“Halla! Bakit ganiyan ang hitsura mo? Buong magdamag ka bang umiyak? Ang pangit mo girl!” puna agad sa akin ng best friend ko. Bumuntong-hininga lang ako at nag-iwas ng tingin.
“Nasa bahay si Lovella ngayon, kasama ang asawa ko,” pag-amin ko sa kaniya. Ako mismo ang labis na nasaktan sa ipinaalam ko.
Malakas siyang napasinghap at namilog ang mga mata. “Tapos umalis ka? Ano? Binigyan mo pa sila ng chance para gumawa ng kababuyan?” sermon niya agad sa akin. Tumalim din ang mga mata niya at napapailing pa sa pagkadismaya.
“At ano’ng gusto mong gawin ko? Makipagbardagulan ako sa kanila? Sila naman talaga iyong nagmamahalang dalawa, eh! Ako lang iyong pumagitna,” mapait kong saad. “Waiter!”
Lumapit naman agad sa amin iyong waiter na tinawag ko kaya hindi naituloy ni Kim ang sasabihin niya.
