NAGING PARTE NA ng pang-araw-araw na buhay ko si Diego. Sa katunayan, lagi kong inaabangan ang pagdating niya. Sumisigla ang katawan ko tuwing dumadalaw siya. Kaya siguro kumakadyot si Diva sa binti niya kapag nakikita siya, dahil katulad ko, masaya rin ito.
Pauwi na ako galing sa bayan. Para ngang may pumipiga sa bituka ko habang naglalakad sa paanan ng bundok. Dito ako naabutan ni Diego noong nakaraang linggo at dito ko rin inaasahang magkikita kami.
Malayo pa lang, dinig ko na ang mga yabag ng kabayo. Kahit hindi ko lingunin, alam kong si Diego iyon. Lumuwag ang paghinga ko. Tumupad siya sa usapan!
Hinintay ko siya. Ngumiti siya nang malapad pagkakita sa akin. Bumaba siya sa kabayo para kunin ang mga dala-dala ko. Isinabit niya iyon sa likod ng kabayo bago ako tinulungang sumakay. P
