SAGITTARIUS
NANG MAKITA NAMING nakahandusay sa sahig si Nanay habang iniinda ang sakit sa kanyang likuran ay napatakbo kaming dalawa ni Aqua. Agad namin itong nilapitan at tinulungang bumangon. Hinampas naman ni Nanay si Aqua sa balikat na siyang labis na ikinagulat ko.
“Bakit ka ba tumakbo! Hindi mo ba iniisip iyang apo ko sa sinapupunan mo? Paano kung mapahamahak iyan?” inis na sabi ni Nanay.
“Nag-aalala lang po ako sa iyo,” sagot ni Aqua.
“Nadulas lang ako. Pagbubuksan lang naman sana kita ng pinto,” sabi ni Nanay.
Napatulo ang luha ko matapos marinig ang litanya ni Nanay. Sa pagkakaintindi ko, nanaig ang pagiging ina niya sa babaeng mahal ko. Mukhang napagtanto niyang kailangan siya ng anak niya ngayon sa sitwasyon na ganito.
“Tanggap mo na ba kami ng anak ko, Nay?" umiiyak na t
