MAAGANG nagising si Yu kinabukasan dahil kailangan niyang magpunta sa Diamond Records bago ang iba pa niyang appointments sa araw na iyon. Magaan ang pakiramdam niya dahil mamayang gabi magkikita silang muli ni Matt. Katatapos lang magbihis ni Yu nang tumunog ang kanyang cell phone. Si Rick ang tumatawag.
“Nasa loob ka pa rin ba ng unit mo?” agad na tanong ni Rick hindi pa man siya nakakapag-“hello.”
Kumunot ang noo ni Yu. “Oo. Bakit?” nagtatakang tanong niya.
Narinig ni Yu na bumuntong-hininga si Rick na tila nakahinga nang maluwag. “Good. Huwag ka munang lalabas. Ipapasundo kita.”
Lalong lumalim ang pagkakakunot ng noo ni Yu. “Kaya ko namang magpunta sa Diamond Records nang mag-isa. Bakit kailangan mo pa akong ipasundo?”
“Yu, maraming reporters sa labas ng condominium building mo. M
