ARABELLA:
"AHEM!"
PARA kaming nasabuyan ng nagyeyelong tubig ni Dexter nang may mapatikhim sa likuran namin! Napabitaw kami sa malalim naming halikan na napalingon sa dumating at napangiwi na makita ang daddy!
Kaagad na yumuko si Dexter habang ako ay pinamumulaan ng mukha at hindi makangiti sa ama ko! Magkasama pa naman sila ni papa at halatang nanggaling sila sa mini bar nitong mansion.
"Mukhang. . . may nagkaayos na, balae?" nanunudyong wika ni daddy na mahinang ikinatawa ni papa.
Lalo tuloy kaming pinamumulaan ng mukha ni Dexter. Kainis. Naabutan pa talaga kaming malalim na naghahalikan ng mga ama namin!
"Mukha nga, balae. Nagtutukaan ang mga ibon e," pagsang-ayon ni papa dito sabay tawa at apiran sila ni daddy.
Napalapat ako ng labi. Nahihiyang salubungin ang mga mata nila.
