Oblivion Memories (COMPLETED)

CHAPTER 16

Chapter 16

Dictionary

Simula ng araw na nakasama niya si Ross. Ang kanilang naudlot na pananghalian, ang biglaang pang-iiwan sa kanya nito at ang eksenang nakita siya na may kahalikang babae at pagkatapos ng mga nagdaang araw ay hindi na niya nakita pa ang dalaga.

Kahit anino nito ay hindi na niya nakita. Parang nagtatago ito na ewan.

Naiinis siya sa kanyang sarili at paulit-ulit na pinagsisisihan ang lahat. Nagpadala siya sa tukso at iyon ang bagay na kinaiinisan niya.

Dahil sa pagkainis niya ay dumistansya na siya kay Fastian. Kinakausap na lamang niya ang kaibigan kung mag-isa lang itong nakikita niyang naglalakad-lakad sa tabing dagat.

At kapag nakakasalubong niya ang mga ito ay sumisibat siya kaagad. Dadaan siya sa ibang direksyon. Ayaw niya kasing makita ang anak ng kaibigan niya.

Naiinis din kasi siya sa tuwing nakikita niya si Farchiara at takot na naman siya na matukso pa siya nito.

Bukas ay babalik na sila sa Manila. Dahil tapos na rin ang isang linggong bakasyon nila. Balik sa trabaho na naman siya.

Magtatrabaho na naman siya sa loob ng boring na opisina niya. Ang lamesa niyang nakatambak na ng maraming papel. Mga papel na pipirmahan niya at walang sawang babasahin lahat ang mga reports. Magiging busy na naman siya.

Pero parang wala pa siyang balak na umuwi, lalo na't hindi pa niya nakikita at nakakausap ang dalaga. Siguro nagalit ito sa kanya? Pero wala siyang maisip na dahilan na nagalit ito sa kanya. Hindi naman siya nakagawa ng mali na puwedeng magalit sa kanya si Ross.

Sa totoo lang ay siya ang dapat na magalit at magtampo dahil iniwan kaagad siya nito ng walang pasabi. Excited pa naman siyang kumain ng pananghalian kasama si Ross pero mauudlot lamang iyon.

O baka naman ay umuwi na ang dalaga sa kanila? Pero imposible naman, dahil binabantayan niya si Mang Prodencio kung may hinahatid itong turista.

Hindi naman niya nakita roon ang dalaga at baka nga ay iniiwasan na siya nito. Baka inakala na may girlfriend na siya? Baka nagalit? Dumistansya sa kanya dahil sa mga nakita nito?

Hindi niya alam, parang sasabog ang ulo niya sa kakaisip ng puwedeng maging dahilan.

"Ah! Nakakainis. Ross, alam mo ba? Para kang droga na nakakasira ng utak at pag-iisip ko. Para kang droga na nakakaadik," mahinang bulong niya.

Nasa loob siya sa kanyang silid at nakadapa sa malaking kama niya.

Bukas na nga sila uuwi at hanggang ngayon ay hindi pa siya nag-iimpake ng mga gamit niya.

Sabi ng wala pa siyang balak na umuwi. Gusto na muna niyang manatili. Pero alam niya sa sarili niya na kailangan niya ring bumalik para sa trabaho.

Napaungol siya at humugot ng malalim na buntong-hininga. Tumayo siya at may naisip.

"I'll search for you again, Ross."

Lumapit siya sa closet niya at hinablot niya ang puting shirt niya at mabilis na sinuot ito. Wala kasi siyang damit na pang-itaas.

Dahil nga na kagigising lamang niya. Napuyat na naman siya kagabi dahil walang araw na nagdaan na hindi niya hinanap si Ross.

Gusto niya talagang makita at makausap ulit ito. Parang girlfriend niya ito na tinataguan siya dahil nagseselos ito at nagtatampo sa kanya.

Dahil sa kanyang naisip ay hindi niya mapigilang mapangisi.

