59. Holding
MAHIGPIT ANG pagkakahawak ni Sage sa kamay ng kasintahan. Natatakot siyang bitawan ito. Hindi niya alam kung ano’ng nag-aabang sa kanila kapag nakarating sa itaas. Masyadong mapanganib ang napasukan nila. Dahil pinili nila ito, may posibilidad din na mamatay sila. Sa uri ng tao na katulad ng Tita Helga niya, hindi imposibleng simpleng bagay lang ang naghihintay. Paulit-ulit na silang sinwerte kaya hindi na nila alam kung hanggang dulo ay ganoon pa rin ang nakatadhana sa kanila.
Naniniwala siya sa gulong ng kapalaran. Alam niyang hindi habangbuhay na nasa ilalim sila parati. Na hindi puro sakit ang mangyayari sa kanila. Na matatapos din ang paghihirap nila sa isla sa oras na mawakasan na ang kasamaang mayroon ang tiyahin niya. Ngunit hanggang kailan? Hindi niya na alam kung
