"Sachi, hindi pwede! Hindi ka pwedeng manatili rito. Kailangan mong sumama sa akin," pamimilit ko sa kanya.
"Kung naduduwag kang harapin siya, pwes ako ang gagawa!" maigting pa rin niyang sabi.
Sa pagkakataong ito ay naramdaman ko ang isang uri ng galit na sinamahan ng takot. Hindi ako makapapayag na magkakaharap muli sina Sachi at Judas.
"Duwag? Hindi ako duwag, Sachi. Buong buhay ko, inalis ko na ang salitang iyan sa bokabularyo ko. Hindi pagiging duwag ang pag-iwas sa laban, Sachi. Ang laban ay ginagamitan ng talino at diskarte. Sige, sabihin mo nga kung paano mo siya haharapin. Sabihin na nating may milagro at masasaktan o mapapatay mo siya, anong magagawa mo sa harapan ng mga baril ng tauhan niya? Oo, nagagamit mo na ang mga binti mo pero kaya mo bang gapiin ang lahat ng tauhan
