Muling Baliktanaw: Jessie at Miling
Kung tatanungin si Jessie at Miling kung may langit bang maituturing sa lupa, marahil ay magkaparehas ang kanilang magiging sagot.
Oo, may langit sa lupa.
Noong magkaklase pa sila sa hayskul at anibersaryo nila ay minsang sumulat si Jessie ng isang liham ng pag-ibig kay Miling, na malambing niyang tinatawag bilang Pangga, o Ga:
Ga,
Ilalatag kita
Sa damuhang banig ng ating pag-ibig
At doo'y kukumutan ng malamyos na lilim
Ng isang puno ng akasya. Yakaping
Mahigpit ang pinagkakasyang malambot na unan
Ng aking hita at ipikit ang mga matang
Idinuduyan sa pisngi ng langit
Ang isang ngiting maluwalhati.
Sa lambong ng isang katanghaliang araw
Ay malambing kong ititirik
Ang binantog nating pangarap,
Habang sinusuyod ng aking mga daliring sukla
