Dahan-dahang inihihiga ni Maro si Neo sa kama nito. Nasa loob sila ng kwarto ng huli. Nakatingin naman si Neo kay Maro. Napapansin niya ang seryosong itsura nito.
“Magpahinga ka na,” matamlay na sabi ni Maro. Ngumiti ito ng pilit nang tingnan si Neo pagkatapos itong kumutan.
“Okay ka lang ba?” nag-aalalang tanong ni Neo.
Walang sigla na tumango-tango si Maro.
“Okay lang ako.”
Huminga nang malalim si Neo. Hinawakan niya ang kanang kamay ni Maro. Napatingin naman doon si Maro.
“Maupo ka na muna.”
Ngumiti nang tipid si Maro. Sinunuod niya ang utos ni Neo at umupo siya sa gilid ng kama.
Humigpit ang hawak ni Neo sa kamay ni Maro. Napatingin si Maro sa mukha ni Neo. Nakita niya ang nakasilay na tipid na ngiti sa labi nito.
“Mukhang hindi ka okay,” sabi ni Neo. “Dahil ba ito sa kanina?”
