Tinapos na ni Apollo ang pakikipag-usap sa imbestigador, at muling itinutok ang matiim na tingin sa mga dokumentong nakalapag sa ibabaw ng mesa niya. Kopya iyon ng termination notice na ihahain sa Manager ng Payroll and Accounting. Malinaw na nakasulat sa nilalaman ng dokumento ang polisiya ng kompanyang nilabag ng empleyado.
Ang mga hindi tama nitong gawain ay dumalas noong mga panahong hindi makapag-focus si Apollo sa trabaho. Noong mga panahong lugmok na lugmok siya at hindi niya matutukang maigi ang Altieri Construction, sapagkat ang utak niya ay abala sa kakaisip kay Ahtisa. Sinamantala ng Manager ang pagiging balisa at problemado niya para isagawa ang pandaraya nito sa kompanya.
Ang akala siguro nito ay parang butong naibaon lang nito sa lupa ang kabulastugan nito. At dahil sa kaw