"Ano kaya ang reaksyon niya kung nagseselos?"

Mabilis na lumabas siya sa kanyang silid at muling hinanap ang dalaga.

***

Kasalukuyang nakaupo si Ross na malapit sa bintana ng silid ni Rie at tahimik na nagbabasa ng dictionary.

Nakita niya ito sa bahay ni Carlea ng minsan na pumunta sila kina Carlea. Nanganak na kasi ito. She delivered a newborn baby girl.

Nakita niya ang iilang libro na nasa maliit na lamesa nito at nakita niya roon ang isang dictionary. Kung saan nakasulat lahat ang mga salitang binibigkas ng mga ito na hindi niya naiintidihan.

Parang translate ito sa lingguwaheng English. Sa loob ng pananatili niya sa bahay ay nagbasa't nag-aral lang siya.

Una niyang natuklasan ang ibig sabihin ng 'nanay'. Sa salitang English, ang kahulugan nito ay 'mother'.

At dahil madali siyang matuto, ang iilan na mga sinasabi nina Rie ay naiintindihan na niya.

May mga malalalim pa na salita na hindi pa niya nakukuhang intindihin pero sinusubukan niyang pag-aralan at isa-ulo lahat. Hiniram niya ito kay Carlea para kahit papaano ay may maintindihan siya.

Sa ilang araw na pananatili niya sa silid ay saglit na nawaglit sa isipan niya ang binata.

Talagang binuhos niya ang buong atensyon niya sa pag-aaral ng mga lingguwahe ng mga ito.

Pero minsan din ay naiisip niya ito at parang hinahanap-hanap ang presensya ng binata. At hindi pa rin niya nakakalimutan ang kahalikan nitong babae.

May kaunti pa ring kirot sa puso niya at para siyang maiiyak kung naaalala iyon. Nilapag niya ang hawak na dictionary sa lamesa.

She shook her head and she took a deep breath. She stood up from the chair and slowly walk closer towards the door.

Sa paglabas niya sa silid ay naabutan niyang nakaupo roon si Mang Prodencio. Nag-aayos ito ng lambat at nang mapansin siya nito ay nginitian siya ng matanda.

Ginantihan niya ng magandang ngiti si Mang Prodencio saka siya lumapit. Umupo siya sa tabi nito.

"Kamusta ka, hija?" tanong nito sa kanya.

'Kamusta ka?' ulit niya sa tanong nito.

Kung sa lingguwahe nila ang ibig sabihin nito o ang tanong nito ay... 'How are you?'. Kung sasagot siya sa lingguwahe nito ay ang isasagot niya ay, 'Ayos lang ako, o mabuti naman ako.'

Isa sa napag-aralan niya ang salitang ho at po. Nangangahulugan ito ng pagrespeto sa mga matatanda o iba pa. Sa mga tao na gusto mong respetuhin.

At dahil nga na hindi siya nakakapagsalita ay nginitian na lamang niya ito at tumango.

Mukhang naintindihan naman siya nito kaya ipinagpatuloy na nito ang ginagawang pag-aayos ng lambat.

Ilang minuto lang ang nakakalipas ay pumasok si Rie sa loob ng kabahayan.

"Ate Ross! Samahan mo ako dali!" biglang saad nito pagkapasok pa lamang.

Ate, ang ibig sabihin nito ay elder sister or sister. Napangiti siya ng may naiintindihan na siya. Pero gusto pa niyang pag-aralan ang lahat.

Dahil sa dictionary ay natutunan niya at naiintindihan niya ang mga sinasabi nina Rie. Parang achievements iyon para sa kanya at nakatulong talaga ang dictionary na ito.

Sana magawa niya ring makapagsalita para hindi na siya masyadong mahirapan pa.

Hindi 'yong pag-ngiti at pagtango lang ang nagagawa niya. Para nga siyang bata na hindi pa nakakapagsalita nang maayos.