NAGULAT si Khloe nang makitang muli ang kanyang ina. Nagmano sila ni Zantiago rito. Isang linggo lang siyang nawala ngunit ang laki ng ipinagbago ng kanyang ina. Una niyang napansin ang tabas at kulay ng buhok. Ang dating itim ay kulay-kalawang na ngayon na may highlights pa. Mas maaliwalas ang mukha. Napipintahan din ng matingkad na pula ang mga kuko.
“Ano po’ng ginawa n’yo sa sarili n’yo?” Hindi kailanman nahilig sa pagpapaganda ang kanyang ina. Madalas niya itong yayain sa salon ngunit palaging tumatanggi.
Natawa ang kanyang ina. Mukhang masayang-masaya at hindi man lang yata siya na-miss. “Itong si Goryo. Napakaraming kaartehang nalalaman. Naikuwento niya na may salon sila ni Tiago sa Amerika kaya naisipan kong magpagupit. Mga artista raw ang mga kliyente niya, eh. Aba, itong baklang
