا واصحابنا علشان كده عاوزين نبقى اصحاب مع بعض ونعوض بعدنا عن اهالينا

انا : اكيد طبعا

مجدى : بس ياخوانا لازم نتفق الاول على نظام نمشى بيه من الاول علشان مايحصلش مشاكل مابينا فى المستقبل

انا : اكيد طبعا لازم نعمل نظام

مجدى : الشقه هنا اوضتين ... دياب ومحمد فى أوضه ... وانا ويوسف فى اوضه ... بالنسبه للنضافه كل اتنين مسئولين عن نضافة اوضتهم .... بالنسبه للحمام اللى يستخدمه ينضفه بعده .... والمطبخ نفس الكلام اى حد يعمل اكل بعد مايخلص على طول يغسل المواعين وينضف بعده .... اما بالنسبه للصاله كل يوم تنضيفها على واحد .... احنا اجازتنا فى الجامعه جمعه وسبت ... انا هنزل البلد كل يوم خميس بعد الجامعه وهرجع الجمعه بالليل او السبت الصبح .... ياريت كل يوم سبت نتجمع كلنا ونمسح الشقه كلها .... مش عاوزين الشقه تتوسخ نهائى

انا : كده تمام وياريت كلنا نمشى على النظام ده

يوسف : احنا كده اتفقنا على النظام

محمد : طبعا يايوسف انت ومجدى هتنزلوا البلد كل اسبوع وهتسبونى لوحدى مع دياب

مجدى : ياعم علشان يونسك وماتبقاش لوحدك

يوسف : صحيح يا دياب انت مش هتنزل البلد غير فى اجازة نص السنه

انا : ولا نص سنه ولا اخر سنه حتى

مجدى : ليه كده يابنى

انا : وانزل البلد ليه

يوسف : علشان تشوف ابوك وامك واخواتك

انا : انا ابويا وامى متوفيين وماعنديش اخوات اصلا

يوسف : انا اسف .... ماكنتش اعرف

انا : ولا يهمك

مجدى : طب انت عايش مع مين فى البلد

انا : كنت عايش وحدى

مجدى : ليه مالكش اعمام ولا خيلان فى البلد

انا : لا فى مشاكل بينى وبين اعمامى فى البلد وتقريبا العلاقه بينى وبينهم مقطوعه

مجدى : امال مين اللى بيصرف عليك ومدخلك جامعه خاصه

انا: لا الجامعه دى منحه اخدتها .... اما المصاريف انا بصرف من معاش ابويا وماشى الحال

مجدى : احنا اسفين اذا كنا قلبنا عليك المواجع

انا : لا مفيش مشكله ولا حاجه

- المهم اخدنا سهراننا مع بعض وبعد كده بيومين نزلنا الجامعه وعدى شهر فى الجامعه وكنت عملتلى شله هناك وكانت الشله دى كبيره شويه وهما :

- اسامه من مصر القديمه بس كان عايش فى الامارات بس نزل يكمل دراسه فى مصر

- باسم من المنوفيه

- مصطفى من مدينة نصر

- ابراهيم من مدينة نصر

- جمال ( جيمى ) من المعادى

- يمنى ساكنه فى كمبوند فى الشيخ زايد

- فريده من المنصوره

- امنيه من الشرقيه

- ياسمين من مدينة نصر

- راما من سوريا

ودى كانت الشله بتاعتى فى الجامعه وكنا بنحب بعض ومرتاحين مع بعض

ومفيش اى مشاكل مابينا والحياه ماشيه كويس

- فى يوم اخدت الهدوم اللى محتاجه تروح للمغسله ونزلت .... كان الوقت متاخر ولقيت المكوجى قاعد لوحده سهران فى المحل

انا : خد الهدوم دى ياعم خالد محتاجه غسيل ومكوى

خالد : طب تمام ياهندسه سيبها وبكره بالليل تعالى خدها

انا : طب تمام ياعم خالد محتاج منى حاجه

خالد : لا تسلم ياهندسه ..... ولا اقولك انا قاعد لوحدى سهران لو فاضى اقعد معايا نشربلنا كوبايتين شاى مع بعض

انا : بس كده ماشى ياعم خالد علقلنا على الشاى

وعمل الشاى وقعدنا مع بعض

خالد : انت من فين يا دياب

انا : من الاقصر ياخالد

خالد : احسن ناس ..... تعرف ان انا كمان اصلى من اسوان بس عايش هنا من اكتر من 30 سنه

