Hindi mapakali si Dorothea habang nakaupo siya sa higaan ni Amsel. Hindi siya makapaniwala na ang linis ng loob ng kwarto nito, pero halatang hindi rin pinag-isipan ang mga gamit dahil magkakaibang kulay iyon.
‘Yung cabinet ay kulay puti, ‘yung lamesa ay kulay navy blue, ‘yung kobre kama ay kulay pink na mukhang hiniram pa nito sa ate niya.
Parang kung ano na lang ang mabiling gamit ay iyon na lang, tapos ay may TV rin na mukhang nilalaruan nito ng Xbox na nandoon.
‘Yung higaan din ay malaki para sa isang tao. May nakakatabi ba ito rito? May maliit na bedside table sa gilid, nandoon ang phone nito at kulay itim na lighter.
Nag-angat siya ng tingin kay Amsel nang pumasok ito, tinawag kasi ito agad ng ate niya kanina. Pinilit niya pa nga na bumaba dahil baka umakyat pa, nakakahiya ‘yon.
