INAKALA ni Almira na dahil nagdesisyon sila ni Brad na pag-isipang mabuti ang ideya ng divorce ay hindi muna sila magkakaroon ng komunikasyon. Inaasahan na niya na wala siyang matatanggap kahit na tawag mula sa lalaki. Kaya nagulat siya nang pagpasok niya kinabukasan ay maabutan niyang naghihintay sa kaniya si Brad sa opisina niya sa housekeeping department. Prente pang nakaupo ang lalaki sa swivel chair niya at masayang nakikipag-usap sa Assistant Housekeeper at sa kaibigan niyang si Janine na napansin agad niyang nakasuot ng jeans at blouse himbis na office attire.
“Bakit nandito ka?” gulat na bulalas ni Almira.
Nahinto sa masiglang pagkukuwento si Brad na kung tama siya ng hinala base sa mga nahagip niyang salita ay tungkol sa naging pagkikita nila sa Las Veg