انا : يعنى صعايده زى بعض

خالد : اه ياسيدى صعايده

انا : وأيه اللى جابك هنا

خالد : ابويا جاله شغل هنا زمان وجيه استقر هنا واحنا جينا معاه

انا : طب تمام

خالد : وايه اخبار الدنيا فى الاقصر

انا : زى ماهى مافيش جديد

خالد : وايه اخبار الاثار عندكم

انا : مالها الاثار يعنى

خالد : يعنى لسه فى ناس بتحفر وتطلع أثار

انا : اكيد فى بس انا معرفش حد ليه فى الموضوع ده

خالد : على العموم لو فى حاجه كده ولا كده قدامك انا سداد ومعايا المشترى

انا : بصراحه انا معرفش حد ليه فى الكلام ده بس أوعدك لو فى حد كلمنى فى حاجه زى دى هبلغك على طول

خالد : وانا هستناك

• ومشيت من عند خالد من غير ماحط كلامه فى دماغى اصلا ولا عملتله اى اعتبار وعدت الايام فى الكليه وامتحنا الميدتيرم وبعد ماخلصنا كنت فى يوم قاعد فى كافتريا الكليه لوحدى ودخلت عليا يمنى زميلتى

يمنى : ايه يا ديبو قاعد وحدك كده ليه

انا : اعمل ايه معظم الشله ماجتش النهارده والباقى مش عارف هما فين

يمنى : انت ليه على طول ساكت كده وقاعد لوحدك

انا : ساكت ازاى يعنى ما انا قاعد معاكى وبتكلم

يمنى : مش قصدى كده

انا : قصدك ايه ياستى

يمنى : يعنى طول ما احنا قاعدين مع بعض انت بترد على قد السؤال ومش بتشترك معانا فى الكلام الا قليل جدا ولو مالقيتش حد موجود فى الكافتريا بتقعد لوحدك ومش بتدور على الناس

انا : انا طبعى كده انطوائى شويه ومش بعرف اتكلم كتير

يمنى : انت معاك حاجه يوم السبت

انا : لا عادى يعنى مفيش حاجه محدده .... ليه فى ايه يوم السبت

يمنى : فى رحله دريم بارك تبع الجامعه وانا بفكر اطلعها .... ايه رائيك تيجى معايا

انا : ماعنديش مانع نطلعها عادى .... ونشوف بالمره الشله لو حد حابب يطلع معانا

يمنى : كده .... طب تمام انا هشوفهم علشان ندفع المصاريف

انا : تمام كده

• ودفعنا الاشتراك بتاع الرحله وطلعنا كلنا حتى صحابى اللى معايا فى السكن طلعوا معانا واخدنا اليوم كله لعب وهزار لحد ماتعبنا وبعد ماخلصنا الاتوبيس بتاع الجامعه رجعنا تانى عند الجامعه والوقت كان متاخر والمنطقه فى الوقت ده بتبقى مقطوعه بس الكلام ده من سنين لكن دلوقتى اتعمرت وبقيت تمام ..... اول مارجعنا عند الجامعه كل واحد شاف طريقه ومشى ببص على يمنى لقيتها واقفه وحدها

انا : ايه يابنتى واقفه هنا ليه

يمنى : مستنيه اخويا يجى ياخدنى

انا : هو فين اخوكى

يمنى : انا اتصلت بيه وبيقول قدامه نص ساعه ويوصل

انا : طب هتقفى ازاى فى المنطقه المقطوعه دى

يمنى : يعنى هعمل أيه ... اهو مستنيه

انا : طب انا هستنى معاكى

يمنى : يابنى روح ارتاح

انا : ياستى مش مشكله من نص ساعه بس استنى دقيقه هقول لصحابى يسبقونى على السكن .... وقولت لصحابى يسبقونى ورجعت ليمنى وكلمت الامن بتاع الجامعه طلعولنا كرسيين قعدنا عليهم وبعد نص ساعه اخوها وصل وشافنى معاها

محمد : معلش اتاخرت عليكى بس الطريق واقف

يمنى : مش مشكله

محمد : معرفتيناش على الاستاذ

يمنى : معلش نسيت ... دياب عبدالرحمن زميلى فى الجامعه ومرضيش يمشى ويسبنى فى الحته المقطوعه دى

