INIWASAN ni Angelique na sulyapan ang bahay nina Chris nang pauwi na sila ni Angge. Buhat nang malaman niyang nagbabalak umuwi ang mga ito ay parang hindi na rin nawala ang takot niya sa dibdib. Ganoon siguro talaga. Hindi niya maitanggi sa sarili na inaatake siya ng matinding guilt.
Pero wala namang alam ang mga ito. At wala siyang balak ipaalam sa mga ito. Kahit kay Lolo Daddy ay hindi rin niya binubuksan ang usapan tungkol sa tunay na ama ni Angge. Pinili niyang itikom ang bibig tungkol doon. At sa palagay niya, tinanggap na rin ng lolo niya na bunga talaga ng matagumpay na artificial insemination si Angge.
Sinulyapan niya rin ang bahay nina Chris gaya ng nakasanayan niya. Wala namang siyang nakitang pagkakaiba doon. Palagi ring bukas ang ilaw sa harap ng bahay at sa gate kung saan na
