TOTOO ngang mansyon ang bumungad sa paningin niya nang umahon siya sa kalsadang iyon. Mansyon sa laki subalit mas higit na log cabin ang design. Makapal ang mga halaman at punong nakatanim sa paligid. At mga halaman din ang nagsisilbing bakod ng bakuran.
Walang gate ang bakuran. Huminto siya makalagpas sa tapat ng drive-way at saka nagmasid. Buhat sa verandah sa pangalawang palapag ng mansyon ay may natanaw siyang babae. Bahagya siyang kumaway para mapansin nito. Sumenyas iyon na maghintay siya.
Mestiza at medyo maliit ang babaeng sumaludar sa kanya. Ito din ang babaeng natanaw niya kanina buhat sa verandah.
“Magandang araw,” bati niya.
“Magandang araw sa iyo. Anong kailangan mo?” nakangiting sagot nito.
“Hinahanap ko si Vera Mae. Dito ba siya nakatira?”
Tinitigan siya nito.
