GAYA ng hiniling dati ni Eloisa ay ipina-cremate ni Theo ang katawan nito. Bago siya magdesisyon ay kinausap niya muna ang buong pamilya ng kaniyang asawa at nang sinabi niya na iyon ang sinabi dati ni Eloisa ay walang pagdadalawang-isip na pumayag ang mga ito. Inilagay niya ang abo ni Eloisa sa isang magandang urn. Nais niyang tuparin ang sinabi sa kaniya nito noon dahil alam niyang iyon talaga ang gusto nito.
Sa ngayon ay nakaburol ang abo ni Eloisa sa bahay ng nanay niya. Huling gabi na nito dito tapos bukas naman ay sa bahay ng pamilya nito. Dalawang araw ito doon bago nila ito ilagay sa libingan.
Malungkot siyang nakaupo habang nakatingin sa urn ni Eloisa na nasa kaniyang harapan. Nakatulala lang siya at tila wala na sa sarili. Hindi na niya magawang kumain o matulog man lang. Palag
