GRANDIOSONG PALARO

Gaano kahalaga ang apatnapu’t apat na milyong piso?   Para sa mahihirap na mamamayan sa labas ng Siyudad  ng Siklo, iyon ang diyos. Ang tanging bagay na makapagsasalba sa kanila mula sa patuloy na pagkain ng malapit na ring maubos sa imbak ng daga, at ang makapagbibigay sa kanila ng kaligtasan mula sa napipintong kanibalismo. At ang diyos na iyon ay isang beses lamang sa isang taon kung dumalaw sa kanilang sektor. Iyon ang gantimpala na makukuha ng tatanghaling kampeon ng Grandiosong Palaro: ang taunang palaro ng Siyudad.   Kaya naman sa paparating na araw na iyon, ay buo na ang desisyon ni Faizal na sumali roon upang mailigtas ang kaniyang pamilya. Iyon lamang ang nag-iisang araw na maaaring makapasok sa mataas na pader ng Siyudad ang mga katulad nilang nasa mahihirap na Sektor. Ang desperasyon na mabago ang kanilang buhay ang nagtulak sa kaniya na sumali sa daan-daang mga aplikante ng palaro.   Ngunit sa pagpasok niya sa Siklo, ibang laro ang matutuklasan niya: ang laro ng buhay at kamatayan, ang laro ng luha at hinagpis, at ang laro ng takot. Nalaman niyang hindi ang apatnapu’t apat na milyong piso ang diyos, kundi ang mga nagpapatakbo sa larong iyon.   Ngayon, sa sunud-sunod na kamatayan ng kaniyang mga kasamahan, sisiguraduhin niyang siya ang tatanghaling kampeon, at ang premyo ay ang mga lihim ng Siklo.   Pero hindi lang ang Siklo ang may lihim. Pati na rin siya. May alaala siya ng mga dati niyang naging buhay.   Anong kapalaran ang naghihintay kay Faizal sa panibagong mundo ng sakuna at taggutom? Mababago ba niya ang kapalaran ng kasalukuyan niyang pamilya gamit ang mga dating alaala? At ano pa ang matutuklasan niya tungkol sa kaniyang pagkatao?