محمد : اهلا وسهلا يابشمهندس والف شكر انك مسبتش يمنى لوحدها

انا : لا شكر على واجب وبعدين دى الاصول

محمد : مش عارف اقولك ايه بجد

انا : ياعم ولاتقول ولا تعيد .... انت تاخد اختك وتمشى علشان لسه مشواركم طويل

محمد : انت ساكن فين

انا : عند المفارق بعد القسم بشويه

محمد : طب اركب العربيه اوصلك

انا : مفيش داعى انا هركب اى مواصله من هنا

محمد : والله ماينفع لازم اوصلك

انا : طب بتحلف ليه دلوقتى

محمد : يلا ياعم اركب وبطل كلام كتير

انا : ماشى ياعم يلا بينا

• وركبت معاهم العربيه ووصلونى لحد باب العماره اللى ساكن فبها ومشيوا وانا طلعت شقتى ... اخدت شاور واتعشيت ودخلت علشان انام بس قلبت شويه ف الفيسبوك بتاعى ولسه هنام تليفونى رن وكانت يمنى اللى على التليفون

انا : الوووووو ... ايه يابنتى وصلتى بالسلامه

يمنى : اه تمام لسه واصله من شويه

انا : خير بتتصلى فى حاجه

يمنى : ايوه الدكتوره ماجده عاوزه تكلمك

انا : مين الدكتوره ماجده دى

يمنى : دى تبقى ماما ... عاوزه تشكرك على اللى عملته معايا

انا : يابنتى انتى كبرتى الحكايه ليه كده

يمنى : ياعم خد ماما وكلمها

انا: ماشى ياستى اديهانى

ماجده : ازيك يادياب

انا : الحمد لله يادكتور

ماجده : الف شكر يابنى على اللى انت عملته مع بنتى

انا : انا معملتش غير الواجب يافندم

ماجده : باين عليك شهم وابن ناس

انا : الف شكر يافندم

ماجده : اعمل حسابك انت معزوم على الغدا اول ما البشمهندس يوصل من السفر

انا : مفيش داعى للتعب حضرتك

ماجده : ولا تعب ولا حاجه .... وبعدين انا عاوزه اتعرف عليك ده لو معندكش مانع

انا : لا ازاى يافندم .... انا اتمنى

ماجده : خلاص احنا اتفقنا على العزومه .... هخلى يمنى تاكد عليك المعاد بالظبط

انا : زى ما تحبى يافندم

• وقفلت مع يمنى ومامتها وبعد يومين كنت قاعد فى الجامعه لوحدى ودخل عليا باسم وقعد معايا

انا : ايه يابنى كنت فين

باسم كنت فى المكتبه بصور ورق

انا : وليه بتنهج كده

باسم : اصل كان فى مشكله كده فوق

انا : مشكلة ايه دى

باسم : صاحبك عامل مشكله كبيره وحوار كده

انا : يلا ياعم كل واحد حر

باسم : لا بس ده زودها جامد

انا : ياعم زودها ولا مزودهاش هو حر

باسم : انت لسه رافض تكلمه

انا : مش فكرة رافض .... بس بجد مفيش كلام بينا

باسم : اموت واعرف ايه سبب المشكله

انا : ياعم ولا مشكله ولا حاجه هى جات كده

باسم : يابنى الراجل جالك كتير علشان يتكلم معاك وانت رافض نهائى تكلمه

انا : مش كل الغلط بيتحل بالكلام

باسم : انا معاك فى اللى انت بتقوله بس الراجل مستعد ينفذ اى حاجه انت تطلبها

انا : اللى يرضينى هو ميقدرش عليه

باسم : ليه يعنى

انا: هو كلمك تانى فى الموضوع ده

باسم : ايوه قابلنى من كام يوم واتكلم معايا وقالى اكلمك

انا : خلاص لو كلمك تانى قوله دياب بيقولك انساه ولا كأنك تعرفه

باسم : على العموم هو اخر سنه ليه فى الجامعه وهيسيبها وترتاح منه

انا : سيبك منه دلوقتى وخلينا فى المهم

باسم : ايه المهم ده

انا : نتيجة الميدتيرم هتظهر امتى

باسم : فى خلال يوم او اتنين بالكتير

انا : خلاص تمام كده

• فى يوم قررنا انا والشله بتاعة الجامعه نروح مول العرب نتفسح هناك وندخل سينما وبالفعل ظبطنا نفسنا وروحنا كلنا المول واتفسحنا وحجزنا تذاكر السينما فى حفلة الساعه 10 وكان فيلم الخليه بتاع احمد عز ولسه قدامنا اكتر من ساعه ونص على المعاد .... باسم اقترح اننا نقعد فى اى كافيه عند النافوره لحد مايجى معاد الفيلم وبالفعل روحنا وقعدنا وبنضحك وبنهزر ومفيش فى دماغى أى حاجه .... وفجأه دخل عليا اخر حد ممكن اتوقعه

ياترى مين اللى دخل عليا .... ده اللى هنعرفه الحلقة اللى جايه

# # # # # # # # # # # # # # # # # # # # # # # # # # #