"HUY!" Napaigtad pa dahil sa sobrang gulat si Yanah nang biglang sundutin ni Melissa ang tagiliran niya. Nabitawan niya tuloy ang hawak na pamagpag.
"Nanggugulat ka!" pigil ang tawa at boses na sabi niya rito. Pinandilatan niya pa ng mata.
"Ikaw naman, naninilip ka." Impit din ang tawa at boses nito. Hirap na at baka mapansin sila. Nagkubli pa siya sa malaking vase na malapit sa sliding door.
Hindi naman sa 'naninilip' siya. Napadaan lamang siya at aksidenteng nagawi ang mga mata niya sa pool na nasa labas at nakita niya sina Sir Li at Ma'am Lalaine. Naka pulang two-piece lang si Ma'am Lalaine at kitang-kita sa liwanag ang malalabanos nitong balat. Wala siyang makita miski ano mang peklat. Makurbada rin ang katawan nito kaya hindi niya masisisi si Sir Li kung ganoong klase ng tingin ang
