KINABUKASAN, araw ng Sabado, nang magpadasal ang mga magulang ni Ezekiel para kay Don Alonzo. Present din ang pamilya ni Janicah nang araw na iyon sa hacienda. Iyon din ang naging pagkakataon para makilala ng mga magulang ni Ezekiel ang kaniyang mga magulang at mga kapatid.
At hindi lang kaluluwa ni Don Alonzo ang isinali sa padasal, ganoon din ang yumaong si Donya Esmeralda at kapatid ni Janicah na si Jayson.
Kaya naman ganoon na lang ang pasasalamat ni Janicah kay Mama Belle dahil akala niya ay si Don Alonzo lang ang padadasalan nang araw na iyon.
“Ikinalulungkot ko ‘yong nangyari kay Jayson,” ani Mama Belle kay Nanay Lita. “Nakuwento sa akin ni Janicah ang nangyari noon.”
Ngumiti si Nanay Lita kay Mama Belle. “Salamat, Señora Belle. Nakakalungkot man pero tanggap ko na rin na hangga
