Kabanata 31
A L I S O N
Saktong katatapos ko lang sa ginagawa ko nang matapos sa pagluluto si Blake. Halos hindi ako makapaniwala habang pinagsasandukan niya ako ng niluto niya. Nakapagluto siya. At amoy pa lang ng luto niya, alam ko nang masarap iyon. Kahit papaano ay maaasahan din pala ang isang ito sa kusina. Akala ko kasi dahil mayaman siya ay umaasa lang siya sa mga kasambahay, nakakatuwang malaman na may alam siya sa kusina.
Mayabang ang ngisi niya nang nakita ang mangha kong reaksyon. Umiling ako at hindi na rin napigilang mapangisi. Ang yabang ng isang ito, akala mo naman talaga nakapuntos na siya sa akin dahil dito. Ni hindi ko pa nga natitikman ang niluto niya. Pero kahit hindi ko pa natitikman ang niluto niya alam kong masarap na ito dahil amoy pa lang nito ay nakakagutom na.
