Humugot muna si Calleigh ng malalim na hininga bago niya binuksan ang library. Bumungad sa kanya ang mga kahon na nasa ibabaw ng pahabang mesa. Ganoon din ang isang laptop. Lumapit siya sa mesa at hinila niya ang isang upuan. Napabuntong-hininga siya, naaalala niya ang naging pagtatalo nila Juan Miguel. Hindi niya sinasadya na marinig ang pag-uusap ng kanyang asawa, ni DJ, Dimitri, Roy at Alex noong dumalaw sila sa mansyon.
Kakatapos lang niyang padedehin si Calix at kasalukuyan itong natutulog sa nursery. Pinasuyo muna niya kay Nurse Sonya ang kanyang anak para hanapin niya si Juan Miguel. Nakalimutan niyang sabihin sa asawa kung alam na ba nito ang pagkakakilanlan ng lalaki na nakita nila sa rancho.
Nakasalubong niya si Ezekiel pababa ng hagdanan.
“Oh, Ate Calleigh, saan ka pupunta?”
