Kanina pa niya tinititigan ang asawang natutulog. Sinamahan niya ang asawa sa silid. Iyak ito nang iyak dahil sa mga larawang pinadala rito. Alam niyang natakot ang asawa—kitang-kita niya ang takot sa mga mata nito kanina habang umiiyak. Kaya naman hindi na muna niya iniwan ang asawa sa silid. Sinamahan niya ito hanggang sa makatulog na sa kakaiyak.
Nakahiga ito sa kama patagilid at kitang-kita niya ang kagandahan ng asawa. Maganda naman talaga si Hainna kahit noon pa mang kabataan nito, at alam niyang maraming lalaking nagagandahan sa asawa. Isa na ang kumukuha ng mga larawan ng asawa, at kung sino ang gumagawa nito ay hindi pa niya alam.
Tinawagan niya ang P.I. kanina at sinabing inaayos pa ang mga lead nito at humihingi pa ito ng dalawa hanggang tatlong araw pa bago may maibigay na s
