NAGISING si Noah na nilalamig ang kanyang pakiramdam. Kasunod niyon ang panginginig ng kanyang katawan. Inaantok pa rin siya at sa nanlalabong mga mata ay kinapa niya ang kumot na nakatakip sa kanya upang lalong itakip sa kanyang katawan.
“Noah…”
Bahagya niyang narinig ang isang tinig na pinapakalma siya. Kasunod niyon ang isang mainit na kamay na humawak sa kanyang noo. Hindi niya alam kung ano ang nangyayari pero matindi ang lamig na nararamdaman niya. Mabigat na mabigat din ang pakiramdam niya at masakit ang kanyang katawan. Maya-maya pa ay may kung anong bagay na dumadampi sa buong mukha niya. Lalo niyang kinipkip ang kumot sa kanyang katawan. Pagkatapos ay naramdaman niya ang isang bisig na yumakap sa kanya. Ikinulong siya nito sa mga bisig na iyon. Unti-unti niyang naramdaman ang